Mahabharata · Chapter 3.226

ahaṃ prajāpateḥ kanyā devaseneti vuśrutā /
bhaginī me daityasenā sā pūrvaṃ kośinā hṛtā //

sahaivāvāṃ bhaginyau tu sakhībhiḥ saha mānasam /
āgacchāvo vihārārthamanujñāpya prajāpatim //

nityaṃ cāvāṃ prārthayate hartuṃ keśī mahāsuraḥ /
icchatyenaṃ daityasenā na cāhaṃ pākaśāsana //

sā hṛtā'nena bhagavānmuktā'haṃ tvadbalena tu /
tvayā devendra nirdiṣṭaṃ patimicchāmi durjayam //
indra uvāca /

mama mātṛṣvaseyī tvaṃ mātā dākṣāyaṇī mama /
ākhyātuṃ tvahamicchāmi svayamātmabalaṃ tvayā //
kanyovāca /

abalā'haṃ mahābāho patistu balavānmama /
varadānātpiturbhāvī surāsuranamaskṛtaḥ //
indra uvāca /

kīdṛśaṃ tu balandevi patyustava bhaviṣyati /
etadicchāmyahaṃ śrotuṃ tava vākyamanindite //
kanyovāca /

devadānavayakṣāṇāṃ kinnaroragarakṣasām /
jetā yo duṣṭadaityānāṃ mahāvīryo mahābalaḥ //

yastu sarvāṇi bhūtāni tvayā saha vijeṣyati /
sa hi me bhavitā bhartā brahmaṇyaḥ kīrtivardhanaḥ //
mārkaṇḍeya uvāca /

indrastasyā vacaḥ śrutvā duḥkhito'cintayadbhṛśam /
asyā devyāḥ patirnāsti yādṛśaṃ samprabhāṣate //

athāpaśyatsa udaye bhāskaraṃ bhāskaradyutiḥ /
somaṃ caiva mahābhāgaṃ praviśantaṃ divākaram //

amāvāsyāṃ pravṛttāyāṃ muhūrte raudra eva tu /
devāsuraṃ ca sangrāmaṃ so'paśyadudaye girau //

lohitaiśca ghanairyuktāṃ pūrvāṃ sandhyāṃ śatakratuḥ /
apaśyallohitodaṃ ca maghavānvaruṇālayam //

bhṛgubhiścāṅgirobhyaśca hutaṃ mantraiḥ pṛthagvidhaiḥ /
havyaṃ gṛhītvā vahniṃ ca praviśantaṃ divākaram //

parva caiva caturviṃśaṃ tadā sūryamupasthitam /
tathā sūryaṃ vahnigataṃ somaṃ sūryagataṃ ca tam //

samālokyaikatāmeva śaśino bhāskarasya ca /
samavāyaṃ tu taṃ raudraṃ dṛṣṭvā śakro'nvacintayat //

sūryācandramasorghoraṃ dṛśyate pariveṣaṇam /
etasminneva rātryante mahadyuddhaṃ tu śaṃsati //

saritsindhurapīyaṃ tu pratyasṛgvāhinī bhṛśam /
śṛgālinayagnivakrā ca pratyādityaṃ virāviṇī //

eṣa raudraścasanghāto mahānyuktaśca tejasā /
somasya vahnisūryābhyāmadbhuto'yaṃ samāgamaḥ //

janayedyaṃ sutaṃ somaḥ so'syā devyāḥ patirbhavet /
athānekairguṇaiścāgniragniḥ sarvāśca devatāḥ //

eṣa ceñjanayedgarbhaṃ so'syā devyāḥ patirbhavet /
evaṃ sañcintya bhagavānbrahmalokaṃ tadā gataḥ //

gṛhītvā devasenāṃ tāṃ vavande sa pitāmaham /
uvāca cāsyā devyāstvaṃ sādhu śūraṃ patiṃ diśā //
brahmovāca /

yathaitaccintitankāryaṃ tvayā dānavasūdana /
tathā sa bhavitā garbho balavānuruvikramaḥ //

sa viṣyati senānīstvayā saha śatakrato /
asyā devyāḥ patiścaiva sa bhaviṣyati vīryavān //

etacchrutvā namastasmai kṛtvā'sau maha kanyayā /
tatrābhyagacchaddevendro yatra saptarṣayo'bhavan //

vasiṣṭhapramukhā mukhyā viprendrāḥ sumahāprabhāḥ /
bhāgārthaṃ tapasopāttaṃ teṣāṃ somaṃ tathā'dhvare //

pipāsavo yayurdevāḥ śatakratupurogamāḥ /
iṣṭiṃ kṛtvayatānyāyaṃ susamiddhe hutāśane //

juhuvuste mahātmāno havyaṃ sarvadivaukasām /
samāhūto hutavahaḥso'dbhutaḥ sūryamaṇḍalāt //

viniḥsṛtya yayau vahniḥ pārśvato vidhivatprabhuḥ /
āgamyāhavanīyaṃ vai tairdvijairmantrato hutam //

satatra vividhaṃ havyaṃ pratigṛhyahutāśanaḥ /
ṛṣibhyo bharataśreṣṭha prāyacchata divaukasām //

niṣkrāmaṃścāpyapaśyatsa patnīsteṣāṃ mahātmanām /
sveṣvāsateṣūpaviṣṭāḥ snāyantīśca yathāsusvam //

rukmavedinibhāstāstu candralekhā ivāmalāḥ /
hutāśanārciḥpratimāḥ sarvāstārā ivādbhutāḥ //

sa tatratena manasā babhūva kṣubhitendriyaḥ /
patnīrdṛṣṭvā dvijendrāṇāṃ vahniḥ kāmavaśaṃ yayau //

bhūyaḥ sañcintayāmāsa na nyāyyaṃ kṣubhito hyaham /
sādhvyaḥ patnyo dvijendrāṇāmakāmā kāmayāmyaham //

naitāḥ śakyā mayā draṣṭuṃ spraṣṭuṃ vā'pyanimittataḥ /
gārhapatyaṃ samāviśya tasmātpaśyāmyabhīkṣṇaśaḥ //
mārkaṇḍeya uvāca /

saṃspṛśanniva sarvāstāḥ śikhābhiḥ kāñcanaprabhāḥ /
paśyamānaśca mumude gārhapatyaṃ samāśritaḥ //

nirudhya tatrasuciramevaṃ vahnirvanaṃ gataḥ /
manastāsu vinikṣipya kāmayāno varāṅganāḥ //

kāmasantaptahṛdayo dehatyāge viniścitaḥ /
alābhe brāhmaṇastrīṇāmagnirvanamupāgamat //

svāhā taṃ dakṣaduhitā prathamā'kāmayattadā / sā tasya cchidramanvaicchaccirātprabhṛtibhāminī /

sā taṃ jñātvā yathāvattu varhiṃ vanamupāgatam /
tattvataḥ kāmasantaptaṃ cintayāmāsa bhāminī //

ahaṃ saptarṣipatnīnāṃ kṛtvā rūpāṇi pāvakam / kāmayiṣyāmi kāmārtaṃ tāsāṃ rūpeṇa mohitam /
evaṃ kṛte prītiras kāmāvāptiśca me bhavet //