મહાભારત · અધ્યાય 3.254

એવં ગતેષુ પાર્થેષુ વને તસ્મિન્મહાત્મસુ ।
ધાર્તરાષ્ટ્રા મહેષ્વાસાઃ કિમકુર્વત સત્તમાઃ ॥

કર્ણો વૈકર્તનશ્ચૈવ શકુનિશ્ચ મહાબલઃ ।
ભીષ્મદ્રોણકૃપાશ્ચૈવ તન્મે શંસિતુમર્હસિ ॥
વૈશમ્પાયન ઉવાચ ।

એવં ગતેષુ પાર્થેષુ વિસૃષ્ટે ચ સુયોધને । આગતે હાસ્તિનપુરં મોક્ષિતે પાણ્ડુનન્દનૈઃ ।
ભીષ્મોઽબ્રવીન્મહારાજ ધાર્તરાષ્ટ્રમિદં વચ ॥

ઉક્તં તાત મયા પૂર્વં ગચ્છતસ્તે તપોવનમ્ ।
વચનં તે ન રુચિતં મમ તન્ન કૃતં ચ તે ॥

તતઃ પ્રાપ્તં ત્વયા વીર ગ્રહણં શત્રુભિર્બલાત્ ।
મોક્ષિતશ્ચાસિ ધર્મજ્ઞૈઃ પાણ્ડવૈર્ન ચ લજ્જસે ॥

પ્રત્યક્ષં તવ ગાન્ધારે સસૈન્યસ્ વિશામ્પતે ।
સૂતપુત્રોઽપયાદ્ભીતો ગન્ધર્વાણાં તદા રણાત્ ॥

ક્રોશતસ્તવ રાજેન્દ્ર સસૈન્યસ્ય નૃપાત્મજ । વ્યપાયાત્પૃષ્ઠતસ્તસ્માત્પ્રેક્ષમાણઃ પુનઃપુનઃ ॥

દૃષ્ટસ્તે વિક્રમશ્ચૈવ પાણ્ડવાનાં મહાત્મનામ્ ।
કર્ણસ્ય ચ મહાબાહો સૂતપુત્રસ્ય દુર્મતે ॥

ન ચાપિ પાદભાક્કર્ણઃ પાણ્ડવાનાં મહાત્મનામ્ ।
ધનુર્વેદે ચ શૌર્યે ચ ધર્મે વા ધર્મવત્સલ ॥

તસ્માદહં ક્ષમં મન્યે પાણ્ડવૈસ્તૈર્મહાત્મભિઃ ।
રસન્ધિં સન્ધિવિદાંશ્રેષ્ઠ કુલસ્યાસ્ય વિવૃદ્ધયે ॥

એવમુક્તશ્ચ ભીષ્મેણ ધાર્તરાષ્ટ્રો જનેશ્વરઃ ।
પ્રહસ્ય સહસા રાજન્વિપ્રતસ્થે સસૌબલઃ ॥

તં તુ પ્રસ્થિતમાજ્ઞાય કર્ણદુઃશાસનાદયઃ ।
અનુજગ્મુર્મહેષ્વાસા ધાર્તરાષ્ટ્રં મહાબલમ્ ॥

તાંસ્તુ સમ્પ્રસ્થિતાન્દૃષ્ટ્વા ભીષ્મઃ કુરુપિતામહઃ ।
લજ્જયા વ્રીડિતો રાજઞ્જગામ સ્વં નિવેશનમ્ ॥

ગતે ભીષ્મે મહારાજ ધાર્તરાષ્ટ્રો જનેશ્વરઃ ।
પુનરાગમ્ય તં દેશમમન્ત્રયત મન્ત્રિભિઃ ॥

કિમસ્માકં ભવેચ્છ્રેયઃ કિં કાર્યમવશિષ્યતે ।
કથં ચ સુકૃતં તત્સ્યાન્મન્ત્રયામાસ ભારત ॥
[*કર્ણ ઉવાચ ।

દુર્યોધન નિબોધેદં યત્ત્વાં વક્ષ્યામિ કૌરવ ।
ભીષ્મોસ્માન્નિન્દતિ સદા પાણ્ડવાંશ્ચ પ્રશંસતિ ॥

ત્વદ્વેષાચ્ચ મહાબાહો મામપિ દ્વેષ્ટુમર્હતિ ।
વિગર્હતે ચ માં નિત્યં ત્વત્સમીપે નરેશ્વર ॥

સોઽહં ભીષ્મવચસ્તદ્વૈ ન મૃષ્યામીહ ભારત ।
ત્વત્સમં યદુક્તં ચ ભીષ્મેણામિત્રકર્શન ॥

પાણ્ડવાનાં યશો રાજંસ્તવ નિન્દાં ચ ભારત ।
અનુજાનીહિ માં રાજન્સભૃત્યબલવાહનમ્ ॥

જેષ્યામિ પૃથિવીં રાજન્સશૈલવનકાનનામ્ ।
જિતા ચ પાણ્ડવૈર્ભૂમિશ્ચતુર્ભિર્બલશાલિભિઃ ॥

તામહં તે વિજેષ્યામિ એક એવ ન સંશયઃ ।
સમ્પશ્યતુ સુદુર્બુદ્ધિર્ભીષ્મઃ કુરુકુલાધમઃ ॥

અનિન્દ્યં નિન્દતે યો હિ અપ્રશંસ્યં પ્રશંસતિ ।
સ પશ્યતુ બલં મેઽદ્ય આત્માનં તુ વિગર્હતુ ॥

અનુજાનીહિ માં રાજન્ધ્રુવો હિ વિજયસ્તવ ।
પ્રતિજાનામિ તે સત્યં રાજન્નાયુધમાલભે ॥

તચ્છ્રુત્વા તુ વચો રાજન્કર્ણસ્ય ભરતર્ષભ ।
પ્રીત્યા પરમયા યુક્તઃ કર્ણમાહ નરાધિપઃ ॥

ધન્યોસ્મ્યનુગૃહીતોસ્મિ યસ્ય મે ત્વં મહાબલઃ ।
હિતેષુ વર્તસે નિત્યં સફલઞ્જન્મ ચાદ્ય મે ॥

યદા ચ મન્યસે વીર સર્વશત્રુનિબર્હણમ્ ।
તદા નિર્ગચ્છ ભદ્રં તે હ્યનુશાધિ ચ મામિતિ ॥

એવમુક્તસ્તદા કર્ણો ધાર્તરાષ્ટ્રેણ ધીમતા ।
સર્વમજ્ઞાપયામાસ પ્રાયાત્રિકમરિન્દમ ॥

પ્રયયૌ ચ મહેષ્વાસો નક્ષત્રે શુભદૈવતે ।
શુભેતિથૌ મુહૂર્તે ચ પુજ્યમાનો દ્વિજાતિભિઃ ॥

મઙ્ગલૈશ્ચ શુભૈઃ સ્નાતો વાગ્ભિશ્ચાપિ પ્રપૂજિતઃ । નાદયન્રથઘોષેણ ત્રૈલોક્યં સચરાચરમ્ ॥