Mahabharata · Chapter 3.76

sa māsamuṣya kaunteya bhīmamāmantrya naiṣadhaḥ /
purādalpaparīvāro jagāma niṣadhānprati //

rathenaikena śubhreṇa dantibhiḥ pariṣoḍaśai /
pañcāśadbhirhayaiścaiva ṣaṭśataiśca padātibhiḥ //

sa kampayanniva mahīṃ tvaramāṇo mahāpurīm /
praviveśātha saṃrabdhastarasaiva mahāmanāḥ //

tataḥ puṣkaramāsādya vīrasenasuto nalaḥ /
uvāca dīvyāva punarbahuvittaṃ mayā'rjitam //

damayantī ca yaccānyanmama kiñcana vidyate /
eṣa vai mama sannyāsastava rājyantu puṣkara //

punaḥ pravartatāṃ dyūtamiti me niścitā matiḥ /
ekapāṇena bhadraṃ te prāṇayośca paṇāvahe //

jitvā parasvamāhṛt rājyaṃvā yadi vā vasu /
pratipāṇaḥ pradātavyaḥ prāṇo hi paṇamucyate //

na cedvāñchasi taddyūtaṃ yuddhadyūtaṃ pravartatām /
dvairathenāstu vai śāntistava vā mama vā nṛpa //

vaṃśabhojyamidaṃ rājyamarthitavyaṃ yathā tathā /
yenakenāpyupāyena vṛddhānāmiti śāsanam //

dvayorekatare buddhiḥ kriyatāmadya puṣkara /
kaitavenākṣavatyāṃ vā yuddhe vā nāmyatāṃ dhanuḥ //

naiṣadhenaivamuktastu puṣkaraḥ prahasanniva /
dhruvamātmajayaṃ matvā pratyāha niṣadhādhipam //

diṣṭyā tvayā'rjitaṃ vittaṃ pratipāṇāya naiṣadha /
diṣṭyā ca duṣkṛtankarma damayantyāḥ kṣayaṃ gatam //

diṣṭyā vai prīse rājanmama lābhāya naiṣadha /
punardyūte ca te buddhirdiṣṭyā puruṣasattama //

dhanenānena vai bhaimī jitena samalankṛtā /
māmupasthāsyati vyaktaṃ divi śakramivāpsarāḥ //

nityaśo hi smarāmi tvāṃ pratīkṣe'pi ca naiṣadha /
devane ca mabha prītirbhavatyevāsuhṛdgaṇaiḥ //

jitvātvadya varārohāṃ damayantīmaninditām /
katakṛtyo bhaviṣyāmi sā hime nityaśo hṛdi //

śrutvā tu tas tā vāco bahvabaddhapralāpinaḥ /
iyeṣa sa śiraśchettuṃ khaṅgena kupito nalaḥ //

smayaṃstu roṣatāmrākṣastamuvāca nalo nṛpaḥ /
paṇāvaḥ kiṃ vyāharase jito na vyāhariṣyasi //

tataḥ prāvartata dyūtaṃ puṣkarasya nalasya ca /
ekapāṇena bhadraṃ te nalena sa parājitaḥ //

sa ratnakośanicayaiḥ prāṇena paṇitopi ca /
jitvā ca puṣkaraṃ rājā prahasannidamabravīt //

mama sarvamidaṃ rājyamavyagraṃ hatakaṇṭhakam / vaidarbhī na tvayā śakyā rājāpaśada vīkṣitam /
tasyāstvaṃ saparīvāro mūḍha dāsatvamāgataḥ //

na tvayā tatkṛtankarma yenāhaṃ vijitaḥ purā /
kalinā tatkṛtaṃ karma tvaṃ ca mūḍha na budhyase //

nāhaṃ parakṛtaṃ doṣaṃ tvayyādhāsye kathañcana /
yathāsukhaṃ vai jīvatvamprāṇānavasṛjāmi te //

tathaiva sarvasambhāraṃ svamaṃśaṃ vitarāmi te /
tathaiva ca mama prītistvayi vīra na saṃśayaḥ //

sauhārdaṃ cāpi me tvatto na kadācitprahāsyati /
puṣkara tvaṃ hi me bhrātā sañjīva śaradaḥ śatam //

evaṃ nalaḥ sāntvayitvā bhrātaraṃ satyavikramaḥ /
vacanaistoṣayāmāsa pariṣvajya punaḥ punaḥ //

sāntvito naiṣadhenaivaṃ puṣraraḥ pratyuvāca tam /
puṇyaślokaṃ tadā rājannabhivādya kṛtāñjaliḥ //

kīrtirastu tavākṣayyā jīva varṣāyutaṃ sukhī /
yo me vitarasi prāṇānadhiṣṭhānaṃ ca pārthiva //

sa tathā satkṛto rājñā māsamuṣya tadā nṛpaḥ /
prayayau puṣaro hṛṣṭaḥ svapuraṃ svajanāvṛtaḥ //

mahatyā senayā sārdhaṃvinītaiḥ paricārakaiḥ /
bhrājamāna ivādityo vapuṣā puruṣarṣabha //

prasthāpya puṣkaraṃ rājā vittavantamanāmayam /
praviveśa puraṃ śrīmānatyarthamupaśobhitām //

praviśya sāntvayāmāsa paurāṃśca niṣadhādhipaḥ /
hiteṣu caiṣāṃ satataṃ pitevāvahito'bhavat //

paurā jānapadāścāpi samprahṛṣṭatanūruhāḥ /
ūcuḥ prāñjalayaḥ sarve sāmātyapramukhā janāḥ //

adyasma nirvṛtā rājanpure janapade'pi ca /
upāsituṃ punaḥ prāptā devā iva śatakratum //