Mahabharata · Chapter 4.65

karṇaṃ parājitaṃ dṛṣṭvā pārtho vairāṭimabravīt /
etaṃ māṃ prāpayedānīṃ rathavṛndaṃ prahāriṇām //

yatra śāntanavo bhīṣmaḥ sarveṣāṃ naḥ pitāmahaḥ /
suyuddhaṃ kāṅkṣamāṇo vai rathe tiṣṭhati daṃśitaḥ //

tālo vai kāñcano yatra vajravaiḍūryabhūṣitaḥ /
atīva samare bhāti mātariśvaprakampitaḥ //

dāruṇaṃ prahariṣyāmi rathabṛndāni dhanvinām /
ādāsyāmyahameteṣāṃ dhanurjyāveṣṭanāni ca //

asyantaṃ divyamastrāṇi citramuttara paśyasi //

śatahradāṃ jṛmbhamāṇāṃ meghasthāṃ prāvṛṣīva ca /
suvarṇapṛṣṭhaṃ gāṇḍīvaṃ paśyantu kuravo mama //

dakṣiṇenātha vāmena katamena svidasyati /
iti māṃ śatravaḥ sarve na vijñāsyanti sārathe //

astrodakāṃ hayāvartāṃ nāganakrāṃ rathahradām /
nadīṃ praskandayiṣyāmi paralokāpahāriṇīm //

pāṇipādaśiraḥpṛṣṭhabāhuśaṅkhacarācaram /
vanaṃ kurūṇāṃ chetsyāmi bhallaiḥ sannataparvabhiḥ //

tūṇīśayāḥ supuṅkhāgrā viśikhā dundubhisvanāḥ /
mayā pramuktāḥ sangrāme kurūndhakṣyanti sāyakāḥ //

dhvajavṛkṣaṃ śaratṛṇaṃ nāgāśvaśvāpadākulam . rathasiṃhagaṇairyuktaṃ dhanurvallisamākulam /
vanamādīpayiṣyāmi kurūṇāmastratejasā //

jayato bhāratīṃ senāmekasya mama saṃyuge /
śataṃ mārgā bhaviṣyanti pāvakasyeva kānane //

mayā cakramivāviddhaṃ sainyaṃ drakṣyasi kevalam . tānahaṃ rathanīḍebhyaḥ paralokāya śātravān /
ekaḥ pradrāvayiṣyāmi cakrapāṇirivāsurān //

asambhrānto rathe tiṣṭhansameṣu viṣameṣu ca /
mārgamāvṛtya tiṣṭhantamapi bhetsyāmi parvatam //

ahamindrasya sangrāme dviṣato baladarpitān / mātaliṃ sārathiṃ kṛtvā nivātakavacānraṇe /
hatavānsarvataḥ sarvāndhāvato yudhyatastadā //

nivātakavacānhatvā gāṇḍīvāstraiḥ sahasraśaḥ /
paraṃ pāre samudrasya hiraṇyapuramārujam //

hatvā ṣaṣṭisahasrāṇi rathānāmugradhanvinām / paulomānkālakeyāṃśca samare bhṛśadāruṇān /
asurānahanaṃ ghorānraudreṇāstreṇa sārathe //

ahamindrāddṛḍhāṃ muṣṭiṃ brahmaṇaḥ kṣiprahastatām /
pragāḍhanipuṇaṃ citramativṛddhaṃ prajāpateḥ //

raudraṃ rudrādahaṃ vedmi vāruṇaṃ varuṇādapi /
sauryaṃ sūryādahaṃ vedmi yāmyaṃ daṇḍadharādapi //

astramāgneyamagneśca vāyavyaṃ mātariśvanaḥ /
anyairdevairahaṃ prāptaḥ ko māṃ viṣahate pumān //

adya gāṇḍīvanirmuktaiḥśaraughai romaharṣaṇaiḥ /
kurūṇāṃ pātayiṣyāmi rathavṛndāni dhanvinām //
vaiśampāyana uvāca /

evamāśvāsitastena vairāṭiḥ savyasācinā /
vyagāhata rathānīkaṃ bhīmaṃ bhīṣmasya vājibhiḥ //

rathisiṃhamanādhṛṣyaṃ jigīṣantaṃ parānraṇe /
abhyadhāvattadaivogro jyāṃ vikarṣandhanañjayaḥ //

duḥśāsano'bhyayāttūrṇamarjunaṃ bharatarṣabhaḥ //

anye'pi citrābharaṇā yuvāno mṛṣṭakuṇḍalāḥ /
abhyayurbhīmadhanvāno mauvī paryasya bāhubhiḥ //

duḥśāsano vikarṇaśca vṛṣaseno viviśatiḥ /
abhītā bhīmadhanvānaṃ pāṇḍavaṃ paryavārayan //

tasya duḥśāsanaḥ ṣaṣṭiṃ vāmapārśve samārpayat /
asyataḥ pratisandhāya kuntīputrasya dhīmataḥ //

punaścaiva sa bhallena viddhvā vairāṭimuttaram /
dvitīyenārjunaṃ vīraṃ pratyavidhyatstanāntare //

tasya jiṣṇurudāvṛtya kṣuradhāreṇa kārmukam /
prākṛntadgṛdhrapatreṇa jātarūpapariṣkṛtam //

athainaṃ pañcabhirbāṇaiḥ pratyavidhyatstanāntare /
sopayāto rathopasthātpārthabāṇābhipīḍitaḥ //

sarvā diśaścābhyapatadbībhatsurapārājitaḥ / taṃ vikarṇaḥ śaraistīkṣṇairgṛdhrapakṣaiḥ śilāśitaiḥ /
vivyādha paravīradhnamarjunaṃ dhṛtarāṣṭrajaḥ //

tatastamapi kaunteyaḥ śareṇa nataparvaṇā /
lalāṭe'bhyahanadgāḍhaṃ sa viddhaḥ prādravadbhayāt //

tataḥ pārthamupādrutya dussahaḥ saviviṃśatiḥ /
avākiraccharaistīkṣṇaiḥ parīpsanbhrātaraṃ raṇe //

tāvubhau gṛdhrapatrābhyāṃ niśitābhyāṃ dhanañjayaḥ /
vivyādha yugapadvyagrastayorvāhānasūdayat //

tau hatāśvau tu viddhāṅgau dhṛtarāṣṭrātmajāvubhau /
abhipatya rathairanyairapanītau padānugaiḥ //

vyadrāvayadaśeṣāṃśca dhṛtarāṣṭrasutāṃstadā /
vidrāvya ca raṇe pārtho raṇabhūmiṃ vyarājayat //

kirīṭamālī kaunteyo labdhalakṣaḥ pratāpavān /
pātayannuttamāṅgāni bāhūśca parighopamān //

aśerata mahāvīrāḥ śataśo rukmamālinaḥ //

kamaladinakarendusannibhaiḥ sitadaśanaiḥ sumukhākṣināsikaiḥ /
ruciramakarakuṇḍalairmahī puruṣaśirobhirathāstṛtā babhau //

sunasaṃ cārudīptāścaṃ klṛptaśmaśru svalankṛtam /
adṛśyata śiraśchinnamanekaṃ hemakuṇḍalam //

evaṃ tatprahataṃ sainyaṃ samantātpradrutaṃ bhayāt //

atha duryodhanaḥ karṇaḥ saubalaḥ śakunistadā /
droṇaśca droṇaputraśca kṛpaścātiratho raṇe //

sahitā vijayaṃ tatra yodhayanto mahārathāḥ /
viṣphārayantaścāpāni balavanti mahābalāḥ //

tataḥ kīrṇapatākena rathenādityavarcasā /
punarāvṛtya mārgasthaṃ dadṛśurvānaradhvajam //

te mahāstrairmaheṣvāsāḥ parivārya dhanañjayam /
abhyavarṣansusankruddhā mahāmeghā ivācalam //

śaraughānsamyagasyanto jīmūtā iva śāradāḥ /
yuddhe tasthurmahāvīryāḥ pratapantaḥ kirīṭinam //

iṣubhirbahubhistūrṇaṃ niśitairlomavāpibhiḥ /
adūrātpratyavasthāya pāṇḍavaṃ samayodhayan //

tataḥ prahasya bībhatsustamaindraṃ pañcavārṣikam /
astramādityasankāśaṃ gāṇḍīve samayojayat //

nākṣaṇāṃ na ca cakrāṇāṃ na rathānāṃ na vājinām /
aṅgulāddavyaṅgulādvāpi vivṛtaṃ pratyadṛśyata //

yathā raśmibhirādityo vṛṇute sarvato diśam /
evaṃ kirīṭinā muktaṃ sarvaṃ prācchādayañjagat //

yathā balāhake vidyutpāvako vā śiloccaye /
tathā gāṇḍīvamabhavaccakrābhudhamivātatam //

yathā varṣati parjanyo vidyutpatati parvate /
visphūrjitā diśaḥ sarvā jvaladgāṇḍīvamāvṛṇot //

trastāśca rathinaḥka sarve caindramastraṃ vikurvati / sarve śāntiparā yodhāḥ svacittaṃ nābhijajhire /
sahitā droṇabhīṣmābhyāṃ pramohagatacetanāḥ //

tāni sarvāṇi sainyāni bhagnāni bharatarṣabha /
prādravanta diśaḥ sarvā bhayādvai savyasācinaḥ //