Mahabharata · Chapter 3.10

evametanmahāprājña yathā vadasi māṃ mune /
ahaṃ caiva vijānāmi sarve ceme narādhipāḥ //

bhavāṃśca manyate sādhu yatkurūṇāṃ sukhodayam /
tadeva viduro'pyāha bhīṣmo droṇaśca māṃ mune //

yaditvahamanugrāhyaḥ kauravyeṣu dayā yadi /
anvaśādhi durātmānaṃ putraṃ duryodhanaṃ mama //
vyāsa uvāca /

ayamāyāti vai rājanmaitreyo bhagavānṛṣiḥ /
anvīkṣya pāṇḍavānbhrātṛnihaivā'smaddidṛkṣayā //

eṣa duryodhanaṃ putraṃ tava rājanmahānṛṣiḥ /
anuśāstā yathānyāyaṃ śamāyāsya kulasya ca //

brūyādyadeṣa kauravya tatkāryamaviśaṅkayā /
akriyāyāṃ tu kāryasya putraṃ te śapsyate ruṣā //
vaiśampāyana uvāca /

evamuktvā yayau vyāso maitreyaḥ pratyadṛśyata /
pūjayā pratijagrāha saputrastaṃ narādhipaḥ //

kṛtvā'rdhyādyāḥ kriyāḥ sarvā viśrāntaṃ munisattamam praśrayeṇābravīdrājā dhṛtarāṣṭro'mbikāsutaḥ //

sukhenāgamanaṃ kaccidbhagavankurujāṅgale / kaccitkuśalino vīrā bhrātaraḥ pañca pāṇḍavāḥ /

samaye sthātumicchanti kaccicca bharatarṣabhāḥ /
kaccitkurūṇāṃ saubhrātramavyucchinnaṃ bhaviṣyati //
maitreya uvāca /

tīrthayātrāmanukrāmanprāpto'smi kurujāṅgalān /
yadṛcchayā dharmarājaṃ dṛṣṭvavānkāmyake vane //

taṃ jaṭājinasaṃvītaṃ tapovananivāsinam /
samājagmurmahātmānaṃ draṣṭuṃ munigaṇāḥ prabho //

tatrāśrauṣaṃ mahārāja putrāṇāṃ tava vigraham /
anayaṃ dyūtarūpeṇa mahābhayamupasthitam //

tato'haṃ tvāmanuprāptaḥ kauravāṇāmavekṣayā //
sadā hyabhyadhikaḥ snehaḥ prītiśca tvayi me prabho //

naitadaupayikaṃ rājaṃstvayi bhīṣme ca jīvati /
yadanyonyena te putrā virudhyante kathañcana //

meḍhībhūtaḥ svayaṃ rājannigrahe pragrahe bhavān /
kimarthamanayaṃ ghoramutpatantamupekṣase //

dasyūnāmiva yadvṛttaṃ sabhāyāṃ kurunandana /
tena na bhrājase rājaṃstāpasānāṃ samāgame //
vaiśampāyana uvāca /

tato vyāvṛtya rājānaṃ duryodhanamamarṣaṇam /
uvāca ślakṣṇayā vācā maitreyo bhagavānṛpiḥ //
maitreya uvāca /

duryodhana mahābāho nibodha vadatāṃ vara /
vacanaṃ me mahābhāga bruvato yaddhitaṃ tava //

mā druhaḥ pāṇḍavānrājankuruṣva hitamātmanaḥ /
pāṇḍavānāṃ kurūṇāṃ ca lokasya ca nararṣabha //

pāṇḍavānprāpya tānrātrau kirmīro nāma rākṣasaḥ /
avṛtya mārgaṃ raudrātmā tasthau girivācalaḥ //

taṃ bhīmaḥ samaraslāghī balena balināṃ varaḥ /
jaghāna paśumāreṇa vyāghraḥ kṣudramṛgaṃ yathā //

paśya digvijaye rājanyathā bhīmena pātitaḥ /
jarāsandho maheṣvāso nāgāyutabalo yudhi //

sambandhī vāsudevaśca śyālāḥ sarve ca pārṣatāḥ /
te hi sarve naravyāghrāḥ śūrā vikrāntayodhinaḥ //

sarve nāgāyutaprāṇā vajrasaṃhananā dṛḍhaḥ /
satyavratadharāḥ sarvesarve puruṣamāninaḥ //

hantāro devaśatrūṇāṃ rakṣasāṃ kāmarūpiṇām / hiḍimbabakamukhyānāṃ kirmīras ca rakṣasaḥ /
kastānyudhi samāsīta jarāmaraṇavānnaraḥ //

tasya te śama evāstu pāṇḍavairbharatarṣabha /
kuru me vacanaṃ rājanmā mṛtyuvaśamanvagāḥ //
vaiśampāyana uvāca /

evaṃ tu bruvatastasya maitreyasya viśāmpate /
ūruṃ karikarākāraṃ kareṇābhijaghāna taḥ //

duryodhanaḥ smitaṃ kṛtvā caraṇenollikhanmahīm /
nakiñciduktvā durmedhāstasthau kiñcidavāṅmukhaḥ //

tamaśuśrūṣamāṇaṃ tu vilikhantaṃ vasundharām /
dṛṣṭvā duryodhanaṃ rājanmaitreyaṃ kopa āviśat //

sa kopavaśamāpanno maitreyo munisattamaḥ /
vidhinā samprayuktaśca śāpāyāsya mano dadhe //

tataḥ sa vāryupaspṛśya kopasaṃraktalocanaḥ /
maitreyo dhārtarāṣṭraṃ tamaśapadduṣṭacetasam //

yasmāttvaṃ māmanādṛtya nemāṃ vācaṃ cikīrṣasi /
tasmādasyātimānasya sadyaḥ phalamavāpsyasi //

tvadabhidrohasaṃyuktaṃ yuddhamutpatsyate mahat /
yatra bhīmo gadāghātaistavoruṃ bhetsyate balī //

ityevamukte vacane dhṛtarāṣṭro mahīpatiḥ /
prasādayāmāsa muniṃ naitadevaṃ bhavediti //
maitreya uvāca /

śamaṃ yāsyati cetputrastava rājanyadā tadā /
śāyo na bhavitā tāta viparīte bhaviṣyati //
vaiśampāyana uvāca /

savilakṣastu rājendro duryodhanapitā tadā /
maitreyaṃ prāha kirmīraḥ kathaṃ bhīmena pātitaḥ //
maitreya uvāca /

nāhaṃ vakṣyāmyasūyā te na te śuśrūṣate sutaḥ /
eṣa te viduraḥ sarvamākhyāsyati gate mayi //
vaiśampāyana uvāca /

ityevamuktvā maitreyaḥ prātiṣṭhata yathāgatam / kirmīravadhasaṃvigno bhayaṃ duryodhano yayau //