Mahabharata · Chapter 4.46

bhāradvājastato droṇaḥ sarvaśastrabhṛtāṃvaraḥ /
rājānaṃ cāha samprekṣya duryodhanamarindamaḥ //

yathā rathasya nirghoṣo yathā śaṅkha udīryate /
kampate ca yathā bhūmirnaiṣonyaḥ savyasācinaḥ //

autpātikamidaṃ rājannimittaṃ bhavatīha naḥ /
na hi paśyāmi vijayaṃ sainye'smākaṃ parantapa //

śastrāṇi na prakāśante na prahṛṣyanti vāhanāḥ /
agnayaśca na bhāsante susamiddhā na śobhanāḥ //

pratyādityaṃ ca naḥ sarve mṛgā ghorā nadanti ca /
śakunāścāpasavyāśca vedayanti mahābhayam //

gomāyureṣa sainyānāṃ rudanmadhyena dhāvati /
cāṣā nadanti cākāśe vedayanto mahadbhayam //

bhavatāṃ caiva romāṇi prahṛṣṭānīva lakṣaye //

anuṣṇāṅgāśca saṃsvinnā jṛmbhante cāpyabhīkṣṇaśaḥ . viṣkambhanti ca mātaṅgā muñcantyaśrūṇi vājinaḥ /
sadā mūtraṃ purīṣaṃ ca utsṛjanti punaḥ punaḥ //

lohitārdrā ca pṛthivī diśaḥ sarvāḥ pradhūmitāḥ /
na ca sūryaḥ pratapati mahadvedayate bhayam //

hastinaścāpi vitrastā yodhāścāpi vitatrasuḥ /
parābhūtā ca vaḥ senā na kaścidyodbhumicchati //

viṣaṇṇamukhabhūyiṣṭhāḥ sarve yodhā vicetasaḥ /
diśaṃ te dakṣiṇāṃ sarve viprekṣante punaḥ punaḥ //

mṛgāśca pakṣiṇaścaiva savyameva patanti naḥ / vāditroddhṛṣṭaghoṣāśca na ca gāḍhaṃ svananti ca /
dhvajāgreṣu nilīyante vāyasāstanna śobhanam //

yathā meghasya ninado gambhīrastūrṇamāyataḥ /
śrūyate rathanirghoṣo nāyamanyo dhanañjayāt //

aśvānāṃ svanatāṃ śabdo vahatāṃ pākaśāsanim /
vānarasya rathe divyo nisvanaḥ śrūyate mahān //

śaṅkhaśabdena pārthasya karṇau me badhirīkṛtau /
sarvasainyaṃ ca vitrastaṃ nāyamanyo dhanañjayāt //

rājānamagrataḥ kṛtvā duryodhanamarindamam / gāḥ prasthāpya ca tiṣṭhāmo vyūḍhānīkāḥ prahāriṇaḥ /
pravibhajya tridhā senāṃ samucchritya dhvajānapi //

śitairbāṇaiḥ pratāpyemāṃ camūmeṣa dhanañjayaḥ /
mūrdhni sarvanarendrāṇāṃ vāmapādaṃ kariṣyati //

na hyeṣa śakyo bībhatsurjetuṃ devāsurairapi /
dikṣu gulmā niveśyantāṃ yattā yotsyāmahe'rjuna //