Mahabharata · Chapter 4.3

evaṃ nirdiśya cātmānaṃ niśvasannuṣṇamārtijam /
vimuñcannaśru netrābhyāṃ bhīmasenamuvāca ha //

bhīmasena kathaṃ karma mātsyarāṣṭre kariṣyasi /
hatvā krodhavaśāṃstatra parvate gandhamādane //

yakṣānkrodhābhitāmrākṣānrākṣasāṃścāpi pauruṣāt /
prādāḥ pāñcālakanyāyai padmāni subahūnyapi //

bakaṃ rākṣasarājānaṃ bhīṣaṇaṃ puruṣādakam . jaghnivānasi kaunteya brāhmaṇārthamarindama /
kṣemā cābhayasaṃvītā saikacakrā tvayā kṛtā //

hiḍimbaṃ ca mahāvīryaṃ kirmīraṃ caiva rākṣasam /
tvayā hatvā mahābāho vanaṃ niṣkaṇṭakaṃ kṛtam //

āpadaṃ cāpi samprāptā draupadī cāruhāsinī /
jaṭāsuravadhaṃ kṛtvā vayaṃ ca parimokṣitāḥ //

matsyarājānntike tāta vīryapūrṇo'tyamarṣaṇaḥ / vṛkodara virāṭasya balīyāndurbalīyasaḥ /
samīpe nagare tasya vatsyase kena karmaṇā //
bhīma uvāca /

sūdo'haṃ valalo nāmnā sūpakāro narādhipa /
upasthāsyāmi rājānaṃ virāṭamiti rocaye //

rasānnānāvidhāṃścāpi svādūṃśca madhurāṃstathā /
sūpāṃścāpi kariṣyāmi kuśalosmi mahānase //

kṛtapūrvāṇi yānyasya vyañjanāni suśikṣitaiḥ /
tānyapyabhibhaviṣyāmi prītiṃ sañjanayannaham //

pūrvamaprāśitāṃstena kartā rasaguṇānvitān /
svādu vyañjanamāsvādya mātsyaḥ prīto bhaviṣyati //

āhariṣyāmi dārūṇāṃ pāṭitānāṃ śataṃśatam /
rājā karmāṇi me dṛṣṭvā na māṃ paribhaviṣyati //

ye ca tasya mahāmallāḥ samareṣvaparājitāḥ /
kṛtapratāpā bahuśo rājñaḥ pratyāyitā bale //

raṅgopajīvinaḥ sarve pareṣāṃ ca bhayāvahāḥ /
tānahaṃ nihaniṣyāmi ratiṃ rājñaḥ pravartayan //

na ca tānyudhyamāno'haṃ nayiṣye yamasādanam /
tathā tānnihaniṣyāmi jīviṣyanti yathā'turāḥ //

vṛṣo vā mahiṣo vāpi nāgo vā ṣāṣṭihāyanaḥ /
siṃho vyāghro grahītavyo bhaviṣyati na saṃśayaḥ //

tānsarvāndurgrahānanyairāśīviṣaviṣopamān /
balādahaṃ grahīṣyāmi matsyarājasya paśyataḥ //

ārālikā vā sūdā vā ye'sya yuktā mahānase /
tānahaṃ prīṇayiṣyāmiṃ manuṣyānstena karmaṇā //

ārāliko govikartā sūpakartā niyodhakaḥ /
āsaṃ yudhiṣṭhirasyāhamiti vakṣyāmi mānavān //

ātmānamātmanā rakṣaṃścariṣyāmi viśāmpate . ityevaṃ ca pratijñātaṃ vicariṣyāmyahaṃ yathā /
virāṭanagare cchanno virāṭasya samīpataḥ //
yudhiṣṭhira uvāca /

agnirbrāhmaṇarūpeṇa pracchanno'nnamayācata /
mahāśanaṃ brāhmaṇaṃ māṃ pramuñcārjuna khāṇḍave //

saṃśuśruve ca dharmātmā yastamarthaṃ cakāra ha / tasmai brāhmaṇarūpāya hutāśāya mahāyaśāḥ /
vijityaikarathenendraṃ hatvā pannagarākṣasān //

yastu devānmanuṣyāṃśca sarvānekaratho'jayat /
sa bhīmadhanvā śvetāśvaḥ pāṇḍavaḥ kiṃ kariṣyati //

āśīviṣasamasparśo nāgānāmiva vāsukiḥ /
dṛṣṭīviṣa ivāhīnāmagnistejasvināmiva //

samudra iva sindhūnāṃ śailānāṃ himavāniva /
mahendra iva devānāṃ dānavānāṃ baliryathā //

supratīko gajendrāṇāṃ yugyānāṃ turago yathā /
kubera iva yakṣāṇāṃ mṛgāṇāṃ kesarī yathā //

rākṣasānāṃ daśagrīvo daityānāmiva śambaraḥ /
rudrāṇāmiva kāpālī viṣṇurbalavatāmiva //

roṣāmarṣasamāyukto bhujaṅgānāṃ ca takṣakaḥ /
vāyuvegabaloddhṛto garuḍaḥ patatāmiva //

tapatāmiva cādityaḥ prajānāṃ brāhmaṇo yathā /
hradānāmiva pātālaṃ parjanyo nardatāmiva //

āyudhānāṃ varo vajraḥ kakudmāṃśca gavāṃ varaḥ /
dhṛtarāṣṭraśca nāgānāṃ hastiṣvairāvato yathā //

putraḥ priyāṇāmadhiko bhāryā ca suhṛdāṃ varā / girīṇāṃ pravaro merurdevānāṃ madhusūdanaḥ /
grahāṇāṃ pravaraścandraḥ sarasāṃ mānaso yathā //

yathaitāni viśiṣṭāni svasyāṃ jātyāṃ vṛkodara /
evaṃ yuvā guḍākeśaḥ śreṣṭhaḥ sarvadhanuṣmatām //

soyamindrādanavamo vāsudevācca bhārata . uṣitvā pañca varṣāṇi sahasrākṣasya veśmani /
brahmacārī vrate yuktaḥ sarvaśastrabhṛtāṃvaraḥ //

avāpa cāstramastrajñaḥ sarvajñaḥ sarvasammataḥ /
kṣipraṃ cāṇu vicitraṃ ca dhruvaṃ ca vadatāṃ varaḥ //

anujñātaḥ surendreṇa punaḥ pratyāgato mahīm /
dhārtarāṣṭravināśāya pāṇḍavānāṃ jayāya ca //

yaṃ manye dvādaśaṃ rudramādityānāṃ trayodaśam /
vasūnāṃ navamaṃ manye girīṇāmaṣṭamaḥ smṛtaḥ //

yasya dīrghau samau bāhū jyāghātena kiṇīkṛtau . dakṣiṇaścaiva savyaśca bāhū anaḍuho yathā /

talāṅgulitrābhyucitau nāgarājakaropamau /
pīnau parighasaṅkāśau mṛdutāmratalau śubhau //

śyāmo yuvā guḍākeśo darśanīyaśca pāṇḍavaḥ /
gāṇḍīvadhanvā śvetāśvaḥ kirīṭī vānaradhvajaḥ //

kiṃrūpadhārī kinkarmā kiñceṣṭaḥ kimparāyaṇaḥ / bībhatsurbhīmadhanvā ca kiṃ kariṣyati cārjunaḥ /
kuntīputro virāṭasya ramate kena karmaṇā //
arjuna uvāca /

imau kiṇīkṛtau bāhū jyāghātatalapīḍanāt /
nityaṃ kañcukasañchannau nānyathā goptumutsahe //

kiṃ tu kāryavaśādetadācariṣyāmi kutsitam //

bāhū me bharataśreṣṭha mahālāñchanalakṣitau /
jyāghātena mahāntau me gūhituṃ nānyathotsahe //

ubhau kambū pratīmucya kuṇḍale paripātuke /
veṇīkṛtaśirā bhūtvā bhaviṣyāmi bṛhannalā //

paṭhannākhyāyikāṃ nāma strībhāvena punaḥ punaḥ . prajānāṃ samudācāraṃ bahunarmakṛtaṃ vadan /
ramayiṣyāmi rājānamanyaṃ cāntaḥpure janam //

nṛttaṃ gītaṃ ca vāditraṃ divyaṃ ca vividhaṃ tathā /
śikṣayiṣyāmyahaṃ rājanvirāṭanagare striyaḥ //

strībhāvasamudācārānnṛttagītakathāśrayaiḥ /
chādayiṣyāmi rājendra māyayā'tmānamātmanā //

yudhiṣṭhirasya gehe'smindraupadyāḥ paricārikā /
uṣitā'smīti vakṣyāmi dharmarājasya sammatā //

urvaśyāścāpi śāpena prāptosmi nṛpa ṣaṇḍatām / śakraprasādānmukto'haṃ varṣādūrdhvaṃ trayodaśāt /
ityetanme pratijñātaṃ vicariṣyāmyahaṃ yathā //

etena vidhinā channaḥ kṛtakena yathā nalaḥ /
vihariṣyāmi rājendra virāṭasya pure sukham //
yudhiṣṭhira uvāca /

vāsudevasamo loke yaśasā vikrameṇa ca /
soyaṃ rājye virāṭasya bhavane bharatarṣabhaḥ //

meruḥ pracchādita iva vasanvajroṇa muṣṭinā /
ākhyātā ṣaṇḍakosmīti pratijñātaṃ hi pātakaṃ //