Mahabharata · Chapter 4.56

tatastrīṇi sahasrāṇi rathānāṃ ca dhanuṣmatām /
ghorāṇi kuruvīrāṇāṃ paryakīryanta bhārata //

karṇo rathasahasreṇa pratyagṛhṇāddhanañjayam /
bhīṣmaḥ śāntanavo dhīmānsahasreṇa puraskṛtaḥ //

tathā rathasahasreṇa bhrātṛbhiḥ parivāritaḥ /
paścādduryodhano'tiṣṭhadyaśasā ca śriyā jvalan //

atiṣṭhannivakāśeṣu pādātāḥ saha vājibhiḥ /
bhīmarūpāśca mātaṅgāstomarāṅkuśacoditāḥ //

tāni dṛṣṭvā hyanīkāni vitatāni mahātmanām /
vairāṭimuttaraṃ taṃ tu pratyabhāṣata pāṇḍavaḥ //

jāmbūnadamayī vedī dhvajāgre yasya dṛśyate /
śoṇāścāśvā rathe yuktā droṇa eṣa prakāśate //

ācāryo nipuṇo dhīmānbrahmavicchūrasattamaḥ /
āhave cāpratidvandvo dūrapātī mahārathaḥ //

suprasanno mahāvīraḥ kuruṣvainaṃ pradakṣiṇam /
atraiva cāvirodhena eṣa dharmaḥ sanātanaḥ //

yadi me prahareddroṇaḥ śarīre me prahṛṣyataḥ /
tato'sminprahariṣyāmi nānyathā buddhirasti me //

bhāratācāryamukhyena brāhmaṇena mahātmanā /
tena me yudhyamānasya mandaṃ vāhaya sārathe //

dhvajāgre siṃhalāṅgūlo dikṣu sarvāsu śobhate /
bhāratācāryaputrastu so'śvatthāmā virājate //

dhvajāgraṃ dṛśyate yatra bālasūryasamaprabham . durjayaḥ sarvasainyānāṃ devairapi savāsavaiḥ /
tena me yudhyamānasya mandaṃ vāhaya sārathe //

dhvajāgre govṛṣo yasya kāñcano'bhivirājate /
ācāryavaramukhyastu kṛpa eṣa mahārathaḥ //

droṇena ca samo vīrye piturme paramaḥ sakhā /
tena me yudhyamānasya mandaṃ vāhaya sārathe //

yasya kāñcanakambūbhirhastikakṣyāpariṣkṛtaḥ /
dhvajaḥ prakāśate dūrādrathe vidyudgaṇopamaḥ //

eṣa vaikartanaḥ karṇaḥ pratimānaṃ dhanuṣmatām /
dṛḍhavairī sadā'smākaṃ nityaṃ kaṭukabhāṣaṇaḥ //

yasyāśrayabalādeva dhārtarāṣṭraḥ sasaubalaḥ /
asmānnirasya rājyācca punaradyāpi yotsyati //

eṣa vai spardhate nityaṃ mayā saha sudurjayaḥ /
jāmadagnyasya rāmasya śiṣyo hyeṣa mahārathaḥ //

sarvāstrakuśalaḥ karṇaḥ sarvaśastrabhṛtāṃvaraḥ /
yuddhe'pratimavīryaśca dṛḍhavedhī parākramī //

adyāhaṃ yuddhametena kariṣye sūtabandhunā /
draṣṭā tvamāvayoryuddhaṃ balivāsavayoriva //

mahārathena śūreṇa sūtaputreṇa dhanvinā /
tena me yudhyamānasya śīghraṃ vāhaya sārathe //

yasya caiva rathopasthe nāgo maṇimayo dhvajaḥ /
eṣa duryodhanastatra kauravo yaśasā vṛtaḥ //

labdhalakṣo dṛḍhaṃ vedhī laghuhastaḥ pratāpavān /
tena me yudhyamānasya śīghraṃ vāhaya sārathe //

yastu śvetāvadātena pañcatālena ketunā /
vaiḍūryamayadaṇḍena tālavṛkṣeṇa rājate //

hastāvāpī bṛhaddhanvā senāṃ tiṣṭhati harṣayan /
rāmeṇa jāmadagnyena dvairathenājitaḥ purā //

śīghraśca laguvedhī ca laghuhastaḥ pratāpavān /
eṣa śāntanavo bhīṣmaḥ sarveṣāṃ naḥ pitāmahaḥ //

kakudaḥ sarvasainyānāṃ sarvaśastrabhṛtāṃvaraḥ . jayaśriyā'vabaddhastu suyodhanavaśānugaḥ /
paścādeṣa prayātavyo na me vighnakaro bhavet //

ityetāṃstvaritaḥ pārthaḥ kathayitvā tu cottare /
rūpataścihnataścaiva yuddhāya tvarate punaḥ //