Mahabharata · Chapter 4.64

bhīṣmaṃ vijitya sangrāme kurūṇāṃ miṣatāṃ raṇe /
tato yuddhamanāḥ prāyātpārthaḥ pañca mahārathān //

ādadānaśca nārācānvimṛśanniṣudhī api /
saṃspṛśānaśca gāṇḍīvaṃ bhūyaḥ karṇaṃ samabhyagām //
drauṇiruvāca /

karṇa yattatsabhāmadhye bahvabaddhaṃ prabhāṣase /
na me yudhi samo'stīti tadidaṃ pratyupasthitam //

eṣo'ntaka iva kruddhaḥ sarvabhūtāvamardanaḥ / adūrātpratyupasthāya jṛmbhate kesarī yathā /
na palāyasva śūraścetsthitvā yudhyasva phalgunam //
karṇa uvāca /

nāhaṃ bibhemi bībhatsoḥ kṛṣṇādvā devakīsutāt /
pāṇḍavebhyopi sarvebhyaḥ kṣatradharmamanuvrataḥ //

satvādhikānāṃ śūrāṇāṃ dhanurvedopajīvinām /
darśanāñjāyate darpaḥ svaraśca na viṣīdati //

paśyatvācāryaputro māmarjunena samaṃ yudhi /
yudhyamānaṃ susaṃyuktaṃ daivaṃ tu duratikramam //
aśvatthāmovāca /

ko doṣaḥ karṇa śūrāṇāṃ vācā sākaṃ hi pauruṣam /
vidyate yadi talloke guṇottaramihocyate //

yuvyasva tvamabhīḥ pārthaṃ prapalāyasva mā raṇāt /
uktaṃ vacaḥ smarankarṇa nāhamityādi saṃyuge //
vaiśampāyana uvāca /

taṃ samantādrathāḥ pañca parivārya dhanañjayam /
ta iṣūnsamyagasyanto mumukṣantopi jīvitāt //

te lābhamiva manvānāḥ kṣipramārcchandhanañjayam /
śaraughānsamyagasyanto jīmūtā iva vārṣikāḥ //

bahubhirniśitairbāṇairvividhairlomavāpibhiḥ /
ādravanpratyavasthāya pratyavidhyandhanañjayam //

tataḥ prahasya bībhatsuḥ sarvaśastrabhṛtāṃvaraḥ /
divyamastraṃ vikurvāṇaḥ pratyayādrathasattamān //

yathā raśmibhirādityaḥ pracchādayati medinīm /
evaṃ gāṇḍīvanirmuktaiḥ śaraiḥ prācchādayaddiśaḥ //

na rathānāṃ na nagānāṃ na dhvajānāṃ na vājinām /
aviddhaṃ niśitairbāṇairāsīddyūṅgulamantaram //

sarve śāntiparā yodhāḥ svacittaṃ nābhijajhire /
hastino'śvāśca vitrastā vyavalīyanta bhārata //

yathā nalavanaṃ nāgaḥ prabhinnaḥ ṣāṣṭihāyanaḥ /
evaṃ sarvānapāmṛdgādarjunaḥ śastratejasā //

gāṇḍīvasya tu ghoṣeṇa pṛthivī samakampata /
manāṃsi dhārtarāṣṭrāṇāmapyakṛntaddhanañjayaḥ //

tato vigāhya sainyānāṃ madhyaṃ śastrabhṛtāṃvaraḥ /
sārathiṃ samare śūrastvabhyabhāṣata vīryavān //

sanniyamya hayānetānmandaṃ vāhaya sārathe /
ācāryaputraṃ samare yodhayiṣye'parājitam //

purā hyeṣa mayā yuktaḥ sa me bhavati pṛṣṭhataḥ // evamukte'rjunenāsāvaśvatthāmarathaṃ prati /

virāṭaputro javanānbhṛśamaśvānacodayat //
karṇa uvāca /
eṣopayāti bībhatsurvyathito gāḍhavedanaḥ /

taṃ tu tatraiva yāsyāmi nāsau mucyeta jīvitāt //
droṇa uvāca /

nāsau bhayena niryāto mahātmā pākaśāsaniḥ /
naivaṃ bhītā nivartante na punargāḍhavedanāḥ //

yadyenamabhisaṃrabdhaṃ punarevābhiyāsyasi /
bahūnyastrāṇi jānīte na punarmokṣyate bhavān //

diṣṭyā duryodhano mukto diṣṭyā gāvaḥ palāyitāḥ /
mukto diṣṭyā ca sangrāme kiṃ raṇena kariṣyasi //

krośamātramapākramya balamanvānayāmahe /
anvāgatabalāḥ pārthaṃ punarevābhiyāsyatha //