Mahabharata · Chapter 3.304

kiṃ tadguhyaṃ na cākhyātaṃ karṇāyehoṣṇaraśminā /
kīdṛśekuṇḍale te ca kavacaṃ racaiva kīdṛśam //

kutaśca kavacaṃ tasyaṃ kuṇḍalecaiva sattama /
etadicchāmyahaṃ śrotuṃ tanme brūhi tapodhana //
vaiśampāyana uvāca /

ahaṃ rājanbravīmyetattasya guhyaṃ vibhāvasoḥ /
yādṛśe kuṇḍale te ca kavacaṃ vaiva yādṛśam //

kuntibhojaṃ purā rājanbrāhmaṇaḥ paryupasthitaḥ /
tigmatejā mahānprāṃśuḥ śmaśrudaṇḍajaṭādharaḥ //

darsanīyo'navadyāṅgastejasā prajvalanniva /
madhupiṅgo madhuravāktapaḥsvādhyāyabhūṣaṇaḥ //

sa rājānaṃ kuntibhojamabravītsumahātapāḥ /
bhikṣāmicchāmi vai bhoktuṃ tava gehe vimatsara //

na me vyalīkaṃ kartavyaṃ tvayā vā tava cānugaiḥ /
evaṃ vatsyāmi te gehe yadi te rocate'nagha //

yathākāmaṃ ca gaccheyamāgaccheyaṃ tathaiva ca /
śayyāsane ca me rājannāparādhyeta kaścana //

tamabravītkuntibhojaḥ prītiyuktamidaṃ vacaḥ /
evamastu parañceti punaścaivamathābravīt //

mama kanyā mahāprājña pṛthā nāma yaśasvinī /
śīlavṛttānvitā sādhvī niyatā'navamāninī //

upasthāsyati sā tvāṃ vai pūjayā'navamatya ca /
tasyāśca śīlavṛttena tuṣṭiṃ samupayāsyasi //

evamuktvā tu taṃ vipramabhipūjya yathāvidhi /
uvāca kanyāmabhyetya pṛthāṃ pṛthulalocanām //

ayaṃ vatse mahābhāgo brāhmaṇo vastumicchati /
mama gehe mayā cāsya tathetyevaṃ pratiśrutam //

tvayi vatse parāyattaṃ brāhmaṇasyābhirādhanam /
tanme vākyamamithyā tvaṃ kartumarhasi karhicit //

ayaṃ tapasvī bhagavānsvādhyāyaniyato dvijaḥ /
yadyadbrūyānmahātejāstattaddeyamātsarāt //

brāhmaṇā hi paraṃ tejo brāhmaṇā hi paraṃ tapaḥ /
brāhmaṇānāṃ namaskāraiḥ sūryo divi virājate //

amānayanhi dāṇḍakyo vātāpiśca mahāsuraḥ / nihato brahmadaṇḍena tālajaṅghastathaiva ca /
vaindhyādriśca samudraśca nadduṣaśca vihiṃsitaḥ //

soyaṃ vatse mahābhāra āhitastvayi sāmpratam /
tvaṃ sadā niyatā kuryā brāhmaṇasyābhirādhanam //

jānāmi praṇidhānaṃ te bālyātprabhṛti nandini /
brāhmaṇeṣviha sarveṣu gurubandhuṣu caiva ha //

tathā preṣyeṣu sarveṣu mitrasambandhimātṛṣu /
mayi caiva yathāvattvaṃsarvamāvṛtya vartase //

na hyatuṣṭo jano'stīha pure cāntaḥpure ca te /
samyagvṛttyā'navadyāṅgi tava bhṛtyajaneṣvapi //

sandeṣṭavyāṃ tu manye tvāṃ dvijātiṃ kopanaṃ prati /
pṛthe bāleti kṛtvā vai sutā cāsimameti ca //

vṛṣṇīnāṃ ca kule jātā śūras dayitā sutā /
dattā prītimatā mahyaṃ pitrā bālā purāsvayam //

vasudevas bhaginī sutānāṃ pravarā mama /
agryamagre pratijñāya tenāsi duhitā mama //

tādṛśe hi kule jātā kule mama vivardhitā /
sukhātsukhamanuprāptā hradāddhradamivāpagā //

dauṣkuleyā viśeṣeṇa kathañcitpragrahaṃ gatāḥ /
bālabhāvādvikurvanti prāyaśaḥ pramadāḥ śubhe //

pṛthe rājakule janma rūpaṃ cāpi tavādbhutam /
tena tenāsi sampannā samupetā ca bhāmini //

sā tvaṃ darpaṃ parityajya dambhaṃ mānaṃ ca bhāmini /
ārādhyavaradaṃ vipraṃ śreyasā yokṣyase pṛthe //

evaṃ prāpsyasi kalyāṇi kalyāṇamanaghe dhruvam / kopite ca dvijaśreṣṭhe kutsnaṃ dahyeta me kulam //