Mahabharata · Chapter 3.46

atyadbhutamidaṃ karma pārthasyāmitatejasaḥ /
dhṛtarāṣṭro mahātejāḥ śrutvā tatra kimabravīt //
vaiśampāyana uvāca /

śakralokagataṃ pārthaṃ śrutvā rājā'mbikāsutaḥ /
dvaipāyanādṛṣiśreṣṭhātsañjayaṃ vākyamabravīt //

śrutaṃ me sūta kārtsnyena karma pārthas dhīmataḥ /
kaccittavāpi viditaṃ yāthātathyena sārathe //

pramatto grāmyadharmeṣu mandātmā pāpaniścayaḥ /
mama putraḥ sudurbuddhiḥ pṛthivīṃ ghātayiṣyati //

yasya nityamṛtā vācaḥ svaireṣvapi mahātmanaḥ /
trailokyamapi tasya syādyoddhā yasya dhanañjayaḥ //

asyataḥ karṇinārācāṃstīkṣṇāgrāṃśca śilāśitān /
nārjunasyāgratastiṣṭhedapi mṛtyurjarātigaḥ //

mama putrā durātmānaḥ sarve mṛtyuvaśangatāḥ /
yeṣāṃ yuddhaṃ durādharṣaiḥ pāṇḍavaiḥ samupasthitam //

tasyaiva ca na paśyāmi yudhi gāṇḍīvadhanvanaḥ /
aniśaṃ cintayāno'pi ya enamudiyādyudhi //

droṇakarṇau pratīyātāṃ yadi bhīṣmo'pi vā raṇe /
mahānsyātsaṃśayoloke na tu paśyāmi no jayam //

ghṛṇī karṇaḥ pramādī ca ācāryaḥ sthaviro guruḥ /
amarṣī balavānpārthaḥ saṃrambhī dṛḍhavikramaḥ //

bhavetsutumulaṃ yuddhaṃ sarvasyāpyaparājitam /
sarve hyastravidaḥ śūrāḥ sarve prāptā mahadyaśaḥ //

api sarveśvaratvaṃ hi na vāñcheranparājitāḥ /
vadhe nūnaṃ bhavecchāntireteṣāṃ phalgunasya vā //

na tu hantā'rjunasyāsti jetā vā'sya na vidyate /
manyustasya kathaṃ śāmyenmandānprati samutthitaḥ //

tridaśeśasamo vīraḥ khāṇḍave'gnimatarpayat /
jigā pārthivānsarvānrājasūye mahākratau //

śeṣaṃ kuryādgirervajro nipatanmūrdhni sañjaya /
na tu kuryuḥ śarāḥ śeṣaṃ kṣiptāstāta kirīṭinā //

yathā hi kiraṇā bhānostapantīha carācaram /
tathā pārthabhujotsṛṣṭāḥ śarāstapsyanti matsutān //

api tadrathaghoṣeṇa bhayārthā savyasācinaḥ /
pratibhāti vidīrṇeva sarvato bhāratī camūḥ //

samuddharanpravapaṃścaiva bāṇān stātā'tatāyī samare kirīṭi /
sṛṣṭo'ntakaḥ sarvaharo vidhātrā bhavedyathā tadvadavāraṇīyaḥ //
sañjaya uvāca /

yadatatkathitaṃ rājaṃstvayā duryodhanaṃ prati /
sarvametadyathātattvaṃ natu mithyā mahīpate //

manyunā hi samāviṣṭāḥ pāṇḍavāstvamitaujasaḥ /
dṛṣṭvā kṛṣṇāṃ sabhāṃ nītāṃ dharmapatnīṃ yaśasvinīṃ //

duḥśāsanasya tā vācaḥ śrutvā vai kaṭukodayāḥ /
karṇasya ca mahārāja na svapsyantīti me matiḥ //

śrutaṃ hi te mahārāja yathā pārthena saṃyuge /
ekādaśatanuḥ sthāṇurdhenuṣā paritoṣitaḥ //

kairātaṃ veṣamāsthāya yodhayāmāsa phalgunam /
jijñāsuḥ sarvadeveśaḥ kapardī bhagavānsvayam //

lebhe pāśupataṃ cāpi paramāstraṃ mahādyutiḥ / tatrainaṃ lokapālāste darśayāmāsurarjunam /
astrahetoḥ parākrāntaṃ tapasā kauravarṣabham //

naitadutsahate cānyo labdhumanyatra phalgunāt /
sākṣāddarśanameteṣāmīśvarāṇāṃ naro bhuvi //

maheśvareṇa yo rājanna jīrṇo grastamūrtimān /
kastamutsahate vīro yuddhe jarayituṃ pumān //

āsāditamidaṃ ghoraṃ tumulaṃ romaharṣaṇam /
draupadīṃ parikarṣadbhiḥ kopayadbhiśca pāṇḍavān //

yatra visphuramāṇauṣṭho bhīmaḥ prāha vaco'rthavat /
dṛṣṭvā duryodhanenorū draupadyā darśitāvubhau //

ūruṃ bhetsyāmi te pāpa gadayā vajrakalpayā /
trayodaśānāṃ varṣāṇāmante durdyūtadevinaḥ //

sarve praharatāṃ śreṣṭhāḥ sarvecāmitatejasaḥ /
sarvesarvāstravidvāṃso devairapi sudurjayāḥ //

manye manyusamudbhūtāḥ putrāṇāṃ tava saṃyuge /
antaṃ pārthāḥ kariṣyanti vīryāmarṣasamanvitāḥ //
dhṛtarāṣṭra uvāca /

kiṃ kṛtaṃ sūta karṇena vadatā paruṣaṃ vacaḥ /
paryāptaṃ vairametāvadyatkṛṣṇā sā sabhāṃ gatā //

apīdānīṃ mama sutāstiṣṭheranmandacetasaḥ /
yeṣāṃ bhrātā gururjyeṣṭho vinaye nāvatiṣṭhate //

mamāpi vacanaṃ sūta na śuśrūṣati mandabhāk /
dṛṣṭvā māṃ cakṣuṣā hīnaṃ nirviceṣṭamacetasam //

ye cāsya sacivā mandāḥ karṇasaubalakādayaḥ /
te tasya bhūyaso doṣānvardhayanti vicetasaḥ //

svairaṃ muktā hyapi śarāḥ pārthenāmitatejasā /
nirdaheyurmama sutānkimpunarmanyuneritāḥ //

pārthabāhubalotsṛṣṭā mahācāpaviniḥsṛtāḥ /
divyāstramantramuditāḥ sādayeyuḥ surānapi //

yasya mantrī ca goptā ca suhṛccaiva janārdanaḥ /
hanistrailokyanāthaḥ sa kinnu tas na nirjitam //

idaṃ hi sumahaccitramarjunasyeha sañjaya /
mahādevena bāhubhyāṃ yatsameta iti śrutiḥ //

pratyakṣaṃ sarvalokasya khāṇḍave yatkṛtaṃ purā /
phalgunena sahāyārthe vahnerdāmodareṇa ca //

sarvathā na hi me putrāḥ sahāmātyāḥ sabāndhavāḥ / kruddhe pārthe ca bhīme ca vāsudeve ca sātvate //