મહાભારત · અધ્યાય 3.303

ભગવન્તમહં ભક્તો યથા માં વેત્થ ગોપતે ।
તથા પરમતિગ્માંશો નાસ્ત્યદેયં કથઞ્ચન ॥

ન મે દારા ન મેપુત્રા ન ચાત્મા સુહૃદો ન ચ ।
તથેષ્ટા વૈ સદા ભક્ત્યા યથા ત્વં ગોપતે મમ ॥

ઇષ્ટાનાં ચ મહાત્માનો ભક્તાનાં ચ ન સંશયઃ ।
કુર્વન્તિ ભક્તિમિષ્ટાં ચ જાનીષે ત્વં ચ ભાસ્કર ॥

ઇષ્ટો ભક્તશ્ચ મે કર્ણો ન ચાન્યદ્દૈવતં દિવિ ।
જાનીત ઇતિવૈ કૃત્વા ભગવાનાહ મદ્ધિતમ્ ॥

ભૂયશ્ચ શિરસા યાચે પ્રસાદ્ય ચ પુનઃપુનઃ ।
ઇતિ બ્રવીમિ તિગ્માંશો ત્વં તુ મે ક્ષન્તુમર્હસિ ॥

બિભેમિ ન તથા મૃત્યોર્યથા બિભ્યેઽનૃતાદહમ્ ।
વિશેષેણ દ્વિજાતીનાં સર્વેષાં સર્વદા સતામ્ ॥

પ્રદાને જીવિતસ્યાપિ ન મેઽત્રાસ્તિ વિચારણા ।
યચ્ચ મામાત્થ દેવ ત્વં પાણ્ડવં ફલ્ગુનં પ્રતિ ॥

વ્યેતુ સન્તાપજં દુઃખં તવ ભાસ્કર માનસમ્ ।
અર્જુનપ્રતિમં ચૈવ વિજેષ્યામિ રણેઽર્જુનમ્ ॥

તવાપિ વિદિતં દેવ મમાપ્યસ્ત્રબલં મહત્ ।
જામદગ્ન્યાદુપાત્તં યત્તથા દ્રોણાન્મહાત્મનઃ ॥

ઇદં ત્વમનુજાનીહિ સુરશ્રેષ્ઠ વ્રતં મમ ।
ભિક્ષતે વજ્રિણે દદ્યામપિ જીવિતમાત્મનઃ ॥
સૂર્ય ઉવાચ ।

યદિ તાત દદાસ્યેતે વજ્રિણે કુણ્ડલે શુભે ।
ત્વમપ્યેનમથો બ્રૂયા વિજયાર્થં મહાબલ ॥

નિયમેન પ્રદદ્યાસ્ત્વં કુણ્ડલેવૈ શતક્રતોઃ ।
અવધ્યો હ્યસિ ભૂતાનાં કુણ્ડલાભ્યાં સમન્વિતઃ ॥

અર્જુનન વિનાશં હિ તવ દાનવસૂદનઃ ।
પ્રાર્તયાનો રણે વત્સ કુણ્ડલે તે જિહીર્ષતિ ॥

સ ત્વમપ્યેનમારાધ્ય સૂનૃતાભિઃ પુનઃ પુનઃ ।
અભ્યર્થયેથા દેવેશમમોઘાર્થં પુરન્દરમ્ ॥

અમોઘાં દેહિ મે શક્તિમમિત્રવિનિબર્હિણીમ્ ।
દાસ્યામિ તે સહસ્રાક્ષ કુણ્ડલે વર્મ ચોત્તમમ્ ॥

ઇત્યેવ નિયમેન ત્વં દદ્યાઃ શક્રાય કુણ્ડલે ।
તયા ત્વં કર્ણ સન્ગ્રામે હનિષ્યસિ રણે રિપૂન્ ॥

નાહત્વા હિ મહાબાહો શત્રૂનેતિ કરં પુનઃ ।
સા શક્તિર્દેવરાજસ્ય શતશોઽથ સહસ્રશઃ ॥
વૈશમ્પાયન ઉવાચ ।

એવમુક્ત્વા સહસ્રાંશુઃ સહસાઽન્તરધીયત ।
કર્ણસ્તુ બુબુધે રાજન્સ્વપ્નાન્તે પ્રવ્યથન્નિવ ॥

પ્રતિબુદ્ધસ્તુ રાધેયઃ સ્વપ્નં સઞ્ચિન્ત્ય ભારત ।
ચકાર નિશ્ચયં રાજઞ્શક્ત્યર્થં વદતાંવર ॥

યદિ મામિન્દ્ર આયાતિ કુણ્ડલાર્થં પરન્તપ ।
શક્ત્યા તસ્મૈ પ્રદાસ્યામિ કુણ્ડલે વર્મ ચૈવ હ ॥

સ કૃત્વા પ્રાતરુત્થાય કાર્યાણિ ભરતર્ષભ ।
બ્રાહ્મણાન્વાચયિત્વા ચ યથાકાર્યમુપાક્રમત્ ॥

વિધિના રાજશાર્દૂલ મુહૂર્તમજપત્તદા ।
તતઃ સૂર્યાય જપ્યાન્તે કર્ણઃ સ્વપ્નં ન્યવેદયત્ ॥

યથા દૃષ્ટં યથાતત્ત્વં યથોક્તમુભયોર્નિસિ ।
તત્સર્વમાનુપૂર્વ્યેણ શશંસાસ્મૈ વૃષસ્તદા ॥

તચ્છ્રુત્વા ભગવાન્દેવો ભાનુઃ સ્વર્ભાનુસૂદનઃ ।
ઉવાચ તં તથેત્યેવ કર્ણં સૂર્યઃ સ્મયન્નિવ ॥

તતસ્તત્ત્વમિતિ જ્ઞાત્વા રાધેયઃ પરવીરહા । શક્તિમેવાભિકાઙ્ક્ષન્વૈ વાસવં પ્રત્યપાલયત્ ॥