Mahabharata · Chapter 3.96

tato jagāma kauravya so'gastyo bhikṣituṃ vasu /
śrutarvāṇaṃ mahīpālaṃ yaṃ vedābhyadhikaṃ nṛpaiḥ //

sa viditvā tu nṛpatiḥ kumbhayonimupāgatam /
viṣayānte sahāmātyaḥ pratyagṛhṇātsusatkṛtam //

tasmai cārghyaṃ thānyāyamānīya pṛthivīpatiḥ /
prāñjaliḥ prayato bhūtvāpapracchāgamane'rthitām //
agastya uvāca /

vittārthinamanuprāptaṃ viddhi māṃ pṛthivīpate /
thāśaktyavihiṃsyānyānsaṃvibhāgaṃ prayaccha me //
lomaśa uvāca /

tata āyavyayau pūrṇo tasmai rājā nyavedayat /
ato vidvannupādatsva yadatravyatiricyate //

tata āyavyayau dṛṣṭvā samau samamatirdvijaḥ /
sarvathā prāṇināṃ pīḍāmupādānādamanyata //

sa śrutarvāṇamādāya bradhnaśvamagamattataḥ /
sa ca tau viṣayasyānte pratyagṛhṇādyathāvidhi //

tayorardhyaṃ ca pādyaṃ ca bradhnaśvaḥ pratyavedayat / anujñāpyaca papraccha prayojanamupakrame /
vada kāmaṃ muniśreṣṭha dhanyosmyāgamanena te //
agastya uvāca /

vittakāmāviha prāptau viddhyāvāṃ pṛthivīpate /
yathāśaktyavihiṃsyānyānsaṃvibhāgaṃ prayaccha nau //
lomaśa uvāca /

tata āyavyayau pūrṇau tābhyāṃ rājā nyavedayat /
ato jñātvā tu gṛhṇītaṃ yadatravyatiricyate //

tata āyavyayau dṛṣṭvāsamau samamatirdvijaḥ /
sarvathā prāṇināṃ pīḍāmupādānādamanyata //

paurukutsaṃ tato jagmustrasadasyuṃ mahādhanam /
agastyaśca śrutarvā ca bradhnaśvaśca mahīpatiḥ //

trasadasyustu tāndṛṣṭvā pratyagṛhṇādyathāvidhi /
abhigamya mahārāja viṣayānte mahāmanāḥ //

arcayitvā yathānyāyamaikṣvāko rājasattamaḥ /
samastāṃśca tato'pacchatprayojanamupakrame //
agastya uvāca /

vittakāmāniha prāptānviddhi naḥ pṛthivīpate /
yathāśaktyavīhiṃsyānyānsaṃvibhāgaṃ prayaccha naḥ //
lomaśa uvāca /

tata āyavyayau pūrṇau teṣāṃ rājā nyavedayat /
etajjñātvā hyupādaddhvaṃ yadatravyatiricyate //

tata āyavyayau dṛṣṭvāsamau samamatirdvijaḥ /
sarvathā prāṇināṃ pīḍāmupādānādamanyata //

tataḥ sarve sametyātha te nṛpāstaṃ mahāmunim /
idamūcurmahārāja samavekṣya parasparam //

ayaṃ vai dānavo brahmannilvalo vasumānbhuvi /
tamatikramya sarve'dyavayaṃ cārtāmahe vasu //
lomaśa uvāca /

teṣāṃ tadāsīducitamilvalasyaiva bhikṣaṇam /
tataste sahitā rājannilvalaṃ samupādravan //