Mahabharata · Chapter 3.6

gate tu vidure rājannāśramaṃ pāṇḍavānprati /
dhṛtarāṣṭro mahāprājñaḥ paryatapyata durmanāḥ //

[vidurasya prabhāvaṃ ca sandhivigrahakāritam / vivṛddhiṃ ca parāṃ matvā pāṇḍavānāṃ bhaviṣyati // ]

sa sabhādvāramāgamya vidurasmāramohitaḥ /
samakṣaṃ pārthivenadrāṇāṃ visañjñaḥ prāpatadbhuvi //

sa tu labdhvā cirātsañjñāṃ samutthāya mahītalāt /
samīpopasthitaṃ rājā sañjayaṃ vākyamabravīt //

bhrātā mama suhṛccaiva sākṣāddharma ivāparaḥ /
tasya smṛtyā'dya subhṛśaṃ hṛdayaṃ dīryatīvame //

tamānaya svadharmajñaṃ mama bhrātaramāśu vai /
iti bruvansa nṛpatiḥ kṛpaṇaṃ paryadevayat //

paścāttāpābhisantapto vidurasmāramohitaḥ /
bhrātṛśnehādidaṃ rājā sañjayaṃ vākyamabravīt //

gaccha sañjaya jānīhi bhrātaraṃ viduraṃ mama /
yadi jīvati roṣeṇa mayā pāpena nirdhutaḥ //

na hi tena mama bhrātrā susūkṣmamapi kiñcana /
vyalīkaṃ kṛtapūrvaṃ vai prājñenāmitabuddhinā //

sa vyalīkaṃ kathaṃ prāpto mattaḥ paramabuddhimān /
na jahmājjīvitaṃ prājña taṃ gacchānaya sañjaya //

tasya tadvacanaṃ śrutvā rājñastamanumānya ca / sañjayo bāḍhamityuktvā prādravatkāmyakaṃ prati

so'cireṇa samāsādya tadvanaṃ yatra pāṇḍavāḥ /
rauravājinasaṃvītaṃ dadarśātha yudhiṣṭhiram //

vidureṇa sahāsīnaṃ brāhmaṇaiśca sahasraśaḥ /
bhrātṛbhiścābhisanguptaṃ devairiva purandaram //

yudhiṣṭhiramupāgamya pūjayāmāsa sañjayaḥ /
bhīmārjunayamāścāpi tadyuktaṃ pratipedire //

rājñā pṛṣṭaḥ sa kuśalaṃ sukhāsīnaśca sañjayaḥ /
śaśaṃsāgamane hetumidaṃ caivābravīdvacaḥ //
sañjaya uvāca /

rājā smarati te kṣattardhṛtarāṣṭro'mbikāsutaḥ /
taṃ paśya gatvā tvaṃ kṣipraṃ sañjīvaya ca pārthivam //

so'numānya naraśreṣṭhānpāṇḍavānkurunandanān /
niyogādrājasiṃhasya gantumarhasi sattam //

evamuktastu viduro dhīmānsvajanavatsalaḥ /
yudhiṣṭhirasyānumate punarāyādgajāhvayam //

tamabravīnmahātejā dhṛtarāṣṭro'mbikāsutaḥ /
diṣṭyā prāptosi dharmajña diṣṭyā smarasi me'nagha //

adya cāhaṃ divārātrau tvatkṛte bharatarṣabha /
prajāgare prapaśyāmi vicitraṃ dehamātmanaḥ //
vaiśampāyana uvāca /

soṅkamānīya viduraṃ mūrdhanyāghrāya caiva ha /
kṣamyatāmiti covācayaduktosi mayā'nagha //
vidura uvāca /

kṣāntameva mayā rājangururme paramo bhavān /
tathā'hamāgataḥ śīghraṃ tvaddarśanaparāyaṇaḥ //

bhavanti hi naravyāghra puruṣā dharmacetanāḥ /
dīnānukampino rājannātra kāryā vicāraṇā //

pāṇḍoḥ putrā yādṛśāste tādṛśā me sutāstava /
dīnā itīva me buddhirabhipannā'dya tānprati //
vaiśampāyana uvāca /

anyonyamanunīyaivaṃ bhrātarau dvau mahādyutī / viduro dhṛtarāṣṭraśca lebhāte paramāṃ mudam //