Mahabharata · Chapter 3.266

kā tvaṃ kadambasya vinamya śākhāṃ kimāśrame tiṣṭhasi śobhamānā /
dedīpyamānā'gniśikheva naktaṃ vyādhūyamānā pavanena sūbhrūḥ //

atīva rūpeṇa samanvitā tvaṃ na cāpyaraṇyeṣu bibheṣi kinnu /
devī nu yakṣī yadidānavī vā varāpsarā daityavarāṅganā vā //

vapuṣmatī voragarājakanyā vanecarī vā kṣaṇadācarastrī /
tvaṃ devarājño varuṇasya patnī yamasya somasya dhaneśvarasya //

dhāturvidhātuḥ saviturvibhorvā śakrasya vā tvaṃ sadanātprapannā /
na hyeva naḥ pṛcchasi ye vayaṃ sma na cāpi jānīma taveha nātham //

vayaṃ hi mānaṃ tava vardhayantaḥ pṛcchāma bhadreprabhavaṃ prabhuṃ ca /
ācakṣva bandhūṃśca patiṃ kulaṃ ca jātiṃ ca yaccegaha karoṣi kāryam //

ahaṃ tu rājñaḥ surathasya putro yaṃ koṭikāśyeti vidurmanuṣyāḥ /
vaśyendriyaḥ satyaratirvaroru vṛddhopasevī gurupūjakaśca //

asau tu yastiṣṭhatikāñcanāṅge tathe huto'gniścayane yathaiva /
tarigartarājaḥ kamalāyatākṣaḥ kṣemankaro nāma sa eṣa vīraḥ //

asmātparastveṣa mahādhanuṣmā- nputraḥ kulindādhipatervariṣṭhaḥ /
nirīkṣate tvāṃ vipulāyatākṣaḥ supuṣpitaḥ parvatavāsanityaḥ //

asau tu yaḥ puṣkariṇīsamīpe śyāmo yuvā tiṣṭhati darśanīyaḥ /
ikṣvākurājaḥ subalasya putraḥ sa eva hantā dviṣatāṃ sugātri //

yasyānuyātraṃ dhvajinaḥ prayānti sauvīrakā dvādaśarājaputrāḥ /
śoṇāśvayukteṣu ratheṣu sarve masveṣu dīptā iva ivyavāhāḥ //

aṅgārakaḥ kuñjaro guptakaśca śruñjayaḥ sañjayasupravṛddhau /
prabhankaro'tha bhramaro raviśca śūraḥ pratāpaḥkuhanaśca nāma //

yaṃ ṣaṭsahasrā rathino'nuyānti nāgā hayāścaiva padātinaśca /
jayadratho nāma yadi śrutaste sauvīrarājaḥ subhage sa eṣaḥ //

tasyāpare bhrātaro'dīnasatvā balāhakānīkavidāraṇādyāḥ /
sauvīravīrāḥ pravarā yuvāno rājānamete balino'nuyānti //

etaiḥ sahāyairupayāti rājā marudgaṇairindra ivābhiguptaḥ /
ajānatāṃ khyāpaya naḥ sukeśi kasyāsi bhāryā duhitā ca kasya //