Mahabharata · Chapter 3.218

gurū nivedya viprāya tau mātāpitarāvubhau /
punareva sa dharmātmā vyādho brāhmaṇamabravīt //

pravṛttacakṣurjātosmi sampaśya tapaso balam /
yadarthamuktosi tayā gaccha tvaṃ mithilāmiti //

patiśuśrūṣaparayā dāntayā satyaśīlayā /
mithilāyāṃ vasanvyādhaḥ sa te dharmānpravakṣyati //
brāhmaṇa uvāca /

pativratāyāḥ satyāyāḥ śīlāḍhyāyā yatavrata /
saṃsmṛtya vākyaṃ dharmajña guṇavānasi me mataḥ //
vyādha uvāca /

yattayā tvaṃ dvijaśreṣṭha niyukto māṃ prati prabho /
dṛṣṭameva tayā samyagekapatnyā na saṃśayaḥ //

tvadanugrahabuddhyā tu vipraitaddarśitaṃ mayā /
vākyaṃ ca śṛṇu me tāta yatte vakṣye hitaṃ dvija //

tvayā na pūjitā mātā pitā ca dvijasattama /
anisṛṣṭosi niṣkrānto gṛhāttābhyāmaninadita //

vedoccāraṇakāryārthamayuktaṃ tattvayā kṛtam /
tava śokena vṛddhau tāvandhībhūtau tapasvinau //

tau prasādayituṃ gaccha mā tvāṃ dharmo'tyagādayam /
tapasvī tvaṃ mahātmā ca dharme ca nirataḥ sadā //

sarvametadapārthaṃ te kṣipraṃ tau samprasādaya /
tau prasādya dvijaśreṣṭha yacchreyastadavāpsyasi //

śraddadhasva mama brahmannānyathā kartumarhasi /
yamyatāmadyaviprarṣe śreyaste kathayāmyaham //
brāhmaṇa uvāca /

yadetaduktaṃ bhavatā sarvaṃ satyamasaṃśayam /
prītosmi tava bhadraṃ te dharmācāraguṇānvita //
vyādha uvāca /

daivatapratimo hi tvaṃ yastvaṃ dharmamanuvrataḥ /
purāṇaṃ śāśvataṃ divyaṃ duṣprāpamakṛtātmabhiḥ //

mātāpitroḥ sakāśaṃ hi gatvātvaṃ dvijasattama / atandritaḥ kuru kṣiprammātāpitrorhi pūjanam /
ataḥ paramahaṃ dharmaṃ nānyaṃ paśyāmi kañcana //
brāhmaṇa uvāca /

ihāhamāgato diṣṭyā diṣṭyā me sangataṃ tvayā /
īdṛśā durlabhā loke narā dharmapradarśakāḥ //

ekonarasahasreṣu dharmavānavidyate na vā /
prītosmi tavasatyena bhadraṃ te puruṣarṣabha //

patamāno'dyanarake bhavatā'smi samuddhṛtaḥ /
bhavitavyamathaivaṃ ca yaddṛṣṭosi mayā'nagha //

rājā yayātirdauhitraiḥ patitastārito yathā /
sadbhiḥ puruṣaśārdūla tathā'haṃ bhavatā tviha //

mātāpitṛbhyāṃ śuśrūṣāṃ kariṣye vacanāttava /
nākṛtātmā vedayati dharmādharmaviniścayam //

durjñeyaḥ śāśvato dharmaḥ śūdrayonau hi vartatā /
na tvāṃ śūdramahaṃ manye bhavitavyaṃ hi kāraṇam //

yena karmaviśeṣeṇa prāpteyaṃ śūdratā tvayā / etāmicchāmi vijñātuṃ tattvena tava śūdratām /
kāmayānas me śaṃsa sarvaṃ tvaṃ prayatātmavān //
vyāgha uvāca /

anatikramaṇīyā vai brāhmaṇā me dvijottama /
śṛṇu sarvamidaṃ vṛttaṃ pūrvadehe mamānagha //

ahaṃ hi brāhmaṇaḥ pūrvamāsaṃ dvijavarātmajaḥ / vedādhyāyī sukuśalo vedāṅgānāṃ ca pāragaḥ /
ātmadoṣakṛtairbrahmannavasthāmāptavānimām //

kaścidrājā mama sakhā dhanurvedaparāyaṇaḥ /
saṃsargāddhanuṣi śreṣṭhastato'hamabhavaṃ dvija //

etasminneva kāle tu mṛgayāṃ nirgato nṛpaḥ / sahito yodhamukhyaiś mantribhiśca susaṃvṛtaḥ /
tato'bhyahanmṛgāṃstatra subahūnāśramaṃ prati //

atha kṣiptaḥ śaro ghoro mayāpi dvijasattama /
tāḍitaśca ṛṣistana śareṇānataparvaṇā //

bhūmau nipatito brahmannuvāca pratinādayan /
nāparādhyāmyahaṃ kiñcitkena pāpamidaṃ kṛtam //

manvānastaṃ mṛgaṃ cāhaṃ samprāptaḥ sahasā munim / apaśyaṃ tamṛṣiṃ viddhaṃ śareṇānataparvaṇā /
tamugratapasaṃ vipraṃ niṣṭanantaṃ mahītale //

akāryakaraṇāccāpi bhṛśaṃ me vyathitaṃ manaḥ /
ajānatā kṛtamidaṃ mayetyahamathābruvam //

kṣantumarhasi me sarvamiti cokto mayā muniḥ //

tataḥ pratyabravīdvākyamṛṣirmāṃ krodhamūrcchitaḥ / vyādhastvaṃ bhavitā krūra śūdrayonāviti dvija //