Mahabharata · Chapter 3.42

gateṣu lokapāleṣu pārthaḥ śatrunibarhaṇaḥ /
cintayāmāsa rājendra devarājarathāgamam //

tasya cintayamānasya guḍākeśasya dhīmataḥ /
ratho mātalisaṃyukta ājagāma mahāprabhaḥ //

nabho vitimiraṃ kurvañjaladānpāṭayanniva / diśaḥ sampūrayannādairmahāmegharavopamaiḥ /

asayaḥ śaktayo bhīmā gadāścograpradarśanāḥ /
divyaprabhāvāḥ prāsāśca vidyutaśca mahāprabhāḥ //

tathaivāśanayaścaiva cakrayuktāstulāguḍāḥ /
vāyusphoṭāḥ sanirghātāḥ śaṅkhameghasvanāstathā //

tatranāgā mahākāyā jvalitāsyāḥ sudāruṇāḥ /
sitābhrakūṭapratimāḥ saṃhatāśca yathopalāḥ //

daśavājisahasrāṇi harīṇāṃ vātaraṃhasām /
vahanti yaṃ netramuṣaṃ divyaṃ māyāmayaṃ ratham //

tatrāpaśyanmahānīlaṃ vaijayantaṃ mahāprabham /
dhvajamindīvaraśyāmaṃ vaṃśaṃ kanakabhūṣaṇam //

tasminrathe sthitaṃ sūtaṃ taptahemavibhūṣitam /
dṛṣṭvā pārtho mahābāhurdevarājamatarkayat //

tathā tarkayatastasya phalgunasyātha mātaliḥ /
sannataḥ prasthito bhūtvā vākyamarjunamabravīt //

bhobho śakrātmaja śrīmañśakrastvāṃ draṣṭumicchati /
ārohatu bhavāñśīghraṃ rathamindrasya sambhatam //

āha māmamaraśreṣṭhaḥ pitā tava śatakratuḥ /
kuntīsutamiha prāptaṃ paśyantu tridaśālayāḥ //

eṣa śakraḥ parivṛto devairṛṣigaṇaistathā /
gandharvairapsarobhiśca tvāṃ didṛkṣuḥ pratīkṣate //

asmāllokāddevalokaṃ pākaśāsanaśāsanāt /
māroha tvaṃ mayā sārdhaṃ labdhāstraḥ punareṣyasi //
arjuna uvāca /

mātale gaccha śīghraṃ tvamārohasva rathottamam /
rājasūyāśvamedhānāṃ śatairapi sudurlabham //

pārthivaiḥ sumahābhāgairyajvabhirbhūridakṣiṇaiḥ /
daivatairvā durārohaṃ dānavairvā rathottamam //

nātaptatapasā śakya eṣa divyo mahārathaḥ /
draṣṭuṃ vā'pyathavā spraṣṭumāroḍhuṃ kuta eva ca //

tvayi matiṣṭhite sādho rathasthe sthiravājini /
paścādahamathārokṣye mukṛtī satpathaṃ yathā //
vaiśampāyana uvāca /

tasyatadvacanaṃ śrutvā mātaliḥ śakrasārathiḥ /
āruroha rathaṃ śīghraṃ hayāñjagrāha raśmibhiḥ //

tato'rjuno hṛṣṭamanā gaṅgāyāmāplutaḥ śuciḥ /
jajāpa japyaṃ kaunteyo vidhivatkurunandanaḥ //

tataḥ pitṛnyathānyāyaṃ tarpayitvā yathāvidhi /
mandaraṃ śailarājaṃ tamāpraṣṭumupacakrame //

sādhūnāṃ puṇyaśīlānāṃ munīnāṃ puṇyakarmaṇām /
tvaṃ sadā saṃśrayaḥ śaila svargamārgābhikāṅkṣiṇām //

tvatprasādātsadā śaila brāhmaṇāḥ kṣatriyā viśaḥ /
svargaṃ prāptāścaranti sma devaiḥ saha gatavyathāḥ //

adrirāja mahāśaila munisaṃśraya tīrthavan /
gacchāmyāmantrayitvā tvāṃ sukhamasmyuṣitastvayi //

tava sānūni kuñjāśca nadyaḥ prasravaṇāni ca /
tīrthāni ca supuṇyāni mayā dṛṣṭānyanekaśaḥ //

susugandhāśca vairyoghāstvaccharīraviniḥsṛtāḥ /
amṛtāsvādasṛśāḥ pītāḥ prasravaṇodakāḥ //

śiśuryathā pituścāṅke sukhaṃ śete taṭe tathā /
mayā tavāṅke lalitaṃ śailarāja mahāprabho //

apsarogaṇasankīrṇae brahmaghoṣānunādite /
sukhamasmyuṣitaḥ śaila tava sānuṣu nityadā //

evamuktvārjunaḥ śailamāmantrya paravīrahā /
āruroha rathaṃ divyaṃ dyotayanniva bhāskaraḥ //

sa tenādityarūpeṇa divyenādbhutakarmaṇā /
ūrdhvamācakrame dhīmānprahṛṣṭaḥ kurunandanaḥ //

so'darśanapathaṃ yāto martyānāṃ dharmacāriṇām /
dadarśādbhutarūpāṇi vimānāni sahasraśaḥ //

na tatra sūryaḥ somo vā dyotate na ca pāvakaḥ /
svayaiva prabhayā tatra dyotante puṇyalabdhayā //

tārārūpāṇi yānīha dṛśyante dyutimanti vai /
ākāśe viprakṛṣṭatvāttanūni sumahāntyapi //

tāni tatra prabhāsvanti rūpavanti ca pāṇḍavaḥ /
dadarśa sveṣu dhiṣṇyeṣu dīptimanti svayā'rciṣā //

tatra rājarṣayaḥ siddhā vīrāśca nihatā yudhi /
tapasā ca jitaṃ svargaṃ sampetuḥ śatasaṅghaśaḥ //

gandharvāṇāṃ sahasrāṇi mūryajvalitatejasām /
guhyakāranāmṛṣīṇāṃ ca tathaivāpsarasāṃ gaṇān //

lokānātmaprabhānpaśyanphalguno vismayānvitaḥ /
papraccha mātaliṃ prītyā sa cāpyenamuvāca ha //

ete sukṛtinaḥ pārtha sveṣu dhiṣṇyeṣvavasthitāḥ /
tāndṛṣṭavānasi vibho tārārūpāṇi bhūtale //

tato'paśyatsthitaṃ dvāri mattaṃ vijayinaṃ gajam /
airāvataṃ caturdantaṃ kailāsamiva śṛṅgiṇam //

sa siddhamārgamākramya kurupāṇḍavasattamaḥ /
vyarocata yathāpūrvaṃ māndhātā pārthivottamaḥ //

abhicakrāma lokānsa rājñāṃ rājīvalocanaḥ //

[evaṃ sa sankramaṃstatra svargaloke mahāyaśāḥ .] tato dadarśa śakrasya purīṃ tāmamarāvatīm //