મહાભારત · અધ્યાય 3.231

યદા સ્કન્દેન માતૃણામેવમેતત્પ્રિયં કૃતમ્ ।
અથનૈમબ્રવીત્સ્વાહા મમ પુત્રસ્ત્વમૌરસઃ ॥

ઇચ્છામ્યહં ત્વયા દત્તાં પ્રીતિં પરમદુર્લભામ્ ।
તામબ્રવીત્તતઃ સ્કન્દઃ પ્રીતિમિચ્છસિ કીદૃશીમ્ ॥
સ્વાહોવાચ ।

દક્ષસ્યાહં પ્રિયા કન્યા સ્વાહા નામ મહાભુજ ।
બાલ્યાત્પ્રભૃતિ નિત્યં ચ જાતકામા હુતાશને ॥

ન સ માં કામિનીં પુત્ર સમ્યગ્જનાતિ પાવકઃ ।
ઇચ્છામિ શાશ્વતં વાસં વસ્તુ પુત્ર સહાગ્નિના ॥
સ્કન્દ ઉવાચ ।

હવ્યં કવ્યઞ્ચ યત્કિઞ્ચિદ્દ્વિજા મન્ત્રસુસંસ્તુતમ્ ।
હોષ્યન્ત્યગ્નૌ સદા દેવિ સ્વાહેત્યુક્ત્વાસમુદ્ધૃતમ્ ॥

અદ્યપ્રભૃતિ દાસ્યન્તિ સુવૃત્તાઃ સત્પથે સ્થિતાઃ ।
એવમગ્નિસત્્વયા સાર્ધં સદા વત્સ્યતિ શોભને ॥
માર્કણ્ડેય ઉવાચ ।

એવમુક્તા તતઃ સ્વાહા તુષ્ટાસ્કન્દેન પૂજિતા ।
પાવકેન સમાયુક્તા ભર્ત્રા સ્કન્દમપૂજયત્ ॥

તતો બ્રહ્મા મહાસેનં પ્રજાપતિરથાબ્રવીત્ ।
અભિગચ્છ મહાદેવં પિતરં ત્રિપુરાર્દનમ્ ॥

રુદ્રેણાગ્નિં સમાવિશ્ય સ્વાહામાવિશ્ય ચોમયા ।
હિતર્થં સર્વલોકાનાં જાતસ્ત્વમપરાજિતઃ ॥

ઉમાયોન્યાં ચ રુદ્રેણ શુક્રં સિક્તં મહાત્મના ।
અસ્મિન્ગિરૌ નિપતિતં મિઞ્જિકમિઞ્જિકં યતઃ ॥

મિથુનં વૈ મહાભાગ તત્ર તદ્રુદ્રસમ્ભવમ્ ।
સમ્ભૂતં લોહિતોદે તુ શુક્રશેષમવાપતત્ ॥

સૂર્યરશ્મિષુ ચાપ્યનયદન્યચ્ચૈવાપતદ્ભુવિ ।
આસક્તમન્યદ્વૃક્ષેષુ તદેવં પ્ચધાઽપતત્ ॥

તત્ર તે વિવિધાકારા ગણા જ્ઞેયા મનીષિભિઃ ।
તવ પારિષદા ઘોરા ય એતે પિશિતાશિનઃ ॥

એવમસ્ત્વિતિ ચાપ્યુક્ત્વા મહાસેનો મહેશ્વરમ્ ।
અપૂજયદમેયાત્મા પિતરં પિતૃવત્સલઃ ॥
માર્કણ્ડેય ઉવાચ ।

અર્કપુષ્પૈસ્તુ તે પઞ્ ગણાઃ પૂજ્યા ધનાર્થિભિઃ ।
વ્યાદિપ્રશમનાર્થં ચતેષાં પૂજાં સમાચરેત્ ॥

મિઞ્જિકામિઞ્જિકં ચૈવ મિથુનં રુદ્રસમ્ભવમ્ ।
નમસ્કાર્યં સદૈવેહ બાલાનાં હિતમિચ્છતા ॥

સ્ત્રિયો માનુષમાંસાદા વૃક્ષકા નામ નામતઃ ।
વૃક્ષેષુ જાતાસ્તા દેવ્યો નમસ્કાર્યાઃ પ્રજાર્થિભિઃ ॥

એષામેવ પિશાચાનામસઙ્ખ્યેયગણાઃ સ્મૃતાઃ ।
ઘણ્ટાયાઃ સપતાકાયાઃ શૃણુ મે સમ્ભવં નૃપ ॥

ઐરાવતસ્ય ઘણ્ટે દ્વે વૈજયન્ત્યાવિતિ શ્રુતે ।
ગુહસ્ય તે સ્વયં દત્તે ક્રમેણાનાય્ય ધીમતા ॥

એકા તત્રવિશાખસ્ય ઘણ્ટા સ્કન્દસ્ય ચાપરા ।
પતાકા કાર્તિકેયસ્ વિશાખસ્ય ચ લોહિતા ॥

યાનિ ક્રીડનકાન્યસ્ય દેવૈર્દત્તાનિ વૈ તદા ।
તૈરેવ રમતે દેવો મહાસેનો મહાબલઃ ॥

સ સંવૃતઃ પિશાચાનાં ગણૈર્દેવગણૈસ્તથા ।
શુશુભે કાઞ્ચને શૈલે દીપ્યમાનઃ શ્રિયા વૃત્તઃ ॥

તેન વીરેણ શુશુભે સ શૈલઃ શુભકાનનઃ ।
આદિત્યેનેવાંશુમતા મન્દરશ્ચારુકન્દરઃ ॥

સન્તાનકવનૈઃ ફુલ્લૈઃ કરવીરવનૈરપિ ।
પારિજાતવનૈશ્ચૈવ જપાશોકવનૈસ્તથા ॥

કદમ્બતરુષણ્ડૈશ્ચ દિવ્યૈર્મૃગગણૈરપિ ।
દિવ્યૈઃ પક્ષિગણૈશ્ચૈવ શુશુભે શ્વેતપર્વતઃ ॥

તત્રદેવગણાઃ સર્વેસર્વે દેવર્ષયસ્તથા ।
મેઘતૂર્યરવાશ્ચૈવ ક્ષુબ્ધોદધિસમસ્વનાઃ ॥

તત્રદેવાશ્ચ ગન્ધર્વા નૃત્યન્તેઽપ્સરસસ્તથા ।
હૃષ્ટાનાં તત્રભૂતાનાં શ્રૂયતે નિનદો મહાન્ ॥

એવં સેન્દ્રં જગત્સર્વં શ્વેતપર્વતસંસ્થિતમ્ । પ્રહૃષ્ટં પ્રેક્ષતે સ્કન્દં ન ચ ગ્લાયતિ દર્શનાત્ ॥