Mahabharata · Chapter 3.22

tato'haṃ bharataśreṣṭha pragṛhyaruciraṃ dhanuḥ /
śarairapātayaṃ saubhācchirāṃsi vibudhadviṣām //

śarāṃścāśīviṣākārānūrdhvagāṃstigmatejasaḥ /
praiṣayaṃ sālvarājāya śārṅgamuktānsuvāsasaḥ //

tato nādṛśyata tadā saubhaṃ kurukulodvaha /
antarhitaṃ māyayā'bhūttato'haṃ vismito'bhavam //

atha dānavasaṅghāste vikṛtānanamūrdhajāḥ /
udakrośanmahārāja dhiṣṭhite mayi bhārata //

tato'straṃ śabdasāhaṃ vai tvaramāṇo mahāraṇe /
ayojayaṃ tadvadhāya tataḥ śabda upāramat //

hatāste dānavāḥ sarve yaiḥ sa śabda udīritaḥ /
śarairādityasankaśairjvalitaiḥ śabdasādhanaiḥ //

tasminnuparate śabde punarevānyato'bhavat /
śabdo'paro mahārāja tatrāpi prāharaṃ śaraiḥ //

evaṃ daśa diśaḥ sarvāstiryagūrdhvaṃ ca bhārata /
nādayāmāsurasurāste cāpi nihatā mayā //

tataḥ prāgjyotiṣaṃ gatvā punareva vyadṛśyata /
saubhaṃ kāmagamaṃ vīra mohayanmama cakṣuṣī //

tato lokāntakaraṇo dānavo dāruṇākṛtiḥ /
śilāvarṣeṇa mahatā sahasā māṃ samāvṛṇot //

sohaṃ parvatavarṣeṇa vadhyamānaḥ samantataḥ /
valmīka iva rājendra parvatopacito'bhavam //

tato'haṃ parvatacitaḥ sahayaḥ sahasārathiḥ /
aprakhyātimiyāṃ rājansadhvajaḥ parvataiścitaḥ //

tato vṛṣṇipravīrā ye mamāsansainikāstadā /
te bhayartā diśaḥ sarve sahasā vipradudruvuḥ //

tato hāhākṛtamabhūtsarvaṃ kila viśāmpate /
dyauśca bhūmiśca khaṃ caivādṛśyamāne tathā mayi //

tato viṣaṇṇamanaso mama rājansuhṛjjanāḥ /
ruruduścukruśuścaiva duḥkhaśokasamanvitāḥ //

dviṣatāṃ ca praharṣo'bhūdārtiśca suhṛdāmapi /
evaṃ vijitavānvīra paścādaśrauṣamacyuta //

tato'hamindradayitaṃ sarvapāṣāṇabhedanam /
vajramudyamya tānsarvānparvatānsamaśātayam //

tataḥ parvatabhārārtā mandaprāṇaviceṣṭitāḥ /
hayā mama mahārāja vepamānā ivābhavan //

meghajāla ivākāśe vidāryābhyuditaṃ ravim /
dṛṣṭvā māṃ bāndhavāḥ sarve harṣamāhārayanpunaḥ //

tataḥ parvatabhārārtānmandaprāṇaviceṣṭitān /
hayānsandṛśya māṃ sūtaḥ prāha tātkālikaṃ vacaḥ //

sādhu sampaśya vārṣṇeya sālvaṃ saubhapatiṃ sthitam /
alaṃ kṛṣṇāvamanyainaṃ sādhu yatnaṃ samācara //

mārdavaṃ sakhitāṃ caiva sālvādadya vyapāhara /
jahi sālvaṃ mahābāho mainaṃ jīvaya keśava //

sarvaiḥ parākramairvīra vadhyaḥ śatruramitrahan / na śatruravamantavyo durbalo'pi balīyasā /
yopisyātpīṭhagaḥ kaścitkiṃ punaḥ samare sthitaḥ //

sa tvaṃ puruṣaśārdūla sarvayatnairimaṃ prabho /
jahi vṛṣṇikulaśreṣṭha mā tvāṃ kālo'tyagātpunaḥ //

jitavāñjāmadagnyaṃ yaḥ koṭivarṣagaṇānbahūn /
sa eṣa nānyairvadhyo hi tvāmṛte nāsti kaścana //

naiṣa mārdavasādhyo vai mato nāpi sakhā tava /
yena tvaṃ yodhito vīra dvārakā cāvamarditā //

evamādi tu kaunteya śrutvā'haṃ sārathervacaḥ /
tatvametaditi jñātvā yuddhe matimadhārayam //

vadhāya sālvarājasya saubhasya ca nipātane /
dārukaṃ cābruvaṃ vīra muhūrtaṃ sthīyatāmiti //

tato'pratihataṃ divyamabhodyamativīryavat / āgneyamastraṃ dayitaṃ sarvasāhaṃ mahāprabham /
yojayaṃ tatradhanuṣā dānavāntakaraṃ raṇe //

yakṣāṇāṃ rākṣasānāṃ ca dānavānāṃ ca saṃyuge /
rājñāṃ ca pratilomānāṃ bhasmāntakaraṇaṃ mahat //

kṣurāntamamalaṃ cakraṃ kālāntakayamopamam /
anumantryāhamatulaṃ dviṣatāṃ vinibarhaṇam //

jahi saubhaṃ svavīryeṇa ye cātra ripavo mama /
ityuktvā bhujavīryeṇa tasmai prāhiṇavaṃ ruṣā //

rūpaṃ sudarśanasyāsīdākāśe patatastadā /
dvitīyasyeva sūryas yugānte pratapiṣyataḥ //

tatsamāsādya nagaraṃ saubhaṃ vyapagatatviṣam /
madhyena pāṭayāmāsa krakaco dārvivocchritam //

dvidhā kṛtaṃ tataḥ saubhaṃ sudarśanabalāddhatam /
maheśvaraśaroddhūtaṃ papāta tripuraṃ yathā //

tasminnipatite saubhe cakramāgātkaraṃ mama /
punaścādāya vegena sālvāyetyahamabruvam //

tataḥ sālvaṃ gadāṃ gurvīmāvidhyante mahāhave /
dvidhā cakāra sahasā prajajvāla ca tejasā //

tasminvinihate vīre dānavāstrastacetasaḥ /
hāhābhūtā diśo jagmurarditā mama sāyakaiḥ //

tato'haṃsamavasthāpyarathaṃ saubhasamīpataḥ /
śaṅkhaṃ pradhmāpya harṣeṇa suhṛdaḥ paryaharṣayam //

tanmeruśikharākāraṃ vidhvastāṭṭālagopuram /
dahyamānamabhiprekṣya striyastāḥ sampradudruvuḥ //

evaṃ nihatya samare saubhaṃ sālvaṃ nipātya ca /
ānartātpunarāgamya suhṛdāṃ prītimāvaham //

tadetatkāraṇaṃ rājannāgamaṃ nāgasāhvayam /
yadyāgāṃ paravīraghna na hi jīvetsuyodhanaḥ //

mayyāgate'thavā vīra dyūtaṃ na bhavitā tathā /
adyāhaṃ kiṃ kariṣyāmi bhinnaseturivodakam //
vaiśampāyana uvāca /

evamuktvā mahābāhuḥ kauravaṃ puruṣottamaḥ /
āmantrya prayayau śrīmānpāṇḍavānmadhusūdanaḥ //

abhivādya mahābāhurdharmarājaṃ yudhiṣṭhiram /
rājñā mūrdhanyupāghrāto bhīmena ca mahābhujaḥ //

pariṣvaktaścārjunena yamābhyāṃ cābhivāditaḥ /
sammānitaśca dhaumyena draupadyā cārcitośrubhiḥ //

subhadrāmabhimanyuṃ ca rathamāropya kāñcanam /
āruroha rathaṃ kṛṣṇaḥ pāṇḍavairabhipūjitaḥ //

śaibyasugrīvayuktena rathenādityavarcasā /
dvārakāṃ prayayau kṛṣṇaḥ samāśvāsya yudhiṣṭhiram //

tataḥ prayate dāśārhe dhṛṣṭadyumnopi pārṣataḥ /
draupadeyānupādāya prayayau svapuraṃ tadā //

dhṛṣṭaketuḥ svasāraṃ ca samādāyātha cedirāṭ /
jagāma pāṇḍavāndṛṣṭvā ramyāṃ śuktimatīṃ purīm //

kekayāścāpyanujñātāḥ kaunteyenāmitaujasā /
āmantrya pāṇḍavānsarvānprayayuste'pi bhārata //

brāhmaṇāśca viśaścaiva tathāviṣayavāsinaḥ /
visṛjyamānāḥ subhṛśaṃ na tyajanti sma pāṇḍavān //

samavāyaḥ sa rājendra sumahādbhutadarśanaḥ /
āsīnmahātmanāṃ teṣāṃ kāmyake bharatarṣabha //

yudhiṣṭhirastu viprāṃstānanumānya mahāmanāḥ / śaśāsa puruṣānkāle rathānyojayateti vai //