Mahabharata · Chapter 4.10

athāparasyāṃ diśi bhīmadarśano vṛkodaro'dṛśyata siṃhavikramaḥ /
asipraveke pratimucya śāṇite khajāṃ ca darvī ca kareṇa dhārayan // 1 //

tvacaṃ ca gocarmamayīṃ sumarditāṃ samukṣitāṃ pānakarāgaṣāḍavaiḥ /
kilāsamālambya kareṇa cāyasaṃ saśṛṅgiberārdrakabhūstṛṇāṅkuram // 2 //

gambhīrarūpaḥ parameṇa tejasā raviryathā lokamimaṃ prakāśayan /
sa kṛṣṇavāsā girirājasāravān sa matsyarājaṃ samupetya tasthivān // 3 //

sabhāgato vāraṇayūthapopamastamisrahā rātrimivāvabhāsayan /
sahasranetrāvarajāntakopamastrilokapālādhipatiryathā hariḥ // 4 //

tamāvrajantaṃ gajayūthapopamaṃ nirīkṣamāṇo navasūryavarcasam /
bhayātsamudvignavipaṇṇacetano diśaśca sarvāḥ prasamīkṣya cāsakṛt // 5 //

tamekavastraṃ parasainyavāraṇaṃ sabhā'vidūrānnṛpatirnṛpātmajam /
samīkṣya vaiklabyamupeyivāñśanairjanāśca bhītāḥ parisarpire bhṛśam // 6 //

athābravīnmātsyapatiḥ sabhāgatān bhṛśāturoṣṇaṃ pariniśvasanniva /
ko'yaṃ yuvā vāraṇarājasannibhaḥ sabhāmabhipraiti hi māmikāmimām // 7 //

ko vā vijānāti purā'sya darśanaṃ mṛgendraśārdūlagatiṃ hi māmakaḥ /
vyūḍhāntarāṃso mṛgarāḍivotkaṭo ya eṣa divyaḥ puruṣaḥ prakāśate // 8 //

rājaśriyā hyeṣa vibhāti rājavadvirocate rukmagiriprabhopamaḥ /
nākṣatriyo nūnamayaṃ bhaviṣyati sahasranetrapratimastathā hyasau // 9 //

rūpeṇa yaścāpratimo hyayaṃ mahānmahīmimāṃ śatraḥ ivābhipālayet /
nābhūmipo'yaṃ hi ratirmameti ca cyutaḥ samṛddhyā nabhasīva nāhuṣaḥ // 10 //
vaiśampāyana uvāca /

vitarkamāṇasya ca tasya pāṇḍavaḥ sabhāmatikramya vṛkodaro'bravīt /
jayeti rājānamabhipramodayansukhena sabhyaṃ ca sabhāgataṃ janam // 11 //

tato nṛpaṃ vākyamuvāca pāṇḍavo yathā'nupūrvyātkṛpayānvitottaram /
tvāṃ jīvituṃ śatruhannāgato'haṃ tvameva loke paramo hi saṃśrayaḥ // 12 //

narendra śūdrosmi caturthavarṇabhāggurūpadeśātparicārakarmakṛt / jānāmi sūpāṃśca rasāṃśca saṃskṛtānmāṃsānyapūpāṃśca pacāmi śobhanān /
rāgaprakārāśca bahūnphalāśrayānmahānase me na samosti sūpakṛt // 13 //
vaiśampāyana uvāca /

tamabravīnmatsyapatiḥ prahṛṣṭavatpriyaṃ pragalbhaṃ madhuraṃ vinītavat /
na śūdratāṃ kāñcana lakṣayāmi te kuberacandrendradivākaraprabha // 14 //

hutāśanāśīviṣatulyatejaso na karma te yogyamidaṃ mahānase /
na sūpakāro bhavituṃ tvamarhasi suparṇagandharvamahoragopama // 15 //

anīkakarṇāgradharo dhvajī rathī bhavādya me vāraṇavāhinīpatiḥ /
na nīcakarmā bhavituṃ tvamarhasi praśāsituṃ bhūmimimāṃ tvamarhasi // 16 //
bhīma uvāca /

caturthavarṇosmyahamugraśāsana na vai vṛṇe tvāmahamīdṛśaṃ padam /
jātyā'smi śūdro balaleti nāmnā jijīviṣustvadviṣayaṃ samāgataḥ // 17 //

yudhiṣṭhirasyāsmi mahānase purā babhūva sarvaprabhurannapānadaḥ /
athāpi māmutsṛjase mahīpate vrajāmyahaṃ yāvadito yathāgatam // 18 //

tvamannasaṃskāravidhau praśādhi māṃ bhavāmi te'haṃ naradeva sūpakṛt /
balena tulyaśca na vidyate mayā niyuddhaśīlosmi sadā hi pārthiva // 19 //

gajāṃśca siṃhāṃśca sameyivānahaṃ sadā kariṣyāmi tavānagha priyam /
na nīcakarmā tava mādṛśaḥ prabho balasya netā'pyabalo bhavediti // 20 //

svakarmatuṣṭāśca vayaṃ narādhipa praśādhi māṃ sūdapade yadīcchasi /
ye santi mallā balavīryasammatāstāneva yotsyāmi tavābhiharpayan // 21 //
vaiśampāyana uvāca /

tamevamukte vacane narādhipaḥ pratyabravīnmatsyapatiḥ prahṛṣṭavat /
sohaṃ na manye tava karma tatsamaṃ samudranemiṃ pṛthivīṃ tvamarhasi // 22 //

trilokapālo hi yathā virājase tathā'dya me viṣṇurivātirocase / yathā tu kāmastava tattathā kṛtaṃ mahānase me bhava me puraskṛtaḥ /
narāśca me tatra mayā sadā'rcitā bhavādya teṣāmadhipo mayā kṛtaḥ // 23 //

tathā sa bhīmo vihito mahānase virāṭarājasya babhūva vai priyaḥ /
uvāsa rājanna ca taṃ pṛthagjano bubodha tasyānucaraśca kaścana // 24 //