Mahabharata · Chapter 3.23
tasmindaśārhādhipatau prayāte yudhiṣṭhiro bhīmasenārjunau ca /
yamau ca kṛṣṇa ca purohitaśca rathānmahārhānparamāśvayuktān //
asthāya vīrāḥ sahitā vanāya pratasthire bhūtapatiprakāśāḥ /
hiraṇyaniṣkānvasanāni gāśca gadāya śikṣākṣaramantravidbhyaḥ //
preṣyāḥ puro viṃśatirāttaśastrā dhanūṃṣi śastrāṇi śarāṃśca dīptān /
maurvīśca yantrāṇi ca sāyakāṃśca sarve samādāya jaghanyamīyuḥ //
tatsatu vāsāṃsi ca rājaputryā dhātryaśca dāsyaśca vibhūṣaṇaṃ ca /
tadindrasenastvaritaḥ pragṛhya jaghanyamevopayayau rathena //
tataḥ kuruśreṣṭhamupetya paurāḥ pradakṣiṇaṃ cakruradīnasatvāḥ /
taṃ brāhmaṇāścābhyavadanprasannā mukhyāśca sarve kurujāṅgalānām //
sa cāpi tānabhyavadatprasannaḥ sahaiva tairbhrātṛbhirdharmarājaḥ /
tasthau ca tatrādhipatirmahātmā dṛṣṭvā janaughaṃ kurujāṅgalānām //
piteva putreṣu sa teṣu bhāvaṃ cakre kurūṇāmṛṣabho mahātmā /
te cāpi tasminbharataprabarhe tathā babhūvuḥ pitarīva putrāḥ //
tatastamāsādya mahājanaughāḥ kurupravīraṃ parivārya tasthuḥ /
hānātha hādharma iti bruvāṇā hītāśca sarve'śrumukhā babhūvuḥ //
varaḥ kurūṇāmadhipaḥ prajānāṃ piteva putrānapahāya cāsmān /
paurānimāñjānapadāṃśca sarvān hitvā prayātaḥ kvanu dharmarājaḥ //
dhigdhārtarāṣṭraṃ sunṛśaṃsabuddhiṃ dhiksaubalaṃ pāpamatiṃ ca karṇam /
anarthamicchanti narendra pāpā ye dharmanityasya satastavogrāḥ //
svayaṃ niveśyāpratimaṃ mahātmā puraṃ mahādevapuraprakāśam /
śatakratuprasthamamoghakarmā hitvā prayātaḥ kvanu dharmarājaḥ //
cakāra yāmapratimāṃ mahātmā sabhāṃ mayo devasabhāprakāśām /
tāṃ devaguptāmiva devamāyāṃ hitvāprayātaḥ kvanu dharmarājaḥ //
tāndharmakāmārthaviduttamaujā bībhatsuruccaiḥ sahitānuvāca /
ādāsyate vāsamimaṃ niruṣya ravaneṣu rājā dviṣatāṃ yaśāṃsi //
dvijātimukhyāḥ sahitāḥ pṛthakva bhavadbhirāsādya tapasvinaśca /
prasādya dharmārthavidaśca vācyā yathārthasiddhiḥ paramā bhavennaḥ //
ityevamukte vacane'rjunena te brāhmaṇāḥ sarvavarṇāśca rājan /
mudā'bhyanandansahitāśca cakruḥ pradakṣiṇaṃ dharmabhṛtāṃvariṣṭham //
āmantrya pārthaṃ ca vṛkodaraṃ ca dhanañjayaṃ yājñasenīṃ yamau ca /
pratasthire rāṣṭramarapetahārṣā yudhiṣṭhireṇānumatā yathāsvam //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0