Mahabharata · Chapter 4.63

tato bhīṣmaḥ śarānaṣṭau dhvaje pārthasya vīryavān /
samārpayanmahāvegājjvalataḥ pannagāniva //

te dhvajaṃ pāṇḍuputrasya samāsādya patatriṇaḥ /
dhvajasthaṃ kapimājaghnuḥ dhvajāgranilayāṃśca tān //

sārathiṃ ca hayāṃścāsya vivyādha daśabhiḥ śaraiḥ /
urasyatāḍayatpārthaṃ tribhirevāyasaiḥ śaraiḥ //

tato'rjunaḥ śaraistīkṣṇairviddhvā kurupitāmaham /
dhvajaṃ ca sārathiṃ cāpi vivyādha daśabhiḥ śaraiḥ //

tadyuddhamabhavaddhoraṃ romaharṣaṇamadbhutam /
bhīṣmasya saha pārthena balivāsavayoriva //

santataṃ śarajālābhirākāśaṃ samapadyata /
ambudairiva dhārābhistayoḥ kārmukaniḥsṛtaiḥ //

bhallairbhallāḥ samāhatya kurupāṇḍavayo raṇe /
antarikṣe vyarājanta khadyotāḥ prāvṛṣīva hi //

agnivakropamaṃ ghoraṃ maṇḍalīkṛtamāhave /
gāṇḍīvamabhavañjiṣṇoḥ savyaṃ dakṣiṇamasyataḥ //

parvataṃ vāridhārābhiśchādayanniva toyadaḥ /
arjunaśchādayadbhīṣmaṃ śaravarṣairanekaśaḥ //

tāṃ samudramivoddhūtāṃ śaravṛṣṭiṃ samudyatām /
vyadhamatsāyakairbhīṣmaḥ sorjunaṃ ca nyavārayat //

tatastāni visṛṣṭāni śarajālāni saṅghaśaḥ /
āhatāni vyaśīryantaṃ arjunasya rathaṃ prati //

tataḥ kanakapuṅkhāgraiḥ śitaiḥ sannataparvabhiḥ /
patadbhiḥ khagavājaiśca dyaurāsītsaṃvṛtā śaraiḥ //

tataḥ prāsṛjadugrāṇi śarajālāni pāṇḍavaḥ /
tāvanti śarajālāni bhīṣmaḥ pārthāya prāhiṇot //

sāśvaṃ sasūtaṃ sarathaṃ sa pārthaṃ samācinodbhārato vatsadantaiḥ /
pracchādayāmāsa diśaśca sarvā nabhaśca bāṇaistapanīyapuṅkhaiḥ //

tato devarṣigandharvāḥ sādhusādhvityapūjayan /
duṣkaraṃ kṛtavānbhīṣmo yadarjunamavārayat //

balavānarjuno dakṣaḥ kṣiprakārī ca pāṇḍavaḥ /
ko'nyaḥ samarthaḥ pārthasya vegaṃ dhārayituṃ raṇe //

ṛte śāntanavādbhīṣmātkṛṣṇādvā devakīsutāt /
ācāryavaramukhyādvā bhāradvājānmahābalāt //

astrairastrāṇi saṃvārya krīḍataḥ puruṣottamau /
cakṣūṃṣi sarvabhūtānāṃ modayantau mahābalau //

prājāpatyaṃ tathaivaindramāgneyaṃ ca sudāruṇam . kauberaṃ vāruṇaṃ caiva yāmyaṃ vāyavyameva ca /
prayuñjānau mahātmānau samare tau virejatuḥ //

vismitānyatha bhūtāni tau dṛṣṭvā saṃyuge tadā /
sādhu pārtha mahābāho sādhu bhīṣmeti cābruvan //

naitadanyo manuṣyeṣu pradarśayitumāhave /
mahāsrāṇāṃ samprayogaṃ samare bhīṣmapārthayoḥ //

evaṃ sarvāstraviduṣorastrayuddhamavartata //

atha jiṣṇurudāvṛtya śitadhāreṇa kārmukam /
nyakṛntadgṛdhrapatreṇa śātakumbhapariṣkṛtam //

nimeṣāntaramātreṇa bhīṣmo'nyatkārmukaṃ raṇe /
samādāya naravyāghraḥ sajyaṃ cakre mahābalaḥ //

śarāṃśca subahunkruddho mumocāśu dhanañjaye . arjunopi śarāṃstīkṣṇānbhīṣmāya niśitānbahūn /
cikṣepa ca mahātejāstathā bhīṣmaśca pāṇḍave //

tayordivyāstraviduṣorasyatoraniśaṃ śarān /
na viśeṣastadā rājandṛśyate sumahātmanoḥ //

athāvṛṇoddaśa diśaḥ śarairatirathastadā /
kirīṭamālī kaunteyaḥ śūraṃ śāntanavaṃ tathā //

atīva pāṇḍavo bhīṣmaṃ bhīṣmaścātīva pāṇḍavam /
babhūva tatra saṅghe'sminloke rājaṃstadadbhutam //

pāṇḍavena hatāḥ śūrā bhīṣmasya ratharakṣiṇaḥ /
śerate sma mahābāho kaunteyasyābhito ratham //

tato gāṇḍīvanirmuktā niramitraṃ cikīrṣavaḥ /
asaktāḥ puṅkhasaṃsaktāḥ śvetavāhanapatriṇaḥ //

niṣpatanto rathāttasya dhautā hairaṇyavāsasaḥ /
ākāśe pratyadṛśyanta haṃsānāmiva paṅktayaḥ //

tasya taddivyamastraṃ hi pragāḍhaṃ citramasyataḥ /
prekṣante smāntarikṣasthāḥ sarve devāḥ savāsavāḥ //

taṃ dṛṣṭvā paramaprīto gandharvaścitramadbhutam /
śaśaṃsa devarājāya citrasenaḥ pratāpavān //

paśyemānarinirdārānsaṃsaktāniva gacchataḥ /
citrarūpamidaṃ jiṣṇordivyamastramudīryataḥ //

nedaṃ manuṣyāḥ śraddadhyurna hīdaṃ teṣu vidyate /
saurāṇāṃ ca mahāsrāṇāṃ vicitro'yaṃ samāgamaḥ //

madhyandinagataṃ sūryaṃ pratapantamivāmbare /
na śaknuvanti sainyāni pāṇḍavaṃ prasamīkṣitum //

ubhau viśrutakarmāṇāvubhau śūrau mahīkṣitām /
ubhau vicitrakarmāṇāvubhau yudhi durāsadau //

ityukto devarājastu pārthabhīṣmasamāgamam / pūjayāmāsa divyena puṣpavarṣeṇa bhārata // 4-63-39a[aśvatthāmā tato'bhyetya drutaṃ karṇamabhāṣata . ahameko haniṣyāmi sametānsarvapāṇḍavān //

iti karma samakṣaṃ me sabhāmadhye tvayoditam /
na tu tatkṛtamekasmādbhīto dhāvasi sūtaja //

vaicitravīryajāḥ sarve tvāmāśritya pṛthāsutān /
jetumicchanti sangrāme bhavānyudhyasva phalgunam //

aśvatthāmoditaṃ vākyaṃ śrutvā duryodhanastadā /
pratyuvāca ruṣā drauṇiṃ karṇapriyacikīrṣayā //

mā mānabhaṅgaṃ viprendra kuru viśrutakarmaṇaḥ /
mānabhaṅgena rājñāṃ tu balahānirbhaviṣyati //

śūrā vadanti sangrāme vācā karmāṇi kurvate /
parākramanti sangrāme svasya vīryānusārataḥ //

tasmāttaṃ nārhati bhavāngarhituṃ śūrasammatam . rājñaivamuktaḥ sa drauṇirgataroṣo'bhavattadā // ]

tato bhīṣmaḥ śāntanavo bāṇānpārśve samārpayat / asyataḥ pratisandhāya vivṛtaṃ savyasācinaḥ

tataḥ prasahya bībhatsuḥ pṛthudhāreṇa kārmukam /
nyakṛntadgṛdhrapatreṇa bhīṣmasyāmitatejasaḥ //

athainaṃ daśabhiḥ paścātpratyavidhyatstanāntare /
yatamānaṃ parākrāntaṃ kuntīputro dhanañjayaḥ //

sa pīḍito mahābāhurgṛhītvā rathakūbaram /
goṅgeyo yudhi durdharṣastasthau dīpa ivāturaḥ //

taṃ visañjñamapovāha saṃyantā rathavājinām /
upadeśamanusmṛtya rakṣamāṇo mahāratham //

parākrame ca śaurye ca vīrye sattve bale raṇe /
śastrāstreṣu ca sarveṣu lāghave dūrapātane //

yasya nāsti samo loke pitṛdattavaraśca yaḥ / jitaśramo jitārātirnistandriḥ khedavarjitaḥ /
yaḥ svecchāmaraṇaḥ śūraḥ pitṛśuśrūṣaṇe rataḥ //

duryodhanahitārthāya yuddhvā pārthena sangare /
pṛthāsutahitārthāya parājita ivābhavat //