Mahabharata · Chapter 3.263

vasatsvevaṃ vane teṣu pāṇḍaveṣu mahātmasu /
ramamāṇaeṣu citrābiḥ kathābhirmunibhiḥ saha //

sūryadattākṣayānnena kṛṣṇāyā bhojanāvadhi / brāhmaṇāṃstarpamāṇeṣu ye cānnārthamupāgatāḥ /
āraṇyānāṃ mṛgāṇāṃ ca māṃsairnānāvidhairapi //

dhārtarāṣṭrā durātmānaḥ sarve duryodhanādayaḥ /
kathaṃ teṣvanvavartanta pāpācārā mahāmune //

daḥśāsanasya karṇasya śakuneśca mate sthitāḥ /
etadācakṣva bhagavanvaiśampāyana pṛcchataḥ //
vaiśampāyana uvāca /

śrutvā teṣāṃ tathā vṛttiṃ nagare vasatāmiva /
duryodhano mahārāja teṣu pāpamarocayat //

tathā tairnikṛtiprajñaiḥ karṇaduḥśāsanādibhiḥ /
nānopāyairadhaṃ teṣu cintayatsu durātmasu //

abhyāgacchatsa dharmātmā tapasvī kasumahāyaśāḥ /
śiṣyāyutasamopeto durvāsā nāma kāmataḥ //

tamāgatamabhiprekṣya muniṃ paramakopanam /
sahito bhrātṛbhiḥ śrīmānātithyena nyamantrayat //

vidhivatpūjayāmāsa svayaṃ kinkaravatsthitaḥ /
ahāni katicittatra tasthau sa munisattamaḥ //

taṃ ca paryacaradrājā divārātramatandritaḥ /
duryodhano mahārāja śāpāttasya viśaṅkitaḥ //

kṣudhito'smi dadasvānnaṃ śīghraṃ mama narādhipa /
ityuktvā gacchati snātuṃ pryāgaccati vai cirāt //

na bhokṣyāmyadyame nāsti kṣudhetyuktvaityadarśanam /
akasmādetya ca brūte bhojanayāsmāṃstvarānvitaḥ //

kadācicca niśīthe sa utthāya nikṛtau sthitaḥ /
pūrvavatkārayitvā'nnaṃ na bhuṅkte garhayansma saḥ //

vartamāne tathā tasminyadā duryodhano nṛpaḥ /
vikṛtiṃ naiti na krodhaṃ tadā tuṣṭo'bhavanmuniḥ //

āhacainaṃ durādharṣo varado'smīti bhārata //

varaṃ varaya bhadraṃ te yatte manasi vartate /
mayi prīte tu yaddharmyaṃ nālabhyaṃ vidyate tava //
vaiśampāyana uvāca /

etacchrutvā vacastasya maharṣerbhāvitātmanaḥ /
amanyata punarjātamātmānaṃ sa suyodhanaḥ //

prāgeva mantritaṃ cāsītkarṇaduḥśāsanādibhiḥ /
yācanīyaṃ munestuṣṭāditi niścitya durmatiḥ //

atiharṣānvito rājanvaramenamayācata /
śiṣyaiḥ saha mama brahmanyathā jāto'tithirbhavān //

asmatkule mahārājo jyeṣṭhaḥ śreṣṭho yudhiṣṭhiraḥ / vane vasati dharmātmā bhrātṛbhiḥ parivāritaḥ /
guṇavāñśīlasampannastasya tvamatithirbhava //

yadā ca rājaputrī sā sukumārī yaśasvinī /
bhojayitvā dvijānsarvānpatīṃśca varavarṇinī //

viśrāntā ca svayaṃ bhuktvā sukhāsīnā bhavedyadā /
tadā tvaṃ tatragacchethā yadyanugrāhyatā mayi //

tathā kariṣye tvatprītyetyevamuktvā suyodhanam /
durvāsā apiviprendro yathāgatamagāttataḥ //

kṛtārthamapi cātmānaṃ tadā mene suyodhanaḥ /
kareṇa ca karaṃ gṛhya karṇasya mudito bhṛśam //

karṇopi bhrātṛsahitamityuvāca nṛpaṃ mudā / duṣṭyā kāmaḥ susaṃvṛttodiṣṭyā kaurava vardhase /
diṣṭyā te śatravo magnā dustare vyasanārṇave //

durvāsaḥkrodhaje vahnau patitāḥ pāṇḍunandanāḥ /
svaireva te mahāpāpairgatā vai dustaraṃ tamaḥ //
vaiśampāyu uvāca /

itthaṃ te nikṛtiprajñā rājanduryodhanādayaḥ / hasantaḥ prītamanaso jagmuḥ svaṃsvaṃ niketanam //