મહાભારત · અધ્યાય 3.55

વૃતે તુ નૈષધે ભૈમ્યા લોકપાલા મહૌજસઃ ।
યાન્તો દદૃશુરાયાન્તં દ્વાપરં કલિના સહ ॥

અથાબ્રવીત્કલિં શક્રઃ સમ્પ્રેક્ષ્ય બલવૃત્રહા ।
દ્વાપરેણ સહાયેન કલે બ્રૂહિ ક્વ યાસ્યસિ ॥

તતોઽબ્રવીત્કલિઃ શક્રં દમયન્ત્યાઃ સ્વયંવરમ્ ।
ગત્વા હિ વરયિષ્યે તાં મનો હિ મમ તાં ગતમ્ ॥

તમબ્રવીત્પ્રહસ્યેન્દ્રો નિર્વૃત્તઃ સ સ્વયંવરઃ ।
વૃતસ્તયા નલો રાજા પતિરસ્મત્સમીપતઃ ॥

એવમુક્તસ્તુ શક્રેણ કલિઃ કોપસમન્વિતઃ ।
દેવાનામન્ત્ર્ય તાન્સર્વાનુવાચેદં વચસ્તદા ॥

દેવાનાં માનુષં મધ્યે યત્સા પતિમવિન્દત ।
નનુ તસ્યા ભવેન્ન્યાય્યં વિપુલં દણ્ડધારણમ્ ॥

એવમુક્તે તુ કલિના પ્રત્યૂચુસ્તે દિવૌકસઃ ।
અસ્માભિઃ સભનુજ્ઞાતે દમયન્ત્યા નલો વૃતઃ ॥

કા હિ સર્વગુણોપેતં નાશ્રયેત નલં નૃપમ્ ।
યો વેદ ધર્માનખિલાન્યથાવચ્ચરિતવ્રતઃ ॥

યોઽધીતે ચતુરો વેદાન્સર્વાનાખ્યાનપઞ્ચમાન્ ।
અહિંસાનિરતો યશ્ચ સત્યવાદી દૃઢવ્રતઃ ॥

યસ્મિન્દાક્ષ્યં ધૃતિર્જ્ઞાનં તપઃ શૌચં દમઃ શમઃ ।
ધ્રુવાણિ પુરુષવ્યાઘ્રે લોકપાલસમે નૃપે ॥

એવંરૂપં નલં યો વૈ કામયેચ્છપિતું કલે ।
આત્માનં સ શપેન્મૂઢો હન્યાદાત્માનમાત્મના ॥

એવન્ગુણં નલં યો વૈ કામયેચ્છપિતું કલે ।
કૃચ્છ્રે સ નરકે મઞ્જેદગાધે વિપુલે હ્રદે ॥

એવમુક્ત્વા કલિં દેવા દ્વાપરં ચ દિવં યયુઃ ।
તતો ગતેષુ દેવેષુ કલિર્દ્વાપરમબ્રવીત્ ॥

સંયન્તું નોત્સહે કોપં નલે વત્સ્યામિ દ્વાપર ।
ભ્રંશયિષ્યામિ તં રાજ્યાન્ન ભૈમ્યા સહ રંસ્યતે ॥

ત્વમપ્યક્ષાન્સમાવિશ્ય સાહાય્યં કર્તુમર્હસિ । મમ પ્રિયકૃતે હ્યસ્મન્કૃતવાંશ્ચ ભવિષ્યસિ ॥