Mahabharata · Chapter 3.43

dadarśa sa purīṃ ramyāṃ siddhacāraṇasevitām /
sarvartukusumaiḥ puṇyaiḥ pādapairupaśobhitām //

tatra saugandhikānāṃ ca puṣpāṇāṃ puṇyagandhinām /
upavījyamāno miśreṇa vāyunā puṇyagandhinā //

nandanaṃ ca vanaṃ divyamapsarogaṇasevitam /
dadarśa divyakusumairāhvayadbhiriva drumaiḥ //

nātaptatapasā śakyo draṣṭuṃ nānāhitāgninā /
sa lokaḥ puṇyakartṝṇāṃ nāpi yuddhe parāṅyukhaiḥ //

nāyajvabhirnāvratikairna vedaśrutivarjitaiḥ /
nānāplutāṅgaistīrtheṣu yajñadānabahiṣkṛtaiḥ //

nāpi yajñahanaiḥ kṣudrairdraṣṭuṃ śakyaḥ kathañcana /
pānapairgurutalpaiśca māṃsādairvā durātmabhiḥ //

sa taddivyaṃ vanaṃ paśyandivyagītanināditam /
praviveśa mahābāhuḥ śakrasya dayitāṃ purīm //

tatra devavimānāni kāmagāni sahasraśaḥ /
saṃsthitānyabhiyātāni dadarśāyutaśastadā //

saṃstūyamāno gandharvairapsarobhiśca pāṇḍavaḥ /
puṣpagandhavahaiḥ puṇyairvāyubhiścānuvījitaḥ //

tato devāḥ sagandharvāḥ siddhāśca paramarṣayaḥ /
hṛṣṭāḥ sampūjayāmāsuḥ pārthamakliṣṭakāriṇam //

āsīrvādaiḥ stūyamāno divyavāditraniḥsvanaiḥ /
pratipede mahābāhuḥ śaṅkhadundubhināditam //

nakṣatramārgaṃ vipulaṃ suravīthīti viśrutam /
indrājñayā yayau pārthaḥ stūyamānaḥ samantataḥ //

tatra sādhyāstathā viśve maruto'thāśvinau tathā /
ādityā vasavo rudrāstathā brahmarṣayo'malāḥ //

rājarṣayaśca bahavo dilīpapramukhā nṛpāḥ /
tambururnāradaścaiva gandharvau ca hāhā hūhūḥ //

tānsa sarvānsamāgamya vidhivatkurunandanaḥ /
tato'paśyaddevarājaṃ śatakratumarindamaḥ //

tataḥ pārtho mahābāhuravatīrya rathottamāt /
dadarśa sākṣāddeveśaṃ pitaraṃ pākaśāsanam //

pāṇḍureṇātapatreṇa hemadaṇḍena cāruṇā /
divyagandhādhivāsena vyajanena vidhūyatā //

viśvāvasuprabhṛtinirgandharvaiḥ stutivandibhiḥ /
stūyamānaṃ dvijāgryaiśca ṛgyajuḥsāmasaṃstavaiḥ //

tato'bhigamya kaunteyaḥ śirasā'bhyagamadbalī /
sa cainaṃ vṛttapīnābhyāṃ bāhubhyāṃ pratyagṛhṇata //

tataḥ śakrāsane puṇye devarṣigaṇasevite /
śakraḥ pāṇau gṛhītvainamupāveśayadantike //

mūrdhi cainamupāghrāya devendraḥ paravīrahā /
aṅkamāropayāmāsa praśrayāvanataṃ tadā //

sahasrākṣaniyogātsa pārthaḥ śakrāsanaṃ tadā /
ārurukṣurameyātmā dvitīya ivavāsavaḥ //

tataḥ premṇā vṛtraśatrurarjunasya śubhaṃ mukham /
pasparśa puṇyagandhena kareṇa parisāntvayan //

pramārjamānaḥ śanakairbāhū cāsyāyatau śubhau /
jyāśarakṣepakinau stambhāviva hiraṇmayau //

vajragrahaṇacihnena kareṇa parisāntvayan /
muhurmuhurvajradharo bāhū cāsphoṭayañśanaiḥ //

smayanniva guḍākeśaṃ prekṣamāṇaḥ sahasradṛk /
harṣeṇotphullanayano na cātṛpyata vṛtrahā //

ekāsanopaviṣṭau tau śobhayāṃsacakratuḥ sabhām /
sūryācandramasau vyoma caturdaśyāmivoditau //

tatra sma gāthā gāyanti sāmnā paramavalgunā /
gandharvāstumburuśreṣṭhāḥ kuśalā gītasāmasu //

ghṛtācī menakā rambhā pūrvacittiḥ svayamprabhā /
urvaśī miśrakeśī ca daṇḍagaurī varūthīni //

gopālī sahajanyā ca kumbhayoniḥ prajāgarā /
citrasenā citralekhā sahā ca madhurasvarā //

etāścānyāśca nanṛtustatratatra śucismitāḥ /
cattapramathane yuktāḥ siddhānāṃ padmalocanāḥ //

mahākaṭitaṭaśroṇyaḥ kampamānaiḥ payodharaiḥ /
kaṭākṣahāvamādhuryaiścetobuddhimanoharaiḥ //

[tato devāḥ sagandharvāḥ samādāyārghyamuttamam /
śakrasya matamājñāya pārthamānarcurañjasā //

pādyamācamanīyaṃ ca pratigrāhya nṛpātmajam /
praveśayāmāsuratho purandaraniveśanam //

evaṃ sampūjito jiṣṇuruvāsa bhavane pituḥ /
upaśikṣanmahāsrāṇi sasaṃhārāṇi pāṇḍavaḥ //

śakrasya hastāddayitaṃ vajramastraṃ ca duḥsaham /
aśanīśca mahānādā meghabarhiṇalakṣaṇāḥ //

gṛhītāstrastu kaunteyo bhrātṝnsasmāra pāṇḍavaḥ /
purandaraniyogācca pañcābdānavasatsukhī //

tataḥ śakro'bravītpārthaṃ kṛtāstraṃ kāla āgate /
nṛtyaṃ gītaṃ ca kaunteya citrasenādavāpnuhi //

vāditraṃ devavihitaṃ nṛloke yanna vidyate /
tadarjayasva kaunteya śreyo vai te bhaviṣyati //

sakhāyaṃ pradadau cāsya citrasenaṃ purandaraḥ /
sa tena saha sangamya reme pārtho nirāmayaḥ //

gītavāditranṛtyāni bhūya evādideśa ha /
tathā'pi nālabhaccharma tarasvī dyūtakāritam //

duḥśāsanavadhāmarṣī śakuneḥ saubalasya ca / tatastenātulāṃ prītimupāgamya kvacitkvacit /
gāndhaṟvamatulaṃ nṛtyaṃ vāditraṃ copalabdhavān //

sa śikṣito nṛtyaguṇānanekā- nvāditragītārthaguṇāṃśca sarvān /
na śarṇa lebhe paravīrahantā bhrātṝnsmaranmātaraṃ caiva kuntīm //