Mahabharata · Chapter 3.66

vidarbharājo dharmātmā bhīmo bhīmaparākramaḥ /
suteyaṃ tasya kalyāṇī damayantīti viśrutā //

rājā tu naiṣadho nāma vīrasenasuto nalaḥ /
bhāryeyaṃ tasya kalyāṇī puṇyaślokasya dhīmataḥ //

sa dyūtena jito bhrātrā hṛtarājyo mahāmanāḥ /
damayantyā gataḥ sārdhaṃ na prājñāyata kasyacit //

te vayaṃ damayantyarthe carāmaḥ pṛthivīmimām /
seyamāsāditā bālā tava devi niveśane //

asyā rūpeṇa sadṛśī mānuṣī na hi vidyate /
asyā hyeṣa bhruvormadhye sahajaḥ pipluruttamaḥ //

śyāmāyāḥ padmasankāśo lakṣito'ntarhito mayā /
malena saṃvṛtohyasyāśchanno'bhreṇeva candramāḥ //

cihnabhūto vibhūtyarthamayaṃ dhātrā vinirmitaḥ /
pratipatkaluṣevendorlekhā nātivirājate //

na cāsyā naśyate rūpaṃ vapurmalasamācitam /
asaṃskṛtamapi vyaktaṃ bhāti kāñcanasannibham //

anena vapuṣā bālā piplunā'nena sūcitā /
lakṣiteyaṃ mayā devī pihito'gnirivoṣmaṇā //
bṛhadaśva uvāca /

tacchrutvā vacanaṃ tasya sudevasya viśāmpate /
sunandā śodhayāmāsa piplupracchādanaṃ malam //

sa malenāpakṛṣṭana piplustasyā vyarocata /
damayantyā yathā vyabhre nabhasīva niśākaraḥ //

pipluṃ dṛṣṭvā sunandā ca rājamātā ca bhārata /
rudantyau tāṃ pariṣvajyamuhūrtamiva tasthatuḥ //

utsṛjya bāṣpaṃ śanakai rājamātedamabravīt /
bhaginyā duhitā me'si piplunānena sūcitā //

ahaṃ ca tava mātā ca rājanyasya mahātmanaḥ /
sute daśārṇādhipateḥ sudāmnaścārudarśane //

bhīmasya rājñaḥ sā dattā vīrabāhorahaṃ punaḥ /
tvaṃ tu jātā mayā dṛṣṭā daśārṇeṣu piturgṛhe //

yathaiva te piturgehaṃ tathedamapi bhāmiti /
yathaiva ca mamaiśvaryaṃ damayanti tathā tava //

tāṃ prahṛṣṭena manasā damayantī viśāmpate /
praṇamya māturbhaginīmidaṃ vacanamabravīt //

ajñāyamānā'pisatī sukhamasmyuṣitā tvayi /
sarvakāmaiḥ suvihitā rakṣyamāṇā sadā tvayā //

sukhātsukhataro vāso bhaviṣyati na saṃśayaḥ /
ciraviproṣitāṃ mātarmāmanujñātumarhasi //

dārakau ca hi me nītau vasatastatra bālakau /
pitrā vihīnau śokārtau mayā caiva kathaṃ nu tau //

yadi cāpi priyaṃ kiñcinmayi kartumihecchasi /
vidarbhānyātumicchāmi śīghraṃ me yānamādiśa //

bāḍhamityeva tāmuktvā hṛṣṭvā mātṛṣvasā nṛpa /
guptāṃ balena mahatā putrasyānumate tataḥ //

prāsthāpayadrājamātā śrīmatīṃ naravāhinā /
yānena bharataśreṣṭha svannapānaparicchadām //

tataḥ sā nacirādeva vidarbhānagamacchubhā /
tāṃ tu bandhujanaḥ sarvaḥ prahṛṣṭaḥ samapūjayat //

sarvānkuśalino dṛṣṭvā bāndhavāndārakau ca tau /
mātaraṃ pitaraṃ cobhau sarvaṃ caiva sakhījanam //

devatāḥ pūjayāmāsa brāhmaṇāṃśca yaśasvinī /
pareṇa vidhinā devī damayantī viśāmpate //

atarpayatsudevaṃ ca gosahasreṇa pārthivaḥ /
prīto dṛṣṭvaiva tanayāṃ grāmeṇa draviṇena ca //

sā vyuṣṭā rajanīṃ tatrapiturveśmani bhāminī / viśrāntā mātaraṃ rājannidaṃ vacanamabravīt //