Mahabharata · Chapter 3.51

damayantī tu tacchrutvā vaco haṃsasya bhārata /
tadā prabhṛti na svasthā nalaṃ prati babhūva sā //

tataścintāparā dīnā vivarṇavadanā kṛśā /
babhūvadamayantī tu niḥśvāsaparamā tadā //

ūrdhvadṛṣṭirdhyānaparā babhūvonmattadarśanā /
pāṇḍuvarṇā kṣaṇenātha hṛcchayāviṣṭacetanā //

na śayyāsanabhogeṣu ratiṃ vindati karhicit /
na naktaṃ na divā śete hāheti rudatī muhuḥ //

tāmasvasthāṃ tadākārāṃ sakhyastā jajñiriṅgitaiḥ //

tato vidarbhapataye damayantyāḥ sakhījanaḥ /
nyavedayattāmasvasthāṃ damayantīṃ nareśvaraḥ //

tacchrutvā nṛpatirbhīmo damayantīsakhīgaṇāt /
kimarthaṃ duhitā me'dyanātisvastheva lakṣyate //

sa samīkṣya mahīpālaḥ svāṃ sutāṃ prāptayauvanām /
apaśyadātmanā kāryaṃ damayantyāḥ svayaṃvaram //

sa sannipātayāmāsa mahīpālānviśāmpatiḥ /
eṣo'nubhūyatāṃ cīrāḥ svayaṃvara iti prabho //

śrutvā tu pārthivāḥ sarve damayantyāḥ svayaṃvaram /
abhijagmustato vīrā rājāno bhīmaśāsanāt //

hastyaśvarathaghoṣeṇa nādayanto vasundharām /
vicitramālyābharaṇairbalairdṛśyaiḥ svalankṛtaiḥ //

teṣāṃ bhīmo mahābāhuḥ pārthivānāṃ mahātmanām /
yathārhamakarotpūjāṃ te'vasaṃstatra pūjitāḥ //

etasminneva kāle tu surāṇāmṛṣisattamau /
aṭamānau mahātmānāvindralokamito gatau //

nāradaḥ parvataścaiva mahāprājñau mahāvratau /
devarājas bhavanaṃ viviśāte supūjitau //

tāvarcayitvā maghavā tataḥ kuśalamavyayam /
papracchānāmayaṃ cāpi tayoḥ sarvagataṃ vibhuḥ //
nārada uvāca /

āvayoḥ kaśalaṃ deva sarvatragatamīśvara /
loke ca maghavankṛtsne nṛpāḥ kuśalino vibho //
bṛhadaśva uvāca /

nāradasya vacaḥ śrutvā papraccha balavṛtrahā /
dharmajñāḥ pṛthivīpālāstyaktajīvitayodhinaḥ //

śastreṇa nidhanaṃ kāle ye gacchantyaparāḍyukhāḥ /
ayaṃ loko'kṣayasteṣāṃ yathaiva mama kāmadhuk //

kvanu te kṣatriyāḥ śūrā nahi paśyāmi tānaham /
āgacchato mahīpālāndayitāmanithīnmama //

evamuktastu śakreṇa nāradaḥ pratyabhāṣata /
śṛṇu me maghavanyena na dṛśyante mahīkṣitaḥ //

vidarbharājño duhitā damayantīti viśrutā /
rūpeṇa samatikrāntā pṛthivyāṃ sarvayoṣitaḥ //

tasyāḥ svayaṃvaraḥ śakra bhavitā nacirādiva /
tatra gacchanti rājāno rājaputrāśca sarvaśaḥ //

tāṃ ratnabhūtāṃ lokasya prārthayanto mahīkṣitaḥ /
kāṅkṣanti sma viśeṣeṇa balavṛtraniṣūdana //

etasminkathyamāne tu lokapālāśca sāgnikāḥ /
ājagmurdevarājasya samīpamamarottamāḥ //

tataste śuśruvuḥ sarve nāradasya vaco mahat /
śrutvaiva cābruvanhṛṣṭā gacchāmo vayamapyuta //

tataḥ sarve mahārāja sagaṇāḥ sahavāhanāḥ /
vidarbhānabhijagmuste yataḥ sarve mahīkṣitaḥ //

nalopi rājā kaunteya śrutvā rājñāṃ samāgamam /
abhyagacchadadīnātmā damayantīmanuvrataḥ //

atha devāḥ pathi nalaṃ dadṛśurbhūtale stitam /
sākṣādiva sthitaṃ mūrtyā manmathaṃ rūpasampadā //

taṃ dṛṣṭvā lokapālāste bhrājamānaṃ yathā ravim /
tasthurvigatasankalpā vismitā rūpasampadā //

tato'ntarikṣe viṣṭabhya vimānāni divaukasaḥ /
abruvannaiṣadhaṃ rājannavatīrya nabhastalāt //

bhobho niṣadharājendra nala satyavrato bhavāt / asmākaṃ kuru sāhāyyaṃ dūto bhava narottama //