Mahabharata · Chapter 3.40

narastvaṃ pūrvadehe vai nārāyaṇasahāyavān /
badaryāṃ taptavānugraṃ tapo varṣāyutānbahūn //

tvayi vā paramaṃ tejo viṣṇau vā puruṣottame /
yuvābhyāṃ puruṣāgryābhyāṃ tejasā dhāryate jagat //

śakrābhiṣeke sumahaddhanurjaladaniḥsvanam /
pragṛhya dānavāḥ śastāstvayā kṛṣṇena ca prabho //

tadetadeva gāṇḍīvaṃ tava pārtha karocitam /
bhāyāmāsthāya tadgrastaṃ mayā puruṣasattama //

tūṇau cāpyakṣayau bhūyastava pārtha karocitau /
bhaviṣyati śarīraṃ ca nīrujaṃ kurunandana //

prītimānasmi vai pārtha bhavānsatyaparākramaḥ /
gṛhāṇa varamasmattaḥ kāṅkṣitaṃ yannararṣabha //

na tvayā sadṛśaḥ kaścitpumānmartyeṣu bhārata /
divi vā vartate traṃ tvatpradhānamarindama //
arjuna uvāca /

varaṃ dadāsi cenmahyaṃ kāmaṃ prītyā vṛṣadhvaja /
kāmaye divyāmastraṃ taddhoraṃ pāśupataṃ prabho //

yattadbrahmaśiro nāma raudraṃ bhīmaparākramam /
yugānte dāruṇe prāpte kṛtsnaṃ saṃharate jagat //

[karṇabhīṣmakṛpadroṇairbhavitā tu mahāhavaḥ / tvatprasādānmahādeva jayeyaṃ tānyathā yudhi // ]

jayeyaṃ yena sangrāme dānavānrākṣasāṃstathā /
rājñaścaiva piśācāṃśca gandharvānathapannagān //

yasmiñśūlasahasrāṇi gadāścograpradarśanāḥ /
śarāścāśīviṣākārāḥ sambhavantyanumantritāḥ //

yudhyeyaṃ yena bhīṣmeṇa droṇena ca kṛpeṇa ca /
sūtaputreṇa ca raṇe nityaṃ kaṭukabhāṣiṇā //

eṣa me prathamaḥ kāmo bhagavanbhaganetrahan /
tvatprasādādvinirbṛttaḥ samarthaḥ syāmahaṃ yathā //
bhava uvāca /

dadāmi te'straṃ dayitamahaṃ pāśupataṃ vibho /
samartho dhāraṇe mokṣe saṃhāre'pi ca pāṇḍava //

na tadveda mahendropi na yamo na ca yakṣarāṭ /
varuṇopyathavā vāyuḥ kuto vetsyanti mānavāḥ //

na tvayā sahasā pārtha moktavyaṃ puruṣe kvacit /
jagadvinirdahetsarvamalpatejasi pātitam //

abadhyo nāma nāstyasya trailokye sacarācare /
manasā cakṣuṣā vācā dhanuṣā ca nipātyate //
vaiśampāyana uvāca /

tacchrutvā tvaritaḥ pārthaḥ śucirbhūtvā samāhitaḥ /
upasangṛhya viśveśamadhīṣvetyatha so'bravīt //

tatastvadhyāpayāmāsa sarahasyanivartanam /
tadastraṃ pāṇḍavaśreṣṭhaṃ mūrtimantamivāntakam //

upatasthe mahātmānaṃ yathā tryakṣamumāpatim /
pratijagrāha taccāpi prītimānarjunastadā //

tataścacāla pṛthivī saparvatavanadrumā /
sasāgaravanoddeśā sagrāmanagarākarā //

śaṅkhadundubhighoṣāśca bherīṇāṃ ca sahasraśaḥ /
tasminamuhūrte samprāpte nirghātaśca mahānabhūt //

athāstraṃ jājvaladdhoraṃ pāṇḍavasyāmitaujasaḥ /
mūrtimadviṣṭhitaṃ pārśve dadṛśurdevadānavāḥ //

spṛṣṭasya tryambakeṇātha phalgunasyāmitaujasaḥ /
yatkiṃ gacchetyanujñātastryambakeṇa tadā'rjunaḥ //

svargaṃ gacchetyanujñātastryambakeṇa tadā'rjunaḥ / praṇamya śirasā rājanprāñjalirbhavamaikṣata /

tataḥ prabhustridivanivāsināṃ vasī mahāmatirgiriśa umāpatiḥ śivaḥ /
dhanurmahadditijapiśācasūdanaṃ dadau bhavaḥ puruṣavarāya gāṇḍivam //

tataḥ śubhaṃ girivaramīśvarastadā sahomayā'sitataṭasānukandaram /
vihāya taṃ patagamaharṣisevitaṃ jagāma svaṃ puruṣavarasya paśyataḥ //