Mahabharata · Chapter 3.274

evaṃ hṛtāyāṃ kṛṣṇāyāṃ prāpya kleśamanuttamam /
ata ūrdvaṃ naravyāghrāḥ kimakurvata pāṇḍavāḥ //
vaiśampāyana uvāca /

evaṃ kṛṣṇāṃ mokṣayitvāvinirjitya jayadratham /
āsāñcakre munigaṇairdharmarājo yudhiṣṭiraḥ //

teṣāṃ madhyemaharṣīṇāṃ śṛṇvatāmanuśocatām /
mārkaṇḍeyamidaṃ vākyamabravītpāṇḍunandanaḥ //

bhagavandevarṣīṇāṃ tvaṃ khyāto bhūtabhaviṣyavit /
saṃśayaṃ paripṛcchami cchindhi me hṛdi saṃsthitam //

drupadasya sutā hyeṣā vedimadhyātsamutthitā /
ayonijā mahābhāgāsnuṣā pāṇḍormahātmanaḥ //

manye kālaśca bhagavāndaivaṃ ca duratikramam /
bhavitavyaṃ ca bhūtānāṃ yas nāsti vyatikramaḥ //

kathaṃ hi patnīmasmākaṃ dharmajñāṃ dharmacāriṇīm /
saṃspṛśedīdṛśo bhāvaḥ śuciṃ stainyamivānṛtam //

na hi pāpaṃ kṛtankiñcitkarma vā ninditaṃ kvacit /
draupadyā brāhmaṇeṣveva dharmaḥ sucarito mahān //

tāṃ jahāra balādrājā mūḍhabuddhirjayadrathaḥ /
tasyāḥ saṃharaṇātpāpaḥ śirasaḥ keśavāpanam //

parājayaṃ ca sangrāme sasahāḥ samāptavān /
pratyāhṛtā tathā'smābhirhatvā tatsaindhavaṃ balam //

taddāraharaṇaṃ prāptamasmābhiravitarkitam /
duḥkhaścāyaṃ vane vāso mṛgayāyāṃ ca jīvikā //

hiṃsā ca mṛgajātīnāṃ vanaukobhirvanaukasām /
jñātibhirvipravāsaśca mithyāvyavasitairiyam //

asti nūnaṃ mayā kaścidalpabhāgyataro naraḥ / bhavatā dṛṣṭapūrvo vā śrutapūrvo'pi vā kvacit //