Mahabharata · Chapter 4.62

evaṃ vidrāvya tatsainyaṃ pārtho bhīṣmamupādravat /
trasteṣu sarvasainyeṣu kauravyasya mahātmanaḥ //

bāṇāndhanuṣi sandhāya caturaḥ pākaśāsaniḥ /
bhīṣmaṃ ca prāhiṇodbhītastaṃ dvābhyāmabhyavādayat //

tasya karṇāntikaṃ gatvā dvāvabrūtāṃ ca kauśalam /
so'pyāśīravadadbhīṣmaḥ kaunteyo jayatāmiti //

narasiṃhamupāyāntaṃ jigīṣantaṃ parānraṇe /
vṛṣaseno'bhyayāttūrṇaṃ yoddhukāmo dhanañjayam //

vaikartanātmajo vīraḥ sangrāme lokaviśrutaḥ /
śauryavīryādibhiḥ karṇādbimbādvimba ivoddhṛtaḥ //

ātmanā yudhyatastasya vṛṣasenasya pāṇḍavaḥ . muhūrtaṃ tasya taddṛṣṭvā hastalāghavapauruṣe /
tutoṣa ca tataḥ pārtho vṛṣasenaparākramam //

tasya pārthastadā kṣipraṃ kṣuradhāreṇa kārmukam /
nyakṛnyadgṛdhrapatreṇa jāmbūnadapariṣkṛtam //

athainaṃ pañcabhirbhūyaḥ pratyavidhyatstanāntare /
sa pārthabāṇābhihato rathātpraskandya dudruve //

duḥśāsano vikarṇaśca śakuniśca viviṃśatiḥ /
āyāntaṃ bhīmadhanvānaṃ paryakīryanta pāṇḍavam //

teṣāṃ pārtho raṇe kruddhaḥ śaraiḥ sannataparvabhiḥ /
yugaṃ dhvajaṃ śarāsaṃ ca ciccheda tarasā raṇe //

te nikṛttadhvajāḥ sarve chinnakārmukaveṣṭanāḥ /
raṇamadhyādapayayuḥ pārthabāṇābhipīḍitāḥ //

tataḥ prahasya bībhatsurvairāṭimidamabravīt /
etaṃ me prāpayedānīṃ tālaṃ sauvarṇamucchritam //

meghamadhye yathā vidyudujjvalantī punaḥ punaḥ /
asau śāntanavo bhīṣmastatra yāhi parantapa //

asrāṇi tasya divyāni darśayiṣyāmi saṃyuge /
ghorarūpāṇi citrāṇi laghūni ca gurūṇi ca //

asmākaṃ poṣako nityamābālyānmatsyabhūmipa /
śreyaskāmī sadā'smākaṃ yogakṣemakaraḥ sadā //

tasyāṅke virdhito bālye tadyotsye'nena sāmpratam /
asmākaṃ dhārtarāṣṭrāṇāṃ śamakāmo divāniśam //

vaiśampāyana uvāca /

tasya tadvacanaṃ śrutvā vairāṭiḥ pārthasārathiḥ /
vāhayaccoditastena rathaṃ bhīṣmarathaṃ prati //

taṃ rathaṃ coditaṃ dṛṣṭvā phalgunasya rathottamam . vāyuneva mahāmeghaṃ sahasā'bhisamīritam /
taṃ pratyayācca gāṅgeyo rathenādityavarcasā //

āyāntamarjunaṃ dṛṣṭvā bhīṣmaḥ parapuñjayaḥ /
pratyuñjagāma yuddhārthī maharṣabhamivarṣabhaḥ //

tathā hi gupta eteṣāṃ durādharṣaḥ pitāmahaḥ /
hanyamāneṣu yogheṣu dhanañjayamupādravat //

pragṛhya kārmukaśreṣṭhaṃ jātarūpapariṣkṛtam /
śarānādāya tīkṣṇāgrānmarmadehapramāthinaḥ //

pāṇḍureṇātapatreṇa dhriyamāṇena mūrdhani /
śuśubhe sa naravyāghro giriḥ sūryottare yathā //

prādhmāpya śaṅkhaṃ gāṅgeyo dhārtarāṣṭrānpraharṣayan /
pradakṣiṇamupāvṛtya bībhatsuṃ pratyavārayat //

tamavekṣya samāyāntaṃ kaunteyaḥ paravīrahā . pratyagṛhṇādameyātmā priyātithimivāgatam /
devadattaṃ mahāśaṅkhaṃ pradadhmau yudhi vīryavān //

tau śaṅkhanādāvatyarthaṃ bhīṣmapāṇḍavayostadā /
nādayāmāsaturdyāṃ ca khaṃ ca bhūmiṃ ca sarvaśaḥ //

antarikṣe ca jalpanti sarve devāḥ savāsavāḥ /
yadarjunaḥ kurūnsarvānprākṛntacchasratejasā //

kuruśreṣṭhāvimau vīrau raṇe bhīṣmadhanañjayau /
sarvāstrakuśalau vīrāvapramattau raṇe sadā //

ubhau devamanuṣyeṣu viśrutau svaparākramaiḥ /
ubhau paramasaṃrabdhāvubhau dīptadhanurdharau //

samāgatau naravyāghrau vyāghrāviva tarasvinau /
ubhau sadṛśakarmāṇau sūryasyāgneśca bhārata //

vāsudevasya sadṛśau kārtavīryasamāvubhau . ubhau viśrutakarmāṇāvubhau śūrau mahābalau /
sarvāstraviduṣāṃ śreṣṭhau sarvaśastrabhṛtāṃ varau //

agnerindrasya somasya yamasya varuṇasya ca //
anayoḥ sadṛśaṃ vīryaṃ mitrasya varuṇasya ca //

ko vā kuntīsutaṃ yuddhe dvairathenopayāsyati /
ṛte śāntanavādanyaḥ kṣatriyo bhuvi vidyate //

iti sampūjayāmāsurbhīṣmaṃ dṛṣṭvā'rjunaṃ gatam /
taṃ raṇe samprahṛṣyantaṃ dṛṣṭvā devāḥ savāsavāḥ //

atha bahuvidhatūryaśaṅkhayoṣairvividharavaiḥ saha siṃhanādamiśraiḥ /
kuruvṛṣabhamapūjayatkurūṇāṃ balamamarādhipasainyasaprabhaṃ tat //