મહાભારત · અધ્યાય 3.41

તસ્ય સમ્પશ્યતસ્ત્વેવ પિનાકી ગોવૃષધ્વજઃ ।
જગામાદર્શનં ભાનુર્લોકસ્યેવાસ્તમીયિવાન્ ॥

તતોઽર્જુનઃ પરં ચક્રે વિસ્મયં પરવીરહા ।
મયા સાક્ષાન્મહાદેવો દૃષ્ટ ઇત્યેવ ભારત ॥

ધન્યોસ્મ્યનુગૃહીતોસ્મિ યન્મયા ત્ર્યમ્બકો હરઃ ।
પિનાકી વરદો રૂપી દૃષ્ટઃ સ્પૃષ્ટશ્ટ પાણિના ॥

કૃતાર્થં ચાવગચ્છામિ પરમાત્માનમાત્મના ।
શત્રૂંશ્ચ વિજિતાન્સર્વાન્નિર્વૃત્તં ચ પ્રયોજનમ્ ॥

ઇત્યેવં ચિન્તયાનસ્ય પાર્થસ્યામિતતેજસઃ । તતો વૈડૂર્યવર્ણાભો ભાસયન્સર્વતો દિશઃ ।
યાદોગણવૃતઃ શ્રીમાનાજગામ જલેશ્વરઃ ॥

નાગૈર્નદૈર્નદીભિશ્ચ દૈત્યૈઃ સાધ્યૈર્મરુદ્ગણૈઃ ।
વરુણો યાદસામ્ભર્તા વશી તં દેશમાગમત્ ॥

અથ જામ્બૂનદવપુર્વિમાનેન મહાર્ચિષા ।
કુબેરઃ સમનુપ્રાપ્તો યક્ષૈરનુગતઃ પ્રભુઃ ॥

વિદ્યોતયન્નિવાકાશમદ્ભુતોપમદર્શનઃ ।
ધનાનામધિપઃ શ્રીમાનર્જુનં દ્રષ્ટુમાગતઃ ॥

તથા લોકાન્તકઃ શ્રીમાન્યમઃ સાક્ષાત્પ્રતાપવાન્ ।
મર્ત્યમૂર્તિધરૈઃ સાર્ધં પિતૃભિર્લોકભાવનૈઃ ॥

દણ્ડપાણિરચિન્ત્યાત્મા સર્વભૂતવિનાશકૃત્ ।
વૈવસ્વતો ધર્મરાજો વિમાનેનાવભાસયન્ ॥

ત્રીલ્લોકાન્ગુહ્યકાંશ્ચૈવ ગન્ધર્વાશ્ચૈવ પન્નગાન્ ।
દ્વિતીય ઇવ માર્તાણ્ડો યુગાન્તે સમુપસ્થિતે ॥

ભાનુમન્તિ વિચિત્રાણિ શિખરાણિ મહાગિરેઃ ।
સમાસ્થાયાર્જુનં તત્રદદૃશુસ્તપસાન્વિતમ્ ॥

તતો મુહૂર્તાદ્ભગવાનૈરાવતશિરોગતઃ ।
આજગામ સહેન્દ્રાણ્યા શક્રઃ સુરગણૈર્વૃતઃ ॥

પાણ્ડુરેણાતપત્રેણ ધ્રિયમાણેન મૂર્ધનિ ।
શુશુભે નાગરાજસ્થઃ સિતમભ્રમિવ સ્થિતઃ ॥

સંસ્તૂયમાનો ગન્ધર્વૈરૃષિભિશ્ચ તપોધનૈઃ ।
શૃઙ્ગં ગિરેઃ સમાસાદ્ય તસ્થૌ સૂર્ય ઇવોદિતઃ ॥

અથ મેઘસ્વનો ધીમાન્વ્યાજહાર શુભાં ગિરમ્ ।
યમઋ પરમધર્મજ્ઞો દક્ષિણાં દિશમાસ્થિતઃ ॥

અર્જુનાર્જુન પશ્યાસ્માઁલ્લોકપાલાન્સમાગતાન્ ।
દૃષ્ટિં તે વિતરામોઽદ્ય ભવાનર્હતિ દર્શનમ્ ॥

પૂર્વર્ષિરમિતાત્મા ત્વં નરો નામ મહાબલઃ ।
નિયોગાદ્બ્રહ્મણસ્તાત મર્ત્યતાં સમુપાગતઃ ॥

ત્વયા ચ વસુસમ્ભૂતો મહાવીર્યઃ પિતામહઃ ।
ભીષ્મઃ પરમધર્માત્મા જેતવ્યશ્ચ રણેઽનઘ ॥

ક્ષત્રં ચાગ્નિસમસ્પર્શં ભારદ્વાજેન રક્ષિતમ્ ।
નિવાતકવચાશ્ચૈવ સંસાધ્યાઃ કુરુનન્દન ॥

પિતુર્મમાંશો દેવસ્ય સર્વલોકપ્રતાપિનઃ ।
કર્ણશ્વ સુમહાવીર્યસ્ત્વયા વધ્યો ધનઞ્જય ॥

અંશાશ્ચ ક્ષિતિસમ્પ્રાપ્તા દેવગન્ધર્વરક્ષસામ્ । ત્વયા નિપાતિતા યુદ્ધેસ્વકર્મફલનિર્જિતામ્ ।
ગતિં પ્રાપ્સ્યન્તિ કૌન્તેય યથાસ્વમરિકર્શન ॥

અક્ષયા તવ કીર્તિશ્ચ લોકે સ્થાસય્તિ ફલ્ગુન ।
ત્વયા સાક્ષાન્મહાદેવસ્તોષિતો હિ મહામૃધે ॥

લઘ્વી વસુમતી ચાપિ કર્તવ્યા વિષ્ણુના સહ ॥

ગૃહાણાસ્ત્રં મહાબાહો દણ્ડમપ્રતિવારણમ્ ।
અનેનાસ્ત્રેણ સુમહત્ત્વં હિ કર્મ કરિષ્યસિ ॥
વૈશમ્પાયન ઉવાચ ।

પ્રતિજગ્રાહ પાર્થોપિ વિધિવત્કુરુનન્દનઃ ।
સમન્ત્રં સોપરોધં ચ સમોક્ષવિનિવર્તનમ્ ॥

તતો જલધરશ્યામો વરુણો યાદસામ્પતિઃ ।
પશ્ચિમાં દિશમાસ્થાય ગિરમુચ્ચારયન્પ્રભુઃ ॥

પાર્થ ક્ષત્રિયમુખ્યસ્ત્વં ક્ષત્રધર્મે વ્યવસ્થિતઃ ।
પશ્ય માં પૃથુતામ્રાક્ષ વરુણોસ્મિ જલેશ્વરઃ ॥

મયા સમુદ્યતાન્પાશાન્વારુણાનનિવારિતાન્ ।
પ્રતિગૃહ્ણીષ્વ કૌન્તેય સહરહસ્યનિવર્તનાન્ ॥

એભિસ્તદા મયા વીર સન્ગ્રામે તારકામયે ।
દૈતેયાનાં સહસ્રાણિ સંયતાનિ મહાત્મનામ્ ॥

તસ્માદિમાન્મહાસત્વ મત્પ્રસાદસમુત્થિતાન્ ।
ગૃહાણ ન હિ તે મુચ્યેદન્તકોપ્યાતતાયિનઃ ॥

અનેન ત્વં યદાઽસ્ત્રેણ સન્ગ્રામે વિચરિષ્યસિ ।
તદા નિઃક્ષત્રિયા ભૂમિર્ભવિષ્યતિ ન સંશયઃ ॥

તતસ્તાન્વારુણાનસ્ત્રાન્દિવ્યાનસ્ત્રવિદાંવરઃ । પ્રતિજગ્રાહ વિધિવદ્વરુણાદ્વાસવિસ્તદા ॥

તતઃ કૈલાસનિલયો ધનાધ્યક્ષોઽભ્યભાપત ।
દત્તેષ્વસ્ત્રેષુ દિવ્યેષુ વરુણેન યમેન ચ ॥

પ્રીતોઽહમપિ તે પ્રાજ્ઞ પાણ્ડવેય મહાહલ ।
ત્વયા સહ સમાગમ્ય અજિતેન તથૈવ ચ ॥

સવ્યસાચિન્મહાબાહો પૂર્વદેવ સનાતન ।
સહાસ્માભિર્ભવાઞ્શ્રાન્તઃ પુરાકલ્પેષુ નિત્યશઃ ॥

દર્શનં તે ત્વિદં દિવ્યં પ્રદિશામિ નરર્ષભ ।
અમાનુષાન્મહાબાહો દુર્જયાનપિ જેષ્યસિ ॥

મત્તશ્ચૈવ ભવાનાશુ ગૃહ્ણાત્વસ્ત્રમનુત્તમમ્ ।
અનેન ત્વમનીકાનિ ધાર્તરાષ્ટ્રસ્ય ધક્ષ્યસિ ॥

મત્તોઽપિ ત્વં ગૃહાણાસ્ત્રમન્તર્ધાનં પ્રિયં ભમ ।
ઓજસ્તેજોદ્યુતિકરં પ્રસ્વાપનમરાતિનુત્ ॥

મહાત્મના શન્કરેણ ત્રિપુરં નિહતં યાદા ।
તદૈતદસ્ત્રં નિર્મુક્તં યેન દગ્ધા મહાસુરાઃ ॥

ત્વદર્થમુદ્યતં ચેદં મયા સત્યપરાક્રમ । ત્વમર્હો ધારણે ચાસ્ય મેરુપ્રતિમગૌરવ ।

તતોઽર્જુનો મહાબાહુર્વિધિવત્કુરુનન્દનઃ ।
કૌબેરમધિજગ્રાહ દિવ્યમસ્ત્રં મહાબલઃ ॥

તતોઽબ્રવીદ્દેવરાજઃ પાર્થમક્લિષ્ટકારિણમ્ ।
સાન્ત્વયઞ્શ્લક્ષ્ણયાવાચાદિવ્યદુન્દુભિનિઃસ્વનઃ ॥

કુન્તીમાતર્મહાબાહો ત્વમીશાનઃ પુરાતનઃ ।
પરાં સિદ્ધિમનુપ્રાપ્તઃ સાક્ષાદ્દેવગતિં ગતઃ ॥

દેવકાર્યં તુ સુમહત્ત્વયા કાર્યમરિન્દમ ।
આરોઢવ્યસ્ત્વયા સ્વર્ગઃ સજ્જીભવ મહાદ્યુતે ॥

રથો માતલિસંયુક્ત આગતસ્ત્વત્કૃતે મમ ।
તત્ર તેઽહમ્પ્રદાસ્યામિ સર્વાણ્યસ્ત્રાણિ કૌરવ ॥

તાન્દૃષ્ટ્વા લોકપાલાંસ્તુ સમેતાન્ગિરિમૂર્ધનિ ।
જગામ વિસ્મયં ધીમાન્કુન્તીપુત્રો ધનઞ્જયઃ ॥

તતોઽર્જુનો મહાતેજા લોકપાલાન્સમાગતાન્ ।
પૂજયામાસ વિધિવદ્વાગ્ભિરદ્ભિઃ ફલૈરપિ ॥

તતઃ પ્રતિયયુર્દેવાઃ પ્રતિપૂજ્ય ધનઞ્જયમ્ ।
યથાગતેન વિબુધાઃ સર્વે કામં મનોજવાઃ ॥

તતો ઽર્જુનો મુદં લેભે લબ્ધાસ્ત્રઃ પુરુષર્પભઃ ।
કૃતાર્થમથ ચાત્માનં સ મેને પૂર્ણમાનસમ્ ॥