મહાભારત · અધ્યાય 4.56

તતસ્ત્રીણિ સહસ્રાણિ રથાનાં ચ ધનુષ્મતામ્ ।
ઘોરાણિ કુરુવીરાણાં પર્યકીર્યન્ત ભારત ॥

કર્ણો રથસહસ્રેણ પ્રત્યગૃહ્ણાદ્ધનઞ્જયમ્ ।
ભીષ્મઃ શાન્તનવો ધીમાન્સહસ્રેણ પુરસ્કૃતઃ ॥

તથા રથસહસ્રેણ ભ્રાતૃભિઃ પરિવારિતઃ ।
પશ્ચાદ્દુર્યોધનોઽતિષ્ઠદ્યશસા ચ શ્રિયા જ્વલન્ ॥

અતિષ્ઠન્નિવકાશેષુ પાદાતાઃ સહ વાજિભિઃ ।
ભીમરૂપાશ્ચ માતઙ્ગાસ્તોમરાઙ્કુશચોદિતાઃ ॥

તાનિ દૃષ્ટ્વા હ્યનીકાનિ વિતતાનિ મહાત્મનામ્ ।
વૈરાટિમુત્તરં તં તુ પ્રત્યભાષત પાણ્ડવઃ ॥

જામ્બૂનદમયી વેદી ધ્વજાગ્રે યસ્ય દૃશ્યતે ।
શોણાશ્ચાશ્વા રથે યુક્તા દ્રોણ એષ પ્રકાશતે ॥

આચાર્યો નિપુણો ધીમાન્બ્રહ્મવિચ્છૂરસત્તમઃ ।
આહવે ચાપ્રતિદ્વન્દ્વો દૂરપાતી મહારથઃ ॥

સુપ્રસન્નો મહાવીરઃ કુરુષ્વૈનં પ્રદક્ષિણમ્ ।
અત્રૈવ ચાવિરોધેન એષ ધર્મઃ સનાતનઃ ॥

યદિ મે પ્રહરેદ્દ્રોણઃ શરીરે મે પ્રહૃષ્યતઃ ।
તતોઽસ્મિન્પ્રહરિષ્યામિ નાન્યથા બુદ્ધિરસ્તિ મે ॥

ભારતાચાર્યમુખ્યેન બ્રાહ્મણેન મહાત્મના ।
તેન મે યુધ્યમાનસ્ય મન્દં વાહય સારથે ॥

ધ્વજાગ્રે સિંહલાઙ્ગૂલો દિક્ષુ સર્વાસુ શોભતે ।
ભારતાચાર્યપુત્રસ્તુ સોઽશ્વત્થામા વિરાજતે ॥

ધ્વજાગ્રં દૃશ્યતે યત્ર બાલસૂર્યસમપ્રભમ્ . દુર્જયઃ સર્વસૈન્યાનાં દેવૈરપિ સવાસવૈઃ ।
તેન મે યુધ્યમાનસ્ય મન્દં વાહય સારથે ॥

ધ્વજાગ્રે ગોવૃષો યસ્ય કાઞ્ચનોઽભિવિરાજતે ।
આચાર્યવરમુખ્યસ્તુ કૃપ એષ મહારથઃ ॥

દ્રોણેન ચ સમો વીર્યે પિતુર્મે પરમઃ સખા ।
તેન મે યુધ્યમાનસ્ય મન્દં વાહય સારથે ॥

યસ્ય કાઞ્ચનકમ્બૂભિર્હસ્તિકક્ષ્યાપરિષ્કૃતઃ ।
ધ્વજઃ પ્રકાશતે દૂરાદ્રથે વિદ્યુદ્ગણોપમઃ ॥

એષ વૈકર્તનઃ કર્ણઃ પ્રતિમાનં ધનુષ્મતામ્ ।
દૃઢવૈરી સદાઽસ્માકં નિત્યં કટુકભાષણઃ ॥

યસ્યાશ્રયબલાદેવ ધાર્તરાષ્ટ્રઃ સસૌબલઃ ।
અસ્માન્નિરસ્ય રાજ્યાચ્ચ પુનરદ્યાપિ યોત્સ્યતિ ॥

એષ વૈ સ્પર્ધતે નિત્યં મયા સહ સુદુર્જયઃ ।
જામદગ્ન્યસ્ય રામસ્ય શિષ્યો હ્યેષ મહારથઃ ॥

સર્વાસ્ત્રકુશલઃ કર્ણઃ સર્વશસ્ત્રભૃતાંવરઃ ।
યુદ્ધેઽપ્રતિમવીર્યશ્ચ દૃઢવેધી પરાક્રમી ॥

અદ્યાહં યુદ્ધમેતેન કરિષ્યે સૂતબન્ધુના ।
દ્રષ્ટા ત્વમાવયોર્યુદ્ધં બલિવાસવયોરિવ ॥

મહારથેન શૂરેણ સૂતપુત્રેણ ધન્વિના ।
તેન મે યુધ્યમાનસ્ય શીઘ્રં વાહય સારથે ॥

યસ્ય ચૈવ રથોપસ્થે નાગો મણિમયો ધ્વજઃ ।
એષ દુર્યોધનસ્તત્ર કૌરવો યશસા વૃતઃ ॥

લબ્ધલક્ષો દૃઢં વેધી લઘુહસ્તઃ પ્રતાપવાન્ ।
તેન મે યુધ્યમાનસ્ય શીઘ્રં વાહય સારથે ॥

યસ્તુ શ્વેતાવદાતેન પઞ્ચતાલેન કેતુના ।
વૈડૂર્યમયદણ્ડેન તાલવૃક્ષેણ રાજતે ॥

હસ્તાવાપી બૃહદ્ધન્વા સેનાં તિષ્ઠતિ હર્ષયન્ ।
રામેણ જામદગ્ન્યેન દ્વૈરથેનાજિતઃ પુરા ॥

શીઘ્રશ્ચ લગુવેધી ચ લઘુહસ્તઃ પ્રતાપવાન્ ।
એષ શાન્તનવો ભીષ્મઃ સર્વેષાં નઃ પિતામહઃ ॥

કકુદઃ સર્વસૈન્યાનાં સર્વશસ્ત્રભૃતાંવરઃ . જયશ્રિયાઽવબદ્ધસ્તુ સુયોધનવશાનુગઃ ।
પશ્ચાદેષ પ્રયાતવ્યો ન મે વિઘ્નકરો ભવેત્ ॥

ઇત્યેતાંસ્ત્વરિતઃ પાર્થઃ કથયિત્વા તુ ચોત્તરે ।
રૂપતશ્ચિહ્નતશ્ચૈવ યુદ્ધાય ત્વરતે પુનઃ ॥