Mahabharata · Chapter 3.231

yadā skandena mātṛṇāmevametatpriyaṃ kṛtam /
athanaimabravītsvāhā mama putrastvamaurasaḥ //

icchāmyahaṃ tvayā dattāṃ prītiṃ paramadurlabhām /
tāmabravīttataḥ skandaḥ prītimicchasi kīdṛśīm //
svāhovāca /

dakṣasyāhaṃ priyā kanyā svāhā nāma mahābhuja /
bālyātprabhṛti nityaṃ ca jātakāmā hutāśane //

na sa māṃ kāminīṃ putra samyagjanāti pāvakaḥ /
icchāmi śāśvataṃ vāsaṃ vastu putra sahāgninā //
skanda uvāca /

havyaṃ kavyañca yatkiñciddvijā mantrasusaṃstutam /
hoṣyantyagnau sadā devi svāhetyuktvāsamuddhṛtam //

adyaprabhṛti dāsyanti suvṛttāḥ satpathe sthitāḥ /
evamagnisat्vayā sārdhaṃ sadā vatsyati śobhane //
mārkaṇḍeya uvāca /

evamuktā tataḥ svāhā tuṣṭāskandena pūjitā /
pāvakena samāyuktā bhartrā skandamapūjayat //

tato brahmā mahāsenaṃ prajāpatirathābravīt /
abhigaccha mahādevaṃ pitaraṃ tripurārdanam //

rudreṇāgniṃ samāviśya svāhāmāviśya comayā /
hitarthaṃ sarvalokānāṃ jātastvamaparājitaḥ //

umāyonyāṃ ca rudreṇa śukraṃ siktaṃ mahātmanā /
asmingirau nipatitaṃ miñjikamiñjikaṃ yataḥ //

mithunaṃ vai mahābhāga tatra tadrudrasambhavam /
sambhūtaṃ lohitode tu śukraśeṣamavāpatat //

sūryaraśmiṣu cāpyanayadanyaccaivāpatadbhuvi /
āsaktamanyadvṛkṣeṣu tadevaṃ pcadhā'patat //

tatra te vividhākārā gaṇā jñeyā manīṣibhiḥ /
tava pāriṣadā ghorā ya ete piśitāśinaḥ //

evamastviti cāpyuktvā mahāseno maheśvaram /
apūjayadameyātmā pitaraṃ pitṛvatsalaḥ //
mārkaṇḍeya uvāca /

arkapuṣpaistu te pañ gaṇāḥ pūjyā dhanārthibhiḥ /
vyādipraśamanārthaṃ cateṣāṃ pūjāṃ samācaret //

miñjikāmiñjikaṃ caiva mithunaṃ rudrasambhavam /
namaskāryaṃ sadaiveha bālānāṃ hitamicchatā //

striyo mānuṣamāṃsādā vṛkṣakā nāma nāmataḥ /
vṛkṣeṣu jātāstā devyo namaskāryāḥ prajārthibhiḥ //

eṣāmeva piśācānāmasaṅkhyeyagaṇāḥ smṛtāḥ /
ghaṇṭāyāḥ sapatākāyāḥ śṛṇu me sambhavaṃ nṛpa //

airāvatasya ghaṇṭe dve vaijayantyāviti śrute /
guhasya te svayaṃ datte krameṇānāyya dhīmatā //

ekā tatraviśākhasya ghaṇṭā skandasya cāparā /
patākā kārtikeyas viśākhasya ca lohitā //

yāni krīḍanakānyasya devairdattāni vai tadā /
taireva ramate devo mahāseno mahābalaḥ //

sa saṃvṛtaḥ piśācānāṃ gaṇairdevagaṇaistathā /
śuśubhe kāñcane śaile dīpyamānaḥ śriyā vṛttaḥ //

tena vīreṇa śuśubhe sa śailaḥ śubhakānanaḥ /
ādityenevāṃśumatā mandaraścārukandaraḥ //

santānakavanaiḥ phullaiḥ karavīravanairapi /
pārijātavanaiścaiva japāśokavanaistathā //

kadambataruṣaṇḍaiśca divyairmṛgagaṇairapi /
divyaiḥ pakṣigaṇaiścaiva śuśubhe śvetaparvataḥ //

tatradevagaṇāḥ sarvesarve devarṣayastathā /
meghatūryaravāścaiva kṣubdhodadhisamasvanāḥ //

tatradevāśca gandharvā nṛtyante'psarasastathā /
hṛṣṭānāṃ tatrabhūtānāṃ śrūyate ninado mahān //

evaṃ sendraṃ jagatsarvaṃ śvetaparvatasaṃsthitam / prahṛṣṭaṃ prekṣate skandaṃ na ca glāyati darśanāt //