Mahabharata · Chapter 4.50

kṛpasya vacanaṃ śrutvā karṇo rājanyudhāmpatiḥ /
punaḥ provāca saṃrabdho garhayanbrāhmaṇaṃ kṛpam //
karṇa uvāca /

lakṣayāmyahamācāryaṃ bhayādbhaktiṃ gataṃ ripau /
bhītena hi na yoddhavyamahaṃ yotsye dhanañjayam // 2 //

nanu vāruṇamāgneyaṃ yāmyaṃ vāyavyameva ca /
astraṃ brahmaśiraścaiva satvahīnasya te vṛthā //

mitrakāryaṃ kṛtamidaṃ pitāputrairmahārathaiḥ /
bhartṛpiṇḍaśca nirviṣṭo yatheṣṭaṃ gantumarhatha //

bhikṣāṃ harasva nityaṃ tvaṃ yajñānanucarasva ca /
āmantraṇāni bhuṅkṣādya mā'smānyuddhena bhīṣaya //

bhārgavāstraṃ mayā muktaṃ nirdahetpṛthivīmimām /
kiṃ punaḥ pāṇḍuputrāṇāmekamarjunamāhave //

āgamiṣyanti padavīṃ mātsyāḥ pāṇḍavamāśritāḥ /
kīcakānāṃ tu balināṃ śatrusenāvamardinām //

tānahaṃ nihaniṣyāmi bhavatā gamyatāṃ gṛham /
kiṃ vedavādināṃ kāryaṃ parasnehānubhāṣiṇām //

tasya tadvacanaṃ śrutvā aśvatthāmā pratāpavān /
uvāca vadatāṃśreṣṭho duryodhanamavekṣya ca //

na ca tāvañjitā gāvo na ca sīmāntaraṃ gatāḥ /
na hāstinapuraṃ prāptāstvaṃ ca karṇa vikatthase //

bahūni dharmaśāstrāṇi paṭhanti dvijasattamāḥ /
teṣu kiṃsvididaṃ dṛṣṭaṃ dyūte jīyeta yannṛpaḥ //

sangrāmānvipulāñjitvā labdhā ca vipulaṃ dhanam /
vijitya ca mahīṃ kṛtsnāṃ neha katthanti paṇḍitāḥ //

pacatyagniravākyastu tūṣṇīṃ bhāti divākaraḥ /
tūṣṇīṃ dhārayate lokānvasudhā sacarācarān //

cāturvarṇyasya karmāṇi vihitāni maharṣibhiḥ /
dhanaṃ yairadhigantavyaṃ yacca kurvanna duṣyati //

adhītya brāhmaṇo vedānyājayeta yajeta vā /
kṣatriyo dhanamāhṛtya yajetaiva na yājayet //

vaiśyo'dhigamya vittāni vārtākarmāṇi kārayet //

śūdraḥ śuśrūṣaṇaṃ kuryātriṣu varṇeṣu nityaśaḥ /
vandanāyogavidhibhirvaitasīṃ vṛttimāśritaḥ //

vartamānā yathāśāstraṃ prāpya cāpi mahīmimām /
prakurvanti mahābhāgā yajñānsuvipulānapi //

kā jātisteṣu sūteyaṃ ke'pi mantrāḥ kriyāśca kāḥ /
keyaṃ varṇeṣu yā rājño vaktṛbhoktṛniyantṛṣu //
vaiśampāyana uvāca /

duryodhanamabhiprekṣya karṇaṃ ca kurusaṃsāda /
aśvatthāmā bhṛśaṃ kruddho duryodhanamatarjayat //

prāpya dyūtena ko rājyaṃ kṣatriyaḥ stoṣṭurmahati /
tathā nṛśaṃsarūpoyaṃ dhārtarāṣṭraśca nirghṛṇaḥ //

tathā'dhigamya vittāni ko vikatthedvicakṣaṇaḥ /
nikṛtyā vañcanāyogaiścaranvaitaṃsiko yathā //

katamaddvairathaṃ yuddhaṃ yatrājaiṣīrdhanañjayam /
nakulaṃ sahadevaṃ vā dhanaṃ yeṣāṃ tvayā hṛtam //

yudhiṣṭhiro jitaḥ kasminbhīmaśca balināṃvaraḥ /
indraprasthaṃ tvayā kasminsangrāme nirjitaṃ purā //

tathaiva katamadyuddhaṃ yasminkṛṣṇā jitā tvayā /
ekavastrā sabhāṃ nītā kṣudrakarmanrajasvalā //

mūlameṣāṃ mahatkṛttaṃ sārārthī candanaṃ yathā /
kṣudraṃ karma samāsthāya tatra kiṃ viduro'bravīt //

yathāśakti manuṣyāṇāmamarṣaṃ lakṣayāmahe /
anyeṣāmapi satvānāmapi kīṭapipīlikaiḥ //

draupadyāḥ samparikleśaṃ na kṣantuṃ pāṇḍavo'rhati /
kṣayāya dhārtarāṣṭrāṇāṃ prādurbhūto dhanañjayaḥ //

tvaṃ punaḥ paṇḍito bhūtvā hyācāryaṃ kṣeptumicchasi /
vairāntakaraṇo jiṣṇurna naḥ śeṣaṃ kariṣyati //

naiva devā na gandharvā nāsurā na ca rākṣasāḥ /
bhayādiha na yuddhyeranpāṇḍuputreṇa dhīmatā //

yaṃ yamekopi sankruddhaḥ sangrāme nipatiṣyati /
vṛkṣaṃ garuḍavadvegādvinihatyāntameṣyati //

tvatto viśiṣṭaṃ vīryeṇa dhanuṣyamararāṭsamam /
vāsudevasamaṃ yuddhe taṃ pārthaṃ ko na pūjayet //

devaṃ daivena yuddhyeta mānupeṇa ca mānupam /
astraṃ hyastreṇa yo hanyātko'rjunena samaḥ pumān //

putrādanavamaḥ śiṣya iti dharmavido viduḥ /
etenāpi nimittena priyo droṇasya pāṇḍavaḥ //

yathā tvamakarordyūtamindraprasthaṃ yathā'haraḥ /
yathā'naiṣīḥ sabhāṃ kṛṣṇāṃ tathā yudhyasva pāṇḍavaṃ //

ayaṃ te mātulaḥ prājñaḥ kṣatradharmasya kovidaḥ /
durdyūtadevī gāndhāraḥ śakuniryuddhyatāmiha //

nākṣānkṣipati gāṇḍīvaṃ na kṛtaṃ dvāparaṃ na ca /
jvalato niśitānbāṇāṃstāṃstānkṣipati gāṇḍivaṃ //

na hi gāṇḍīvanirmuktā gṛdhrapakṣāḥ sutejanāḥ /
nāntareṣvavatiṣṭhante girīṇāmapi dāraṇāḥ //

antakaḥ pavano mṛtyustathā'gnirbaḍavāmukhaḥ /
kuryurete kvaciccheṣaṃ na tu kruddho dhanañjayaḥ //

yathā sabhāyāṃ dyūtaṃ tvaṃ mātulena mahākaroḥ /
tathā yuddhasva sangrāme saubalena surakṣitaḥ //

yuddhyatāṃ kāmamācāryo nāhaṃ yotsye dhanañjayam /
matsyo hyasmābhirāyodhyo yadyāgacchedgavāmpadam //