Mahabharata · Chapter 3.254

evaṃ gateṣu pārtheṣu vane tasminmahātmasu /
dhārtarāṣṭrā maheṣvāsāḥ kimakurvata sattamāḥ //

karṇo vaikartanaścaiva śakuniśca mahābalaḥ /
bhīṣmadroṇakṛpāścaiva tanme śaṃsitumarhasi //
vaiśampāyana uvāca /

evaṃ gateṣu pārtheṣu visṛṣṭe ca suyodhane / āgate hāstinapuraṃ mokṣite pāṇḍunandanaiḥ /
bhīṣmo'bravīnmahārāja dhārtarāṣṭramidaṃ vaca //

uktaṃ tāta mayā pūrvaṃ gacchataste tapovanam /
vacanaṃ te na rucitaṃ mama tanna kṛtaṃ ca te //

tataḥ prāptaṃ tvayā vīra grahaṇaṃ śatrubhirbalāt /
mokṣitaścāsi dharmajñaiḥ pāṇḍavairna ca lajjase //

pratyakṣaṃ tava gāndhāre sasainyas viśāmpate /
sūtaputro'payādbhīto gandharvāṇāṃ tadā raṇāt //

krośatastava rājendra sasainyasya nṛpātmaja / vyapāyātpṛṣṭhatastasmātprekṣamāṇaḥ punaḥpunaḥ //

dṛṣṭaste vikramaścaiva pāṇḍavānāṃ mahātmanām /
karṇasya ca mahābāho sūtaputrasya durmate //

na cāpi pādabhākkarṇaḥ pāṇḍavānāṃ mahātmanām /
dhanurvede ca śaurye ca dharme vā dharmavatsala //

tasmādahaṃ kṣamaṃ manye pāṇḍavaistairmahātmabhiḥ /
rasandhiṃ sandhividāṃśreṣṭha kulasyāsya vivṛddhaye //

evamuktaśca bhīṣmeṇa dhārtarāṣṭro janeśvaraḥ /
prahasya sahasā rājanvipratasthe sasaubalaḥ //

taṃ tu prasthitamājñāya karṇaduḥśāsanādayaḥ /
anujagmurmaheṣvāsā dhārtarāṣṭraṃ mahābalam //

tāṃstu samprasthitāndṛṣṭvā bhīṣmaḥ kurupitāmahaḥ /
lajjayā vrīḍito rājañjagāma svaṃ niveśanam //

gate bhīṣme mahārāja dhārtarāṣṭro janeśvaraḥ /
punarāgamya taṃ deśamamantrayata mantribhiḥ //

kimasmākaṃ bhavecchreyaḥ kiṃ kāryamavaśiṣyate /
kathaṃ ca sukṛtaṃ tatsyānmantrayāmāsa bhārata //
[*karṇa uvāca /

duryodhana nibodhedaṃ yattvāṃ vakṣyāmi kaurava /
bhīṣmosmānnindati sadā pāṇḍavāṃśca praśaṃsati //

tvadveṣācca mahābāho māmapi dveṣṭumarhati /
vigarhate ca māṃ nityaṃ tvatsamīpe nareśvara //

so'haṃ bhīṣmavacastadvai na mṛṣyāmīha bhārata /
tvatsamaṃ yaduktaṃ ca bhīṣmeṇāmitrakarśana //

pāṇḍavānāṃ yaśo rājaṃstava nindāṃ ca bhārata /
anujānīhi māṃ rājansabhṛtyabalavāhanam //

jeṣyāmi pṛthivīṃ rājansaśailavanakānanām /
jitā ca pāṇḍavairbhūmiścaturbhirbalaśālibhiḥ //

tāmahaṃ te vijeṣyāmi eka eva na saṃśayaḥ /
sampaśyatu sudurbuddhirbhīṣmaḥ kurukulādhamaḥ //

anindyaṃ nindate yo hi apraśaṃsyaṃ praśaṃsati /
sa paśyatu balaṃ me'dya ātmānaṃ tu vigarhatu //

anujānīhi māṃ rājandhruvo hi vijayastava /
pratijānāmi te satyaṃ rājannāyudhamālabhe //

tacchrutvā tu vaco rājankarṇasya bharatarṣabha /
prītyā paramayā yuktaḥ karṇamāha narādhipaḥ //

dhanyosmyanugṛhītosmi yasya me tvaṃ mahābalaḥ /
hiteṣu vartase nityaṃ saphalañjanma cādya me //

yadā ca manyase vīra sarvaśatrunibarhaṇam /
tadā nirgaccha bhadraṃ te hyanuśādhi ca māmiti //

evamuktastadā karṇo dhārtarāṣṭreṇa dhīmatā /
sarvamajñāpayāmāsa prāyātrikamarindama //

prayayau ca maheṣvāso nakṣatre śubhadaivate /
śubhetithau muhūrte ca pujyamāno dvijātibhiḥ //

maṅgalaiśca śubhaiḥ snāto vāgbhiścāpi prapūjitaḥ / nādayanrathaghoṣeṇa trailokyaṃ sacarācaram //