Mahabharata · Chapter 3.31

valgu citrapadaṃ ślakṣṇaṃ yājñaseni tvayā vacaḥ /
uktaṃ tacchrutamasmābhirnāstikyaṃ tu prabhāṣase //

nāhaṃ dharmaphalākāṅkṣī rājaputri carāmbhuta /
dadāmi deyamityeva yaje yaṣṭavyamityuta //

astu vā'tra phalaṃ mā vā kartavyaṃ puruṣeṇa yat /
gṛhe nivasatā kṛṣṇe yathāśakti karomi tat //

dharmaṃ carāmi suśroṇi na dharmaphalakāraṇāt /
āgamānanatikramya satāṃ vṛttamavekṣya ca //

dharma eva manaḥ kṛṣṇe svabhāvāccaiva me dhṛtam / [dharmavāṇijyako hīno jaghanyo dharmavādinām]

na dharmaphalamāpnoti yo dharmaṃ dogdhumicchati /
yaścainaṃ śaṅkate kṛtvā nāstikyātpāpacetanaḥ //

ativādānmadāccaiva mā dharmamabhiśaṅkathāḥ /
dharmātiśaṅkī puruṣastiryaggatiparāyaṇaḥ //

dharmo yasyātiśaṅkyaḥ syādārṣaṃ vā durbalātmanaḥ /
vedācchūdra ivāpeyātsa lokādajarāmarāt //

vedādhyāyī dharmaparaḥ kule jāto manasvini /
sthavireṣu sa yoktavyo rājabhirdharmacāribhiḥ //

pāpīyānsa hi śūdrebhyastaskarebhyo viśiṣyate /
śāstrātigo mandabuddhiryo dharmamatiśaṅkate //

pratyakṣaṃ hi tvayā dṛṣṭa ṛṣirgacchanmahātapāḥ /
mārkaṇḍeyo'prameyātmā dharmeṇa cirajīvitā //

vyāso vasiṣṭho maitreyo nārado lomaśaḥ śukaḥ /
anye ca ṛṣayaḥ sarve dharmeṇaiva sucetasaḥ //

pratyakṣaṃ paśyasi hyetāndivyayogasamanvitān /
śāpānugrahaṇe śaktāndevebhyo'pi garīyasaḥ //

ete hi dharmamevādau varṇayanti sadā'nadhe /
kartavyamamaraprakhyāḥ pratyakṣāgamabuddhayaḥ //

ato nārhasi kalyāṇi dhātāraṃ dharmameva ca /
rajomūḍhena manasā kṣeptuṃ śaṅkitumeva ca //

unmattānmanyate bālaḥ sarvānāgataniścayān /
dharmātiśaṅkī nānyasminpramāṇamadhigacchati //

indriyaprītisambaddhaṃ yadidaṃ lokasākṣikam /
etāvanmanyate bālo mohamanyatra gacchati //

prāyaścittaṃ na tasyāsti yo dharmamatiśaṅkate /
dhyāyansa kṛpaṇaḥ pāpo na lokānpratipadyate //

pramāṇāddhi nivṛtto hi vedaśāstrārthanindakaḥ /
kāmalobhānugo mūḍho narakaṃ pratipadyate //

ārṣaṃ pramāṇamutkrāmya dharmaṃ na pratipālayan /
sarvaśāstrātigo mūḍhaḥ śaṃ janmasu na vindati //

yastu nityaṃ kṛtamatirdharmamevābhipadyate /
aśaṅkamānaḥ kalyāṇi so'mutrānantyamaśnute //

yasya nārṣaṃ pramāṇaṃ syācchiṣṭācāraśca bhāmini /
na vai tasya paro loko nāyamastīti niścayaḥ //

śiṣṭairācaritaṃ dharmaṃ kṛṣṇe māsmātiśaṅkathāḥ /
purāṇamṛṣibhiḥ proktaṃ sarvajñaiḥ sarvadarśibhiḥ //

dharma eva plavo nānyaḥ svargaṃ draupadi gacchatām /
saivaḥ nauḥ sāgarasyeva vaṇijaḥ pāramicchataḥ //

aphalo yadi dharmaḥ syāccarito dharmacāribhiḥ /
apratiṣṭhe tamasyetajjaganmajjedanindite //

nirvāṇaṃ nādhigaccheyurjīveyuḥ paśujīvikām /
vighātenaiva yujyeyurna cārthaṃ kañcidāpnuyuḥ //

tapaśca brahmacaryaṃ ca yajñaḥ svādhyāya eva ca /
dānamārjavametāni yadi syuraphalāni vai //

nācariṣyanpare dharmaṃ pare paratare'pi ca /
dānamārjavametāni yadi syuraphalāni vai //

ṛṣayascaiva devāśca gandharvāsurarākṣasāḥ /
īśvarāḥ kasya hetoste careyurdharmamādṛtāḥ //

phaladaṃ tviha vijñāya dhātāraṃ śreyasi sthitam /
dharmaṃ te'vyacarankṛṣṇe sa hi dharma sanātanaḥ //

sa cāyaṃ saphalo dharmo na dharmo'phala ucyate /
dṛśyante'pi hi vidyānāṃ phalāni tapasāṃ tathā //

tvayyetadvai vijānīhi janma kṛṣṇe yathāśrutam /
vettha cāpi yathā jāto dhṛṣṭadyumnaḥ pratāpavān //

etāvadeva paryāptamupamānaṃ śucismite /
karmaṇāṃ phalamastīti dhīro'lpenāpi tuṣyati //

bahunā'pi hyavidvāṃso naiva tuṣyantyabuddhayaḥ /
teṣāṃ na dhmajaṃ kiñcitpretya karmāsti śarma vā //

karmaṇāmuta puṇyānāṃ pāpānāṃ ca phalodayaḥ /
prabhavaścāpyayaścaiva devaguhyāni bhāmini //

naitāni veda yaḥ kaścinmuhyantyatra prajā imāḥ / [api kalpasahasreṇa na ca śreyo'dhigacchati // ]

rakṣyāṇyetāni devānāṃ gūḍhamāyā hi devatāḥ / kṛśāṅgāḥ subratāścaiva tapasā dagdhakilviṣāḥ /
prasannairmānasairyuktāḥ paśyantyetāni vai dvijāḥ //

na phalādarsanāddharmaḥ śaṅkitavyo na devatāḥ /
yaṣṭavyaṃ ca prayatnena dātavyaṃ cānamūyatā //

karmaṇāṃ phalamastīha tathaitaddharmaśāsanam /
brahmā provāca putrāṇāṃ yadṛṣirveda kāśyapaḥ //

tasmātte saṃśayaḥ kṛṣṇe nīhāra iva naśyatu /
vimṛśya sarvamastīti nāstikyaṃ bhāvamutsṛja //

īśvaraṃ cāpi bhūtānāṃ dhātāraṃ mā ca vai kṣipa /
śikṣasvainaṃ namasvainaṃ mā te'bhūdbuddhirīdṛśī //

yasya prasādāttadbhakto martyo gacchatyamartyatām / uttamāṃ devatāṃ kṛṣṇe mātivocaḥ kathañcana //