Mahabharata · Chapter 3.222

kāśyapo hyatha vāsiṣṭhaḥ prāṇaśca prāṇaputrakaḥ /
agnirāṅgirasaścaiva cyavanastīvravarcakaḥ //

acaratsa tapastīvraṃ putrārthe bahuvārṣikam /
putraṃ labheyaṃ dharmiṣṭhaṃ yaśasā brahmaṇā samam //

mahāvyāhṛtibhirdhyātaḥ pañcabhistaistadā tvatha /
jajñe tejomayārciṣmānpañcavarṇaḥ prākaraḥ //

samiddho'gniḥ śirastasya bāhū sūryanibhau tathā /
tvaṅnetre ca suvarṇābhe kṛṣṇe jaṅghe ca bhārata //

pañcavarṣaḥ sa tapasā kṛtastaiḥ pañcabhirjanaiḥ /
pāñcajanyaḥ śruto devaḥ pañcavaṃśakarastu saḥ //

daśavarṣasahasrāṇi tapastaptvā mahātapāḥ /
janayatpāvakaṃ ghoraṃ pitṝṇāṃ sa prajāḥ sṛjan //

bṛhadrathantarau mūrdhnā vakrācca tapasā harim /
śivaṃ nābhyāṃ balādindraṃ prāṇādvāyuṃ ca bhārata //

bāhubhyāmanudāttau ca viśve bhūtāni caiva ha /
etānsṛṣṭvā tataḥ pañca pitṝṇāmasṛjatsutān //

bṛhadrathasya praṇidhiḥ kāśyapaśya mahattaraḥ /
bhānuraṅgiraso dhīraḥ putro varcasya saurabhaḥ //

prāṇasya cānudāttastu vyākhyātāḥ pañca vaṃśajāḥ /
devānyajñamuṣaścānyānsṛjanpañcadaśottarān //

subhīmamatibhīmaṃ ca bhīmaṃ bhīmabalābalam /
etānyajñamuṣaḥ pañca devānapyasṛjattataḥ //

sumitraṃ mitravantaṃ ca mitrajñaṃ mitravardhanam /
mitradharmāṇamityetāndevānabhyasṛjattataḥ //

surapravīraṃ vīraṃ ca sureśaṃ ca suvarcasam /
surāṇāmapi bhartāraṃ pañcaitānasṛjattataḥ //

trividhaṃ saṃsthitā hyete pañcapañca pṛthakpṛthak /
muṣṇantyatra sthitā hyete svargatānyajñayājinaḥ //

teṣāmiṣṭaṃ harantyete nighnanti ca mahaddhaviḥ /
spardhayāhavyavāhānāṃ nighnantyete haranti ca //

bahirvedyāṃ tadādānaṃ kuśalaiḥ sampravartitam /
tatraite nopasarpanti yatra cāgniḥ sthito bhavet //

cito'gnirudvahanyajñaṃ pakṣābhyāṃ tānprabādhate /
mantrai praśamitāhyete neṣṭaṃ muṣṇanti yajñiyam //

tapasye bṛdukthasya putro bhūmimupāśritaḥ /
agnihotre hūyamāne pṛthivyāṃ sadbhirīḍyate //

rathantaraścatapasaḥ putro'gniḥ paripaṭhyate /
mitravindā tathā bhāryā haviradhvaryavo viduḥ //

etaiḥ saha mahābhāga tapastejasvibhirnṛpa / mumude paramaprītaḥ saha putrairbhahāyaśāḥ //