Mahabharata · Chapter 3.92

na vai nirguṇamātmānaṃ manye devarṣisattama /
tathā'smi duḥkhasantapto yathā nānyo mahīpatiḥ //

parāṃśca nirguṇānmanye na ca dhramagatānapi /
te ca lomaśa loke'sminnṛdhyante ke na hetunā //
lomaśa uvāca /

nātra duḥkhaṃ tvayā rājankāryaṃ pārtha kathañcana /
yadadharmeṇa vardheyuradharmarucayo janāḥ //

vardhatyadharmeṇa narastato bhadrāṇi paśyati /
tataḥ sapatnāñjayati samūlastu vinaśyati //

yatra dharmeṇa vardhante rājāno rājasattama /
sarvānsapatnānvādhante rājyaṃ caiṣāṃ vivardhate //

mayā hi dṛṣṭā daiteyā dānavāśca mahīpate /
vardhamānā hyadharmeṇa kṣayaṃ copagatāḥ punaḥ //

purā devayuge caiva dṛṣṭaṃ sarvaṃ mayā vibho /
arocayansurā dharmaṃ dharmaṃ tatyajire'surāḥ //

tīrtāni devā viviśurnāviśanbhāratāsurāḥ /
tānadharmakṛto darpaḥ pūrvameva samāviśat //

darpānmānaḥ samabhavanmānātkrodho vyajāyata /
krodhādahīstato'lañjā vṛttaṃ teṣāṃ tato'naśat //

tānalajjāngataśrīkānhīnavṛttānvṛthāvratān /
kṣamā lakṣmīḥ svadharmaśca nacirātprajahustataḥ //

lakṣmīstu devānagamadalakṣmīrasurānnṛpa //

tānalakṣmīsamāviṣṭāndarpopahatacetasaḥ /
daiteyāndānavāṃścaiva kalirapyāviśattataḥ //

tānalakṣmīsamāviṣṭāndānavānkalināhatān /
darpābhibhūtānkaunteya kriyāhīnānacetasaḥ //
mānābhibhūtānacirādvināśaḥ samapadyata //

niryaśaskāstathā daityāḥ kṛtsnaśo vilayaṃ gatāḥ /
adharmarucayorājannalakṣmyā samadhiṣṭhitāḥ //

devāstu sāgarāṃścaiva saritaśca sarāṃsi ca /
abhyagacchandharmaśīlāḥ puṇyānyāvatanāni ca //

tapobhiḥ kratubhirdānairāśīrvādaiśca pāṇḍava /
prajahuḥ sarvapāpāni śreyaśca pratipedire //

evamādānavantaś nirādānāśca sarvaśaḥ /
tīrthānyagacchanvibudhāstenāpurbhūtimuttamām //

tathā tvamapi rājendra snātvā tīrtheṣu sānujaḥ /
punarvetsvasi tāṃ lakṣmīmeṣa panthāḥ sanātanaḥ //

yathaiva hi nṛgo rājā śivirauśīnaro yathā /
bhagīrayo vasumanā gayaḥ pūruḥ purūravāḥ //

caramāṇāstapo nityaṃsparśanādambhasaśca te /
tīrthāmigamanātpūtā darśanācca mahātmanām //

alabhanta yaśaḥ puṇyaṃ dhanāni ca viśāmpate /
tathā tvamapi rājendra labdhvā suvipulāṃ śriyam //

yathā cekṣvākurabhavatsaputrajanabāndhavaḥ /
mucukundo'tha māndhātā maruttaśca mahīpatiḥ //

kīrtiṃ puṇyāmavindanta yathā devāstapobalāt /
devarṣayaśca kārtsnyena tathā tvamapi vetsyasi //

dhārtarāṣṭrāstvadharmeṇa mohina ca vaśīkṛtāḥ / nacirādvai vinaṅkṣyanti daityā iva na saṃśayaḥ //