Mahabharata · Chapter 3.41

tasya sampaśyatastveva pinākī govṛṣadhvajaḥ /
jagāmādarśanaṃ bhānurlokasyevāstamīyivān //

tato'rjunaḥ paraṃ cakre vismayaṃ paravīrahā /
mayā sākṣānmahādevo dṛṣṭa ityeva bhārata //

dhanyosmyanugṛhītosmi yanmayā tryambako haraḥ /
pinākī varado rūpī dṛṣṭaḥ spṛṣṭaśṭa pāṇinā //

kṛtārthaṃ cāvagacchāmi paramātmānamātmanā /
śatrūṃśca vijitānsarvānnirvṛttaṃ ca prayojanam //

ityevaṃ cintayānasya pārthasyāmitatejasaḥ / tato vaiḍūryavarṇābho bhāsayansarvato diśaḥ /
yādogaṇavṛtaḥ śrīmānājagāma jaleśvaraḥ //

nāgairnadairnadībhiśca daityaiḥ sādhyairmarudgaṇaiḥ /
varuṇo yādasāmbhartā vaśī taṃ deśamāgamat //

atha jāmbūnadavapurvimānena mahārciṣā /
kuberaḥ samanuprāpto yakṣairanugataḥ prabhuḥ //

vidyotayannivākāśamadbhutopamadarśanaḥ /
dhanānāmadhipaḥ śrīmānarjunaṃ draṣṭumāgataḥ //

tathā lokāntakaḥ śrīmānyamaḥ sākṣātpratāpavān /
martyamūrtidharaiḥ sārdhaṃ pitṛbhirlokabhāvanaiḥ //

daṇḍapāṇiracintyātmā sarvabhūtavināśakṛt /
vaivasvato dharmarājo vimānenāvabhāsayan //

trīllokānguhyakāṃścaiva gandharvāścaiva pannagān /
dvitīya iva mārtāṇḍo yugānte samupasthite //

bhānumanti vicitrāṇi śikharāṇi mahāgireḥ /
samāsthāyārjunaṃ tatradadṛśustapasānvitam //

tato muhūrtādbhagavānairāvataśirogataḥ /
ājagāma sahendrāṇyā śakraḥ suragaṇairvṛtaḥ //

pāṇḍureṇātapatreṇa dhriyamāṇena mūrdhani /
śuśubhe nāgarājasthaḥ sitamabhramiva sthitaḥ //

saṃstūyamāno gandharvairṛṣibhiśca tapodhanaiḥ /
śṛṅgaṃ gireḥ samāsādya tasthau sūrya ivoditaḥ //

atha meghasvano dhīmānvyājahāra śubhāṃ giram /
yamaṛ paramadharmajño dakṣiṇāṃ diśamāsthitaḥ //

arjunārjuna paśyāsmām̐llokapālānsamāgatān /
dṛṣṭiṃ te vitarāmo'dya bhavānarhati darśanam //

pūrvarṣiramitātmā tvaṃ naro nāma mahābalaḥ /
niyogādbrahmaṇastāta martyatāṃ samupāgataḥ //

tvayā ca vasusambhūto mahāvīryaḥ pitāmahaḥ /
bhīṣmaḥ paramadharmātmā jetavyaśca raṇe'nagha //

kṣatraṃ cāgnisamasparśaṃ bhāradvājena rakṣitam /
nivātakavacāścaiva saṃsādhyāḥ kurunandana //

piturmamāṃśo devasya sarvalokapratāpinaḥ /
karṇaśva sumahāvīryastvayā vadhyo dhanañjaya //

aṃśāśca kṣitisamprāptā devagandharvarakṣasām / tvayā nipātitā yuddhesvakarmaphalanirjitām /
gatiṃ prāpsyanti kaunteya yathāsvamarikarśana //

akṣayā tava kīrtiśca loke sthāsayti phalguna /
tvayā sākṣānmahādevastoṣito hi mahāmṛdhe //

laghvī vasumatī cāpi kartavyā viṣṇunā saha //

gṛhāṇāstraṃ mahābāho daṇḍamaprativāraṇam /
anenāstreṇa sumahattvaṃ hi karma kariṣyasi //
vaiśampāyana uvāca /

pratijagrāha pārthopi vidhivatkurunandanaḥ /
samantraṃ soparodhaṃ ca samokṣavinivartanam //

tato jaladharaśyāmo varuṇo yādasāmpatiḥ /
paścimāṃ diśamāsthāya giramuccārayanprabhuḥ //

pārtha kṣatriyamukhyastvaṃ kṣatradharme vyavasthitaḥ /
paśya māṃ pṛthutāmrākṣa varuṇosmi jaleśvaraḥ //

mayā samudyatānpāśānvāruṇānanivāritān /
pratigṛhṇīṣva kaunteya saharahasyanivartanān //

ebhistadā mayā vīra sangrāme tārakāmaye /
daiteyānāṃ sahasrāṇi saṃyatāni mahātmanām //

tasmādimānmahāsatva matprasādasamutthitān /
gṛhāṇa na hi te mucyedantakopyātatāyinaḥ //

anena tvaṃ yadā'streṇa sangrāme vicariṣyasi /
tadā niḥkṣatriyā bhūmirbhaviṣyati na saṃśayaḥ //

tatastānvāruṇānastrāndivyānastravidāṃvaraḥ / pratijagrāha vidhivadvaruṇādvāsavistadā //

tataḥ kailāsanilayo dhanādhyakṣo'bhyabhāpata /
datteṣvastreṣu divyeṣu varuṇena yamena ca //

prīto'hamapi te prājña pāṇḍaveya mahāhala /
tvayā saha samāgamya ajitena tathaiva ca //

savyasācinmahābāho pūrvadeva sanātana /
sahāsmābhirbhavāñśrāntaḥ purākalpeṣu nityaśaḥ //

darśanaṃ te tvidaṃ divyaṃ pradiśāmi nararṣabha /
amānuṣānmahābāho durjayānapi jeṣyasi //

mattaścaiva bhavānāśu gṛhṇātvastramanuttamam /
anena tvamanīkāni dhārtarāṣṭrasya dhakṣyasi //

matto'pi tvaṃ gṛhāṇāstramantardhānaṃ priyaṃ bhama /
ojastejodyutikaraṃ prasvāpanamarātinut //

mahātmanā śankareṇa tripuraṃ nihataṃ yādā /
tadaitadastraṃ nirmuktaṃ yena dagdhā mahāsurāḥ //

tvadarthamudyataṃ cedaṃ mayā satyaparākrama / tvamarho dhāraṇe cāsya merupratimagaurava /

tato'rjuno mahābāhurvidhivatkurunandanaḥ /
kauberamadhijagrāha divyamastraṃ mahābalaḥ //

tato'bravīddevarājaḥ pārthamakliṣṭakāriṇam /
sāntvayañślakṣṇayāvācādivyadundubhiniḥsvanaḥ //

kuntīmātarmahābāho tvamīśānaḥ purātanaḥ /
parāṃ siddhimanuprāptaḥ sākṣāddevagatiṃ gataḥ //

devakāryaṃ tu sumahattvayā kāryamarindama /
āroḍhavyastvayā svargaḥ sajjībhava mahādyute //

ratho mātalisaṃyukta āgatastvatkṛte mama /
tatra te'hampradāsyāmi sarvāṇyastrāṇi kaurava //

tāndṛṣṭvā lokapālāṃstu sametāngirimūrdhani /
jagāma vismayaṃ dhīmānkuntīputro dhanañjayaḥ //

tato'rjuno mahātejā lokapālānsamāgatān /
pūjayāmāsa vidhivadvāgbhiradbhiḥ phalairapi //

tataḥ pratiyayurdevāḥ pratipūjya dhanañjayam /
yathāgatena vibudhāḥ sarve kāmaṃ manojavāḥ //

tato 'rjuno mudaṃ lebhe labdhāstraḥ puruṣarpabhaḥ /
kṛtārthamatha cātmānaṃ sa mene pūrṇamānasam //