Mahabharata · Chapter 4.4

ityevamuktvā puruṣapravīrastathārjuno dharmāmṛtāṃ variṣṭhaḥ / vākyaṃ tathāsau // bhūyo nṛpo'paraṃ bhrātara // .babhāṣe

kinkarmā kiṃsamācāro nakuloyaṃ bhaviṣyati /
sukumāraśca śūraśca darśanīyaḥ sukhocitaḥ //

aduḥkhārhaśca bālaśca lālitaścāpi nityaśaḥ /
soyamārtaśca śāntaśca kiṃ nu rocayatāttviha //

kiṃ tvaṃ nakula kurvāṇastasya tāta cariṣyasi /
karma tattvaṃ samācakṣva rājye tasya mahīpateḥ //
nakula uvāca /

aśvādhyakṣo bhaviṣyāmi virāṭasyeti me matiḥ /
dāmagranthīti nāmnā'haṃ karmaitatsupriyaṃ mama //

dāmagnanthī parijñātaḥ kuśalo dāmakarmaṇi /
na māṃ paribhaviṣyanti janā jātviha karhicit //

kuśalotsmyaśvaśikṣāyāṃ tathaivāśvacikitsane /
priyāśca satataṃ me'śvāḥ kururājā yathā tava //

na māṃ paribhaviṣyanti kiśorā vaḍavāstathā /
na duṣṭāśca bhaviṣyanti pṛṣṭhe dhuri ca madgatāḥ //

drakṣyanti ye ca māṃ kecidvirāṭanagare janāḥ /
tebhya evaṃ pravakṣyāmi vihariṣyāmyahaṃ yathā //

pāṇḍavena hyahaṃ tāta aśveṣvadhikṛtaḥ purā / iti tasya pure channaścariṣyāmi mahīpate /
ityetadvaḥ pratijñātaṃ vihariṣyāmyahaṃ yathā //
vaiśampāyana uvāca /

nakulenaivamuktastu dharmarājo'bravīdvacaḥ /
bṛhaspatisamo buddhyā nayenośanasā samaḥ //

mantrairnānāvidhairnītaḥ pathyeṣu pariniṣṭhitaḥ /
supraṇītaḥ sumārgastho rājatantramavāpa yaḥ //

na cāsya skhalitaṃ kiñciddadṛśustadvido janāḥ /
sunītijñaśca śūraśca sarvamantraviśāradaḥ //

adhiko māturasmākaṃ kuntyāḥ priyatamaḥ sadā / sahadeva kathaṃ karma tasya rājñaḥ kariṣyasi /
kiṃ vā tvaṃ tāta kurvāṇaḥ pracchanno vicariṣyasi //
sahadeva uvāca /

gosaṅkhyātā bhaviṣyāmi virāṭasyeti rocaye / pratibhoktā ca dogdhā ca saṅkhyānakuśalo gavām /
tantrīpāleti me nāma svayaṃ proktaṃ bhaviṣyati //

ayogā bahulāḥ puṣṭāḥ kṣīravatyo bahuprajāḥ /
niṣpannasattvāḥ subhṛtā hyapetajvarakilviṣāḥ //

dṛṣṭacorabhayā nityaṃ vyādhivyāghravivarjitāḥ /
gāvaḥ susahitā rājannirudvignā nirāmayaḥ //

bhaviṣyanti mayā guptā virāṭanagare tadā /
nipuṇatvaṃ cariṣyāmi prītiratra parā hi me //

ahaṃ hi bhavatā goṣu prahitaḥ satata purā /
tatra me kauśalaṃ sarvamanubaddhaṃ viśāmpate //

lakṣaṇaṃ caritaṃ caiva gavāṃ yaccāpi maṅgalam /
satsarvaṃ me suviditamanyaccāpi viśāmpate //

vṛṣabhānapi jānāmi rājanpūjitalakṣaṇān /
yeṣāṃ mūtramupāghrāya api vandhyā prasūyate //

so'hamevaṃ cariṣyāmi prītiratra parā hi me /
virāṭanagare gūḍho raṃsye'haṃ tena karmaṇā //

toṣayiṣye ca rājānāṃ mā bhūccintā tavānagha . na ca māṃ vetsyati parastatte rocatu pārthiva /
ityetadvaḥ pratijñātaṃ vicariṣyāmyahaṃ yathā //
yudhiṣṭhira uvāca /

kenātra karmaṇā kṛṣṇā draupadī vicariṣyati /
na hi kiñcidvijānāti karma kartuṃ yathā striyaḥ //

mālyāgandhānalaṅkārānvastrāṇi vividhāni ca /
etānyevābhijānāti yathājātā ca bhāminī //

pativratā mahābhāgā kathaṃ nu vicariṣyati /
iyaṃ tu naḥ priyā bhāryā prāṇebhyopi garīyasī //

māteva paripālyā ca pūjyā jyeṣṭhā svaseva ca . sukumārī suśīlā ca rājaputrī yaśasvinī /
kathaṃ vatsyati kalyāṇī virāṭanagare satī //
draupadyuvāca /

ahaṃ vatsyāmi rājendra nirvṛto bhava pārthiva / yathā te matkṛte śoko na bhavennṛpate śṛṇu /
yathā tu māṃ na jānanti yatkariṣyāmyahaṃ prabho //

channā vatsyāmyahaṃ yanmāṃ na vijānanti kecana /
vṛttaṃ tacca samākhyāsye śarma testu viśāmpate //

sairandhrījātisampannā nāmnā'haṃ vratacāriṇī /
bhaviṣyāmi mahārāja virāṭasyeti me matiḥ //

sairandhryo rakṣitāḥ strīṇāṃ bhujiṣyāḥ santi bhārata /
ekapatnyaḥ striyaścaitā iti lokasya niścayaḥ //

sā'haṃ bruvāṇā sairandhrī kuśalā keśakarmaṇi /
pramadāharikā loke puruṣāṇāṃ pravāsinām //

yudhiṣṭhirasya vai gehe draupadyāḥ paricārikā / uṣitā'smīti vakṣyāmi pṛṣṭā rājñā ca bhārata /
ātmaguptā cariṣyāmi yanmāṃ tvaṃ paripṛcchasi //

nāhaṃ tatra bhaviṣyāmi durbharā rājaveśmani /
kṛtvā caiva sadā rakṣāṃ vratenaiva narādhipa //

sudeṣṇāṃ pratyupasthāsye rājabhāryāṃ yaśasvinīm /
sā rakṣiṣyati māṃ prāptāṃ mā te bhūdduḥkhamīdṛśam //

atha guptā cariṣyāmi yuṣmābhistatra tasthuṣī /
ityevaṃ vaḥ pratijñātaṃ vihariṣyāmyahaṃ yathā //
yudhiṣṭhira uvāca /

yathā no durhṛdaḥ pāpā bhavanti sukhinaḥ punaḥ /
kuryāstathā tvaṃ kalyāṇi lakṣayeyurna te janāḥ //

kalyāṇaṃ bhāṣase kṛṣṇe yathā kauleyakī tathā / na pāpamabhijānāsi sādhvī sādhuvrate sthitā //