Mahabharata · Chapter 3.303

bhagavantamahaṃ bhakto yathā māṃ vettha gopate /
tathā paramatigmāṃśo nāstyadeyaṃ kathañcana //

na me dārā na meputrā na cātmā suhṛdo na ca /
tatheṣṭā vai sadā bhaktyā yathā tvaṃ gopate mama //

iṣṭānāṃ ca mahātmāno bhaktānāṃ ca na saṃśayaḥ /
kurvanti bhaktimiṣṭāṃ ca jānīṣe tvaṃ ca bhāskara //

iṣṭo bhaktaśca me karṇo na cānyaddaivataṃ divi /
jānīta itivai kṛtvā bhagavānāha maddhitam //

bhūyaśca śirasā yāce prasādya ca punaḥpunaḥ /
iti bravīmi tigmāṃśo tvaṃ tu me kṣantumarhasi //

bibhemi na tathā mṛtyoryathā bibhye'nṛtādaham /
viśeṣeṇa dvijātīnāṃ sarveṣāṃ sarvadā satām //

pradāne jīvitasyāpi na me'trāsti vicāraṇā /
yacca māmāttha deva tvaṃ pāṇḍavaṃ phalgunaṃ prati //

vyetu santāpajaṃ duḥkhaṃ tava bhāskara mānasam /
arjunapratimaṃ caiva vijeṣyāmi raṇe'rjunam //

tavāpi viditaṃ deva mamāpyastrabalaṃ mahat /
jāmadagnyādupāttaṃ yattathā droṇānmahātmanaḥ //

idaṃ tvamanujānīhi suraśreṣṭha vrataṃ mama /
bhikṣate vajriṇe dadyāmapi jīvitamātmanaḥ //
sūrya uvāca /

yadi tāta dadāsyete vajriṇe kuṇḍale śubhe /
tvamapyenamatho brūyā vijayārthaṃ mahābala //

niyamena pradadyāstvaṃ kuṇḍalevai śatakratoḥ /
avadhyo hyasi bhūtānāṃ kuṇḍalābhyāṃ samanvitaḥ //

arjunana vināśaṃ hi tava dānavasūdanaḥ /
prārtayāno raṇe vatsa kuṇḍale te jihīrṣati //

sa tvamapyenamārādhya sūnṛtābhiḥ punaḥ punaḥ /
abhyarthayethā deveśamamoghārthaṃ purandaram //

amoghāṃ dehi me śaktimamitravinibarhiṇīm /
dāsyāmi te sahasrākṣa kuṇḍale varma cottamam //

ityeva niyamena tvaṃ dadyāḥ śakrāya kuṇḍale /
tayā tvaṃ karṇa sangrāme haniṣyasi raṇe ripūn //

nāhatvā hi mahābāho śatrūneti karaṃ punaḥ /
sā śaktirdevarājasya śataśo'tha sahasraśaḥ //
vaiśampāyana uvāca /

evamuktvā sahasrāṃśuḥ sahasā'ntaradhīyata /
karṇastu bubudhe rājansvapnānte pravyathanniva //

pratibuddhastu rādheyaḥ svapnaṃ sañcintya bhārata /
cakāra niścayaṃ rājañśaktyarthaṃ vadatāṃvara //

yadi māmindra āyāti kuṇḍalārthaṃ parantapa /
śaktyā tasmai pradāsyāmi kuṇḍale varma caiva ha //

sa kṛtvā prātarutthāya kāryāṇi bharatarṣabha /
brāhmaṇānvācayitvā ca yathākāryamupākramat //

vidhinā rājaśārdūla muhūrtamajapattadā /
tataḥ sūryāya japyānte karṇaḥ svapnaṃ nyavedayat //

yathā dṛṣṭaṃ yathātattvaṃ yathoktamubhayornisi /
tatsarvamānupūrvyeṇa śaśaṃsāsmai vṛṣastadā //

tacchrutvā bhagavāndevo bhānuḥ svarbhānusūdanaḥ /
uvāca taṃ tathetyeva karṇaṃ sūryaḥ smayanniva //

tatastattvamiti jñātvā rādheyaḥ paravīrahā / śaktimevābhikāṅkṣanvai vāsavaṃ pratyapālayat //