મહાભારત · અધ્યાય 3.43

દદર્શ સ પુરીં રમ્યાં સિદ્ધચારણસેવિતામ્ ।
સર્વર્તુકુસુમૈઃ પુણ્યૈઃ પાદપૈરુપશોભિતામ્ ॥

તત્ર સૌગન્ધિકાનાં ચ પુષ્પાણાં પુણ્યગન્ધિનામ્ ।
ઉપવીજ્યમાનો મિશ્રેણ વાયુના પુણ્યગન્ધિના ॥

નન્દનં ચ વનં દિવ્યમપ્સરોગણસેવિતમ્ ।
દદર્શ દિવ્યકુસુમૈરાહ્વયદ્ભિરિવ દ્રુમૈઃ ॥

નાતપ્તતપસા શક્યો દ્રષ્ટું નાનાહિતાગ્નિના ।
સ લોકઃ પુણ્યકર્તૄણાં નાપિ યુદ્ધે પરાઙ્યુખૈઃ ॥

નાયજ્વભિર્નાવ્રતિકૈર્ન વેદશ્રુતિવર્જિતૈઃ ।
નાનાપ્લુતાઙ્ગૈસ્તીર્થેષુ યજ્ઞદાનબહિષ્કૃતૈઃ ॥

નાપિ યજ્ઞહનૈઃ ક્ષુદ્રૈર્દ્રષ્ટું શક્યઃ કથઞ્ચન ।
પાનપૈર્ગુરુતલ્પૈશ્ચ માંસાદૈર્વા દુરાત્મભિઃ ॥

સ તદ્દિવ્યં વનં પશ્યન્દિવ્યગીતનિનાદિતમ્ ।
પ્રવિવેશ મહાબાહુઃ શક્રસ્ય દયિતાં પુરીમ્ ॥

તત્ર દેવવિમાનાનિ કામગાનિ સહસ્રશઃ ।
સંસ્થિતાન્યભિયાતાનિ દદર્શાયુતશસ્તદા ॥

સંસ્તૂયમાનો ગન્ધર્વૈરપ્સરોભિશ્ચ પાણ્ડવઃ ।
પુષ્પગન્ધવહૈઃ પુણ્યૈર્વાયુભિશ્ચાનુવીજિતઃ ॥

તતો દેવાઃ સગન્ધર્વાઃ સિદ્ધાશ્ચ પરમર્ષયઃ ।
હૃષ્ટાઃ સમ્પૂજયામાસુઃ પાર્થમક્લિષ્ટકારિણમ્ ॥

આસીર્વાદૈઃ સ્તૂયમાનો દિવ્યવાદિત્રનિઃસ્વનૈઃ ।
પ્રતિપેદે મહાબાહુઃ શઙ્ખદુન્દુભિનાદિતમ્ ॥

નક્ષત્રમાર્ગં વિપુલં સુરવીથીતિ વિશ્રુતમ્ ।
ઇન્દ્રાજ્ઞયા યયૌ પાર્થઃ સ્તૂયમાનઃ સમન્તતઃ ॥

તત્ર સાધ્યાસ્તથા વિશ્વે મરુતોઽથાશ્વિનૌ તથા ।
આદિત્યા વસવો રુદ્રાસ્તથા બ્રહ્મર્ષયોઽમલાઃ ॥

રાજર્ષયશ્ચ બહવો દિલીપપ્રમુખા નૃપાઃ ।
તમ્બુરુર્નારદશ્ચૈવ ગન્ધર્વૌ ચ હાહા હૂહૂઃ ॥

તાન્સ સર્વાન્સમાગમ્ય વિધિવત્કુરુનન્દનઃ ।
તતોઽપશ્યદ્દેવરાજં શતક્રતુમરિન્દમઃ ॥

તતઃ પાર્થો મહાબાહુરવતીર્ય રથોત્તમાત્ ।
દદર્શ સાક્ષાદ્દેવેશં પિતરં પાકશાસનમ્ ॥

પાણ્ડુરેણાતપત્રેણ હેમદણ્ડેન ચારુણા ।
દિવ્યગન્ધાધિવાસેન વ્યજનેન વિધૂયતા ॥

વિશ્વાવસુપ્રભૃતિનિર્ગન્ધર્વૈઃ સ્તુતિવન્દિભિઃ ।
સ્તૂયમાનં દ્વિજાગ્ર્યૈશ્ચ ઋગ્યજુઃસામસંસ્તવૈઃ ॥

તતોઽભિગમ્ય કૌન્તેયઃ શિરસાઽભ્યગમદ્બલી ।
સ ચૈનં વૃત્તપીનાભ્યાં બાહુભ્યાં પ્રત્યગૃહ્ણત ॥

તતઃ શક્રાસને પુણ્યે દેવર્ષિગણસેવિતે ।
શક્રઃ પાણૌ ગૃહીત્વૈનમુપાવેશયદન્તિકે ॥

મૂર્ધિ ચૈનમુપાઘ્રાય દેવેન્દ્રઃ પરવીરહા ।
અઙ્કમારોપયામાસ પ્રશ્રયાવનતં તદા ॥

સહસ્રાક્ષનિયોગાત્સ પાર્થઃ શક્રાસનં તદા ।
આરુરુક્ષુરમેયાત્મા દ્વિતીય ઇવવાસવઃ ॥

તતઃ પ્રેમ્ણા વૃત્રશત્રુરર્જુનસ્ય શુભં મુખમ્ ।
પસ્પર્શ પુણ્યગન્ધેન કરેણ પરિસાન્ત્વયન્ ॥

પ્રમાર્જમાનઃ શનકૈર્બાહૂ ચાસ્યાયતૌ શુભૌ ।
જ્યાશરક્ષેપકિનૌ સ્તમ્ભાવિવ હિરણ્મયૌ ॥

વજ્રગ્રહણચિહ્નેન કરેણ પરિસાન્ત્વયન્ ।
મુહુર્મુહુર્વજ્રધરો બાહૂ ચાસ્ફોટયઞ્શનૈઃ ॥

સ્મયન્નિવ ગુડાકેશં પ્રેક્ષમાણઃ સહસ્રદૃક્ ।
હર્ષેણોત્ફુલ્લનયનો ન ચાતૃપ્યત વૃત્રહા ॥

એકાસનોપવિષ્ટૌ તૌ શોભયાંસચક્રતુઃ સભામ્ ।
સૂર્યાચન્દ્રમસૌ વ્યોમ ચતુર્દશ્યામિવોદિતૌ ॥

તત્ર સ્મ ગાથા ગાયન્તિ સામ્ના પરમવલ્ગુના ।
ગન્ધર્વાસ્તુમ્બુરુશ્રેષ્ઠાઃ કુશલા ગીતસામસુ ॥

ઘૃતાચી મેનકા રમ્ભા પૂર્વચિત્તિઃ સ્વયમ્પ્રભા ।
ઉર્વશી મિશ્રકેશી ચ દણ્ડગૌરી વરૂથીનિ ॥

ગોપાલી સહજન્યા ચ કુમ્ભયોનિઃ પ્રજાગરા ।
ચિત્રસેના ચિત્રલેખા સહા ચ મધુરસ્વરા ॥

એતાશ્ચાન્યાશ્ચ નનૃતુસ્તત્રતત્ર શુચિસ્મિતાઃ ।
ચત્તપ્રમથને યુક્તાઃ સિદ્ધાનાં પદ્મલોચનાઃ ॥

મહાકટિતટશ્રોણ્યઃ કમ્પમાનૈઃ પયોધરૈઃ ।
કટાક્ષહાવમાધુર્યૈશ્ચેતોબુદ્ધિમનોહરૈઃ ॥

[તતો દેવાઃ સગન્ધર્વાઃ સમાદાયાર્ઘ્યમુત્તમમ્ ।
શક્રસ્ય મતમાજ્ઞાય પાર્થમાનર્ચુરઞ્જસા ॥

પાદ્યમાચમનીયં ચ પ્રતિગ્રાહ્ય નૃપાત્મજમ્ ।
પ્રવેશયામાસુરથો પુરન્દરનિવેશનમ્ ॥

એવં સમ્પૂજિતો જિષ્ણુરુવાસ ભવને પિતુઃ ।
ઉપશિક્ષન્મહાસ્રાણિ સસંહારાણિ પાણ્ડવઃ ॥

શક્રસ્ય હસ્તાદ્દયિતં વજ્રમસ્ત્રં ચ દુઃસહમ્ ।
અશનીશ્ચ મહાનાદા મેઘબર્હિણલક્ષણાઃ ॥

ગૃહીતાસ્ત્રસ્તુ કૌન્તેયો ભ્રાતૄન્સસ્માર પાણ્ડવઃ ।
પુરન્દરનિયોગાચ્ચ પઞ્ચાબ્દાનવસત્સુખી ॥

તતઃ શક્રોઽબ્રવીત્પાર્થં કૃતાસ્ત્રં કાલ આગતે ।
નૃત્યં ગીતં ચ કૌન્તેય ચિત્રસેનાદવાપ્નુહિ ॥

વાદિત્રં દેવવિહિતં નૃલોકે યન્ન વિદ્યતે ।
તદર્જયસ્વ કૌન્તેય શ્રેયો વૈ તે ભવિષ્યતિ ॥

સખાયં પ્રદદૌ ચાસ્ય ચિત્રસેનં પુરન્દરઃ ।
સ તેન સહ સન્ગમ્ય રેમે પાર્થો નિરામયઃ ॥

ગીતવાદિત્રનૃત્યાનિ ભૂય એવાદિદેશ હ ।
તથાઽપિ નાલભચ્છર્મ તરસ્વી દ્યૂતકારિતમ્ ॥

દુઃશાસનવધામર્ષી શકુનેઃ સૌબલસ્ય ચ । તતસ્તેનાતુલાં પ્રીતિમુપાગમ્ય ક્વચિત્ક્વચિત્ ।
ગાન્ધṟવમતુલં નૃત્યં વાદિત્રં ચોપલબ્ધવાન્ ॥

સ શિક્ષિતો નૃત્યગુણાનનેકા- ન્વાદિત્રગીતાર્થગુણાંશ્ચ સર્વાન્ ।
ન શર્ણ લેભે પરવીરહન્તા ભ્રાતૄન્સ્મરન્માતરં ચૈવ કુન્તીમ્ ॥