Mahabharata · Chapter 3.45

tato devāḥ sagandharvāḥ samādāyārghyamuttamam /
śakrasya matamājñāya pārthamānarcurjasā //

pādyamācamanīyaṃ ca pratigrāhya nṛpātmajam /
praveśayāmāsuratho purandaraniveśanam //

evaṃ sampūjito jiṣṇuruvāsa bhavane pituḥ /
upaśikṣanmahāstrāṇi sasaṃhārāṇi pāṇḍavaḥ //

sa śakrahastāddayitaṃ vajramastraṃ durutsaham /
aśaniṃ ca mahānādāṃ meghabṛṃhitalakṣaṇām //

gṛhītāstrastu kaunteyo bhrātṝnsasmāra pāṇḍavaḥ /
purandaraniyogācca pañcābdamavasatsukham //

tataḥ śakro'bravītpārthaṃ kṛtāstraṃ kāla āgate /
nṛttaṃ gītaṃ ca kaunteya citrasenādavāpnuhi //

vāditraṃ daivavihitaṃ nṛlake yanna vidte /
madājñayā ca kaunteya śreyo vai te bhaviṣti //

sakhāyaṃ pradadau cāsya citrasenaṃ purandaraḥ / sa tena saha sangamya reme pārtho nirāmayaḥ //

kadācidaṭamānastu maharṣiratha lomaśaḥ /
jagāma śakrabhavanaṃ purandaradidṛkṣayā //

sa sametya namaskṛtya devarājaṃ mahāmuniḥ /
dadarśārdhāsanagataṃ pāṇḍavaṃ vāsavasya hi //

tataḥ śakrābhyanujñāta āsane viṣṭarottare /
niṣasāda dvijaśreṣṭhaḥ pūjyamāno maharṣibhiḥ //

tasya dṛṣṭvā'bhavadbuddhiḥ pārthamindrāsane sthitam /
kathaṃ nu kṣatriyaḥ pārthaḥ śakrāsanamavāptavān //

kiṃ tvasya sukṛtaṃ karma ke lokā vai vinirjitāḥ /
sa evamanusamprāptaḥ sthānaṃ devanamaskṛtam //

tasya vijñāya sankalpaṃ śakro vṛtravimardanaḥ /
lomaśaṃ prahasanvākyamidamāha śacīpatiḥ //

devarṣe śrūyatāṃ yatte manasaitadvivakṣitam /
nāyaṃ kevalamartyo'bhūtkṣatriyatvamupāgataḥ //

maharṣe mama putro'yaṃ kuntyāṃ jāto mahābhujaḥ /
astrahetoriha prāptaḥ kasmāccitkāraṇāntarāt //

aho nainaṃ bhavānvetti purāṇamṛṣisattamam /
śṛṇu me vadato brahmanyo'yaṃ yaccāsya kāraṇam //

naranārāyaṇau yau tau purāṇāvṛṣisattamau /
tāvimāvabhijānīhi hṛṣīkeśadhanañjayau //

vikhyātau triṣu lokeṣu naranārāyaṇāvṛṣī /
kāryārthamavatīrṇau tau pṛthvīṃ puṇyapratiśrayām //

yanna śakyaṃ śurairdraṣṭumṛṣibhirvā mahātmabhiḥ /
tadāśramapadaṃ puṇyaṃ badarīnāma viśrutam //

sa nivāso'bhavadvipra viṣṇorjiṣṇostathaiva ca /
yataḥ pravavṛte gaṅgā siddhacāraṇasevitā //

tau manniyogādbrahmarṣe kṣitau jātau mahādyutī /
bhūmerbhārāvataraṇaṃ mahāvīryau kariṣyataḥ //

udvṛttā hyasurāḥ kecinnivātakavacā iti /
vipriyeṣu sthitā'smākaṃ varadānena mohitāḥ //

tarkayante surānhantuṃ baladarpasamanvitāḥ /
devānna gaṇayantyete tathā dattavarā hi te //

pātālavāsino raudrā danoḥ putrā mahābalāḥ /
sarve devanikāyā hi nālaṃ yodhayituṃ hi tān //

yosau bhūmigataḥ śrīmānviṣṇurmudhuniṣūdanaḥ /
kapilo nāma devosau bhagavānajito hariḥ //

yena pūrvammahātmānaḥ khanamānā rasātalam /
darśanādeva nihatāḥ sagarasyātmajā vibho //

tena kāryaṃ mahatkāryamasmākaṃ dvijasattama /
pāthena ca mahāyuddhe sametābhyāmasaṃśayam //

so'surāndarśanādeva śakto hantuṃ sahānugān /
nivātakavacānsarvānnāgāniva mahāhrade //

kintu nālpena kāryeṇa prabodhyo madhusūdanaḥ /
tejasaḥ sumahārāśiḥ prabuddhaḥ pradahejjagat //

ayaṃ teṣāṃ samastānāṃ śaktaḥ pratisamāsane /
tānnihatyaraṇe śūraḥ punaryāsyati mānuṣān //

bhavānasmanniyogena yātu tāvanmahītalam /
kāmyake drakṣyase vīraṃ nivasantaṃ yudhiṣṭhiram //

savācyo mama sandeśāddharmātmā satyasangaraḥ /
notkaṇaaṭhā phalgune kāryā kṛtāstraḥ śīghrameṣyati //

nāśudbāhuvīryeṇa nākṛtāstreṇa vā raṇe /
bhīṣmadroṇādayo yuddhe śakyāḥ pratisamāsitum //

gṛhītāstro guḍākeśo mahābāhurmahāmanāḥ /
nṛttavāditragītānāṃ divyānāṃ pāramīyivān //

bhavānapi viviktāni tīrthāni manujeśvara /
bhrātṛbhiḥ sahitaḥ sarvairdraṣṭumarhatyarindama //

tīrtheṣvāplutya puṇyeṣu vipāpmā vigatajvaraḥ /
rājyaṃ bhokṣyasi dharmeṇa sukhī vigatakalmapaḥ //

bhavāṃścainaṃ dvijaśreṣṭha paryaṭantaṃ mahītalam /
trātumarhati viprāgrya tapobalasamanvitaḥ //

giridurgeṣu ca sadā deśeṣu viṣameṣu ca /
vasanti rāsā raudrāstebhyorakṣāṃ vidhāsyati //

evamukte mahendreṇa bībhatsurapi lomaśam /
uvāca prayato vākyaṃ rakṣethāḥ pāṇḍunandanam //

[yathā guptastvayā rājā carettīrthāni sattama / dānaṃ dadyādyathā caiva tathā kuru mahāmune // ]
vaiśampāyana uvāca /

tatheti sampratijñāya lomaśaḥ sumahātapāḥ /
kāmaykaṃ vanamuddiśya samupāyānmahītalam //

dadarśa tatra kaunteyaṃ dharmarājamarindamam / tāpasairbhrātṛbhiścaiva sarvataḥ parivāritam //