Mahabharata · Chapter 3.217

evaṃ sankathite kṛtsne mokṣadharme yudhiṣṭhira /
dṛḍhaprītamanā vipro dharmavyādhamuvāca ha //

nyāyayuktamidaṃ sarvaṃ bhavatā parikīrtitam /
na te'styaviditaṃ kiñciddharmeṣvabhisamīkṣyate //
vyādha uvāca /

pratyakṣaṃ mama yo dharmastaṃ ca paśya dvijottama /
yena siddhiriyaṃ prāptā mayā brāhmaṇapuṅgava //

uttiṣṭha bhagavankṣipraṃ praviśyābhyantaraṃ gṛham /
draṣṭumarhasi dharmajña mātaraṃ pitaraṃ ca me //

ityuktaḥ sa praviśyātha dadarśa paramārcitam /
saudhaṃ hṛdyaṃ catuḥśālamatīva ca manoramam //

devatāgṛhasankāśa daivataiśca supūjitam /
śayanāsanasambādhaṃ gandhaiśca paramairyutam //

tatraśuklāmbaradharau pitarāvasya pūjitau /
kṛtāhārau tu santuṣṭāvupaviṣṭau varāsane //

tasya vyādhasya pitarau brāhmaṇaḥ sandadarśa ha /
dharmavyādhastu tau dṛṣṭvā pādeṣu śirasā'patat //
vṛddhāvūcatuḥ /

uttiṣṭhottiṣṭha dharmajña dharmastvāmabhirakṣatu / prītau svastava śaucena dīrghamāyuravāpnuhi /
[gatimiṣṭāṃ tapo jñānaṃ medhāṃ ca paramāṃ gataḥ] //

satputreṇa tvayā putra nityaṃ kāle supūjitau /
sukhameva vasāvo'tra devalokagatāviva //

na te'nyaddaivataṃ kiñciddaivateṣvapi vartate /
prayatasatvāddvijātīnāndamenāsi samanavitaḥ //

pituḥ pitāmahā ye ca tathaiva prapitāmahāḥ /
prītāste satataṃ putra damenāvāṃ ca pūjayā //

manasā karmaṇā vācā śuśrūṣā naiva hīyate /
na cānyā hi tathā buddhirdṛśyate sāmprataṃ tava //

jāmadagnyena rāmeṇa yathā vṛddhau supūjitau /
tathā tvayā kṛtaṃsarvantadviśiṣṭaṃ ca putraka //
mārkaṇḍeya uvāca /

tatastaṃ brāhmaṇaṃ tābhyāṃ dharmavyādho nyavedayat /
tau svāgatena taṃ vipramarcayāmāsatustadā //

pratigṛhyaca tāṃ pūjāṃ dvijaḥ papraccha tāvubhau / saputrābhyāṃ sabhṛtyābhyāṃ kaccidvāṃ kuśalaṃ gṛhe /
anāmaya ca vāṃ kaccitsukhaṃ veha śarīrayoḥ //
vṛddhāvūcatuḥ /

kuśalaṃ nau gṛhe vipra bhṛtyavarge ca sarvaśaḥ /
kaccittvamapyavighnena samprāpto bhagavanniti //
mārkaṇḍeya uvāca /

hāḍhamityeva tau vipraḥ pratyuvāca mudānvitaḥ /
dharmavyādhastu taṃ vipramarthavadvākyamabravīt //

pitā mātā ca bhagavannetau me daivataṃ param /
yaddaivatebhyaḥ kartavyaṃ tadetābhyāṃ karomyaham //

trayastriṃśadyathā devāḥ sarve śakrapurogamāḥ /
sampūjyāḥ sarvalokasya tathā vṛddhāvimau mama //

upāhārānāharanto devatānāṃ yathā dvijaḥ /
kurvanti tadvadetābhyāṃ karomyahamatandritaḥ //

etau me paramaṃ brahmanpitā mātā ca daivatam /
etau puṣpaiḥ phalairannaistoṣayāmi sadā dvija //

etāvevāgnayo mahyaṃ yānvadanti manīṣiṇaḥ /
yajñā vedāśca catvāraḥ sarvametau mama dvija //

etadarthaṃ mama prāṇā bhāryā putraḥ suhṛjjanaḥ /
saputradāraḥ śuśrūṣāṃ nityameva karomyaham //

svayaṃ ca snāpayāmyetau tathā pādau pradhāvaye /
āhāraṃ ca prayacchāmi svayañca dvijasattama //

anukūlāḥ kathā vacmi vipriyaṃ parivarjaye /
adharmeṇāpi saṃyuktaṃ priyamābhyāṃ karomyaham //

dharmameva guruṃ matvā sākṣādetau dvijottama /
atandritaḥ sadā vipra śuśrūṣāṃ vai karomyaham //

pañcaiva guravo brahmanapuruṣasya bubhūṣataḥ /
pitā mātā'gnirātmā ca guruśca dvijasattama //

eteṣu yastu varteta samyageva dvijottama / bhaveyuraprayastena paricīrṇāstu nityaśaḥ /
gārhasthye vartamānasya eṣa dharmaḥ sanātanaḥ //