Mahabharata · Chapter 3.279

mārīcastvatha sambhrānto dṛṣṭvā rāvaṇamāgatam /
pūjayāmāsa satkāraiḥ phalamūlādibhistataḥ //

viśrāntaṃ cainamāsīnamanvāsīnaḥ sa rākṣasaḥ /
uvāca praśritaṃ vākyaṃ vākyajño vākyakovidam //

na te prakṛtimānvarṇaḥ kaccitkṣemaṃ pure tava /
kaccitprakṛtayaḥ sarvā bhajante tvāṃ yathā purā //

kimihāgamane cāpi kāryaṃ te rākṣaseśvara /
kṛtamityeva tadviddhi yadyapi syātsuduṣkaram //

śaśaṃsa rāvaṇastasmai tatsarvaṃ rāmaceṣṭitam /
samāsenaiva kāryāṇi krodhāmarṣasamanvitaḥ //

mārīcastvabravīcchratvā samāsenaiva rāvaṇam /
alaṃ te rāmamāsādya vīryajño hyasmi tasya vai //

bāṇavegaṃ hi kastasya śaktaḥ soḍhuṃ mahātmanaḥ / pravrajyāyāṃ hi me hetuḥ sa eva puruṣarṣabhaḥ /
vināśamukhametatte kenākhyātaṃ durātmanā //

tamuvācātha sakrodho rāvaṇaḥ paribhartsayan /
akurvato'smadvacanaṃ syānmṛtyurapi te dhruvam //

marīcaścintayāmāsa viśiṣṭānmaraṇaṃ varam /
avaśyaṃ maraṇe prāpte kariṣyāmyasya yanmatam //

tatastaṃ pratyuvācātha mārīco rakṣasāṃvaram /
kiṃ te sāhyāṃ mayā kāryaṃ kariṣyāmyavaśopi tat //

tamabravīddaśagrīvo gaccha sītāṃ pralobhaya /
ratnaśṛṅgo mṛgo bhūtvā ratnacitratanūruhaḥ //

dhruvaṃ sītā samālakṣyatvāṃ rāmaṃ codayiṣyati /
apakrānte ca kākutsthe sītā vaśyā bhaviṣyati //

tāmādāyāpaneṣyāmi tataḥ sa nabhaviṣyati /
bhāryāviyogāddurbuddhiretatsāhyaṃ kuruṣva me //

ityevamuktomārīcaḥ kṛtvodakamathātmanaḥ /
rāvaṇaṃ purato yāntamanvagacchatsuduḥkhitaḥ //

tatastasyāśramaṃ gatvārāmasyākliṣṭakarmaṇaḥ /
cakratustadyathā sarvamubhau yatpūrvamantritam //

rāvaṇastu yatirbhūtvā muṇḍaḥ kuṇḍītridaṇḍadhṛt /
mṛgaścabhūtvāmārīcastaṃ deśamupajagmatuḥ //

darśayāmāsa mārīco vaidehīṃ mṛgarūpadhṛt /
codayāmāsa tasyārthe sā rāmaṃ vidhicoditā //

rāmastasyāḥ priyaṃ kurvandhanurādāya satvaraḥ /
rakṣārthe lakṣmaṇaṃ nyasya prayayau mṛgalipsayā //

sa dhanvī baddhatūṇīraḥ khaṅgagodhāṅgulitravān /
anvadhāvanmṛgaṃ rāmo rudrastārāmṛgaṃ yathā //

so'ntarhitaḥ punastasya darśanaṃ rākṣaso vrajan /
cakarṣa mahadadhvānaṃ rāmastaṃ vubudhe tataḥ //

niśācaraṃ viditvā taṃ rāghavaḥ pratibhānavān /
amoghaṃ śaramādāya jaghāna mṛgarūpiṇam //

sa rāmavāṇābhihataḥ kṛtvā rāmasvaraṃ tadā /
hā sīte lakṣmaṇetyevaṃ cukrośārtasvareṇa ha //

śuśrāva tasya vaidehī tatastāṃ karuṇāṃ giram /
sāprāpatattataḥ sītā tāmuvācātha lakṣmaṇaḥ //

alaṃ te śaṅkayā bhīru ko rāmaṃ prahariṣyati /
muhūrtāddrakṣyase rāmaṃ bhartāraṃ tvaṃ śucismitam //

ityuktā sā prarudatī paryaśaṅkata lakṣmaṇam /
hatā vai strīsvabhāvena śuddhacāritrabhūṣaṇā //

sā taṃ paruṣamārabdhā vaktuṃ sādhvī pativratā /
naiṣa kāmo bhavenmūḍha yaṃ tvaṃ prārthayase hṛdā //

apyahaṃśastramādāya hanyāmātmānamātmanā /
pateyaṃ giriśṛṅgādvā viśeyaṃ vā hutāśanam //

rāmaṃ bhartāramutsujyana tvahaṃ tvāṃ kathañcana /
nihīnamupatiṣṭheyaṃ śārdūlī kroṣṭukaṃ yathā //

etādṛśaṃ vacaḥ śrutvā lakṣmaṇaḥ priyarāghnava /
pidhāyakarṇau sadvṛttaḥ prasthito yena rāghavaḥ //

sa rāmasya padangṛhya prasasāra dhanurdharaḥ /
avīkṣamāṇo vimboṣṭhīṃ prayayau lakṣmaṇastadā //

etasminnantare rakṣo rāvaṇaḥ pratyadṛśyata /
abhavyo bhavyarūpeṇa bhasmacchanna ivānalaḥ //

yativepapraticchanno jihīrṣustāmaninditām /
upāgacchatsa vaidehīṃ rāvaṇaḥ pāpaniścayaḥ //

sā tamālakṣyasamprāptaṃ dharmajñā janakātmajā /
nimantrayāmāsa tadā phalamūlāśanādibhiḥ //

avamatyatataḥ sarvaṃ svaṃ rūpaṃ pratyapadyata /
sāntvayāmāsa vaidehīṃ kāmī rākṣasapuṅgavaḥ //

sīte rākṣasarājo'haṃrāvaṇo nāma viśrutaḥ /
mama laṅkāpurī nāmnā ramyā pāre mahodadheḥ //

tatra tvaṃ naranārīṣu śobhiṣyasi mayā saha /
bhāryā me bhava suśroṇi tāpasaṃ tyaja rāghavam //

evamādīni vākyāni śrutvā tasyātha jānakī /
pidhāya karṇau suśroṇī maivamityabravīdvacaḥ //

prapateddyauḥ sanakṣatrā pṛthivī śakalībhavet /
śuṣyettoyanidhau toyaṃ candraḥ śītāṃśutāṃ tyajet //

uṣṇāṃśutvamatho jahyādādityo vahniruṣṇatām /
tyaktvāśaityaṃ bhajennāhaṃ tyajeyaṃraghunandanam //

kathaṃ hi bhinnakaraṭaṃ padminaṃ vanagocaram /
upasthāya mahānāgaṃ kareṇuḥ sūkaraṃ spṛśet //

kathaṃ hi pītvā mādhvīkaṃ pītvā ca madhumādhavīm /
lobhaṃ sauvīrake kuryānnārī kāciditi smareḥ //

iti sā taṃ samābhāṣya praviveśāśramaṃ tataḥ /
krodhātprasphuramāṇauṣṭhī vidhunvānā karau muhuḥ //

tāmadhidrutya suśroṇīṃ rāvaṇaḥ pratyaṣedhayat //

bhartsayitvātu rūkṣeṇa svareṇa gatacetanām /
mūrdhajeṣu nijagrāha ūrdhvamācakrame tataḥ //

tāṃ dadarśa tato gṛdhro jaṭāyurgirigocaraḥ / rudatīṃ rāmarāmeti hiyamāṇāṃ tapasvinīm //