મહાભારત · અધ્યાય 3.7

શ્રુત્વા ચ વિદુરં પ્રાપ્તં રાજ્ઞા ચ પરિસાન્ત્વિતમ્ ।
ધૃતારાષ્ટ્રાત્મજો રાજા પર્યતપ્યત દુર્મતિઃ ॥

સ સૌબલેયમાનાય્ય કર્ણદુઃશાસનૌ તથા ।
અબ્રવીદ્વચનં રાજા પ્રવિશ્યાબુદ્ધિજં તમઃ ॥

એષ પ્રત્યાગતો મન્ત્રી ધૃતરાષ્ટ્રસ્ય સમ્મતઃ ।
વિદુરઃ પાણ્ડુપુત્રાણાં સુહૃદ્વિદ્વાન્હિતે રતઃ ॥

યાવદસ્ય પુનર્બુદ્ધિં વિદુરો નાપકર્ષતિ ।
પાણ્ડવાનયને તાવન્મન્ત્રયધ્વં હિતં મમ ॥

અથ પશ્યામ્યહં પાર્થાન્પ્રાપ્તાનિહ કથઞ્ચન ।
પુનઃ શોષં ગમિષ્યામિ નિરસુર્નિષ્પરિગ્રહઃ ॥

વિષમુદ્બન્ધનં ચૈવ શસ્ત્રમગ્નિપ્રવેશનમ્ ।
કરિષ્યે ન હિ તાનૃદ્ધાન્પુનર્દ્રષ્ટુમિહોત્સહે ॥
સુકુનિરુવાચ ।

કિં બાલિશમતિં રાજન્નાસ્થિતોસિ વિશામ્પતે ।
ગતાસ્તે સમયં કૃત્વા નૈતદેવં ભવિષ્યતિ ॥

સત્યવાક્યેઃ સ્વિતાઃ સર્વે પાણ્ડવા ભરતષભ ।
પિતુસ્તે વચનં તાત ન ગ્રહીષ્યન્તિ કર્હિચિતિ ॥

અથવા તે ગ્રહીષ્યન્તિ પુનરેષ્યન્તિ વા પુરમ્ ।
નિરસ્ય સમયં સર્વે પણોઽસ્માકં ભવિષ્યતિ ॥

સર્વે ભવામો મધ્યસ્થા રાજ્ઞશ્છન્દાનુવર્તિનઃ । છિદ્રં બહુ પ્રપશ્યન્તઃ પાણ્ડવાનાં સુસંવૃતાઃ ।
દુઃશાસન ઉવાચ ।

એવમેતન્મહાપ્રાજ્ઞ યથા વદસિ માતુલ ।
નિત્યં હિ મે કથયતસ્તવ બુદ્ધિર્વિરોચતે ॥
કર્ણ ઉવાચ ।

કામમીક્ષામહે સર્વે દુર્યોધન તવેપ્સિતમ્ ।
ઐકમત્યં હિ નો રાજન્સર્વેષામેવ લક્ષયે ॥

[નાગમિષ્યન્તિ તે ધીરા અકૃત્વા કાલસંવિદમ્ । આગમિષ્યન્તિ ચેન્મોહાત્પુનર્દ્યૂતેન તાઞ્જય ॥ ]
વૈશમ્પાયન ઉવાચ ।

એવમુક્તસ્તુ કર્ણેન રાજા દુર્યોધનસ્તદા ।
નાતિહૃષ્ટમનાઃ ક્ષિપ્રમભવત્સ પરાઙ્મુખઃ ॥

ઉપલભ્ય તતઃ કર્ણો વિવૃત્ય નયને શુભે ।
રોષાદ્દુઃશાસનં ચૈવ સૌબલં ચ તમેવ ચ ॥

ઉવાચ પરમક્રુદ્ધ ઉદ્યમ્યાત્માનમાત્મના ।
અથો મમ મતં યત્તુ તન્નિબોધત ભૂમિપાઃ ॥

પ્રિયં સર્વે કરિષ્યામો રાજ્ઞઃ કિં કરવામહે ।
ન ચાસ્ય શક્નુમઃ સ્થાતું પ્રિયે સર્વે હ્યતન્દ્રિતાઃ ॥

વયં તુ શસ્ત્રાણ્યાદાય રથાનાસ્થાય દંશિતાઃ ।
ગચ્છામઃ સહિતા હન્તું પાણ્ડવાન્વનગોચરાન્ ॥

તેષુ સર્વેષુ શાન્તેષુ ગતેષ્વવિદિતાં ગતિમ્ ।
નિર્વિવાદા ભવિષ્યન્તિ ધાર્તરાષ્ટ્રાસ્તથા વયમ્ ॥

યાવદેવ પરિદ્યૂના યાવચ્છોકપરાયણાઃ ।
યાવન્મિત્રવિહીનાશ્ચ તાવદ્ગચ્છામ માચિરમ્ ॥

તસ્યતદ્વચનં શ્રુત્વા પૂજયન્તઃ પુનઃ પુનઃ ।
પ્રહૃષ્ટમનસઃ સર્વે પ્રત્યૂચુઃ સૂતજં તદા ॥

એવમુક્ત્વા સુસંરબ્ધા રથૈઃ સર્વે પૃથક્પૃથક્ ।
નિર્યયુઃ પાણ્ડવાન્હન્તું સહિતાઃ કૃતનિશ્ચયાઃ ॥

તાન્પ્રસ્થિતાન્પરિજ્ઞાય કૃષ્ણદ્વૈપાયનઃ પ્રભુઃ ।
આજગામ વિશુદ્ધાત્મા દૃષ્ટ્વા દિવ્યેન ચક્ષુષા ॥

પ્રતિષિધ્યાથ તાન્સર્વાન્ભગવાઁલ્લોકપૂજિતઃ । પ્રજ્ઞાચક્ષુષમાસીનમુવાચાભ્યેત્ય સત્વરમ્ ॥