Mahabharata · Chapter 3.194

tataścorakṣayankṛtvādvijebhyaḥ pṛthivīmimām /
vājimedhe mahāyajñe vidhivatkalpayiṣyati //

sthāpayitvā ca maryādāḥ svayambhuvihitāḥ śubhāḥ /
punaḥ puṇyayaśaḥkarma jarayā saṃśrayiṣyati //

tacchīlamanuvarsyanti manuṣyā lokavāsinaḥ /
vipraiścorakṣaye caiva kṛtekṣemaṃ bhaviṣyati //

kṛṣṇājināni śaktīśca triśūlānyāyudhāni ca /
sthāpayandvijaśārdūlo deśeṣu vijiteṣu ca //

saṃstūyamāno viprendrairmānayāno dvijottamān /
kalkīcariṣyati mahīṃ sadā dasyuvadhe rataḥ //

hā mātastāta putreti tāstā vācaḥ sudāruṇāḥ /
vikrośamānānsubhṛśaṃ dasyūnaneṣyati sankṣayam //

tato'dhaṟmavināśo vai dharmavṛddhiśca bhārata /
bhaviṣyati kṛteprāpte kriyāvāṃśca janastathā //

ārāmāścaiva caityāśca taṭākāvasathāstathā /
puṣkariṇyaśca vividhā devatāyatanāni ca //

yajñakriyāśca vividhā bhaviṣyanti kṛte yuge /
brāhmaṇāḥ sādhavaścaiva munayaśca tapasvinaḥ //

āśramā hatapāṣaṇḍāḥ sthitāḥ satye janāstadā /
jāyanti sarvabhūtāni śudhyamānāni caiva hi //

sarveṣvṛtuṣu rājendra sarvaṃ sasyaṃ bhaviṣyati /
narā dāneṣu niratā vrateṣu niyameṣu ca //

japayajñaparā viprā dharmakāmā mudā yutāḥ /
pālayiṣyanti rājāno dharmeṇemāṃ vasundharām //

vyavahāraratā vaiśyā bhaviṣyanti kṛte yuge /
ṣaṭkarmaniratā viprāḥ kṣatriyā rakṣaṇe ratāḥ //

śuśrūṣāyāṃ ratāḥ śūdrāstathā varṇatrayasya ca /
eṣa dharmaḥ kṛtayuge tretāyāṃ dvāpare tathā //

paścime yugakāle ca yaḥ sa te samprakīrtitaḥ /
sarvalokas viditā yugasahkhyā ca pāṇḍava //

etatte sarvamākhyātamatītānāgataṃ mayā /
vāyuproktamanusmṛtyapurāṇamṛṣisaṃstutam //

evaṃ saṃsāramārgā me bahuśaścirajīvinaḥ /
dṛṣṭāścaivānubhūtāśca kiṃ bhūyaḥ śrotumicchasi //

idaṃ caivāparaṃ bhūyaḥ saha bhrātṛbhiracyuta /
dharmasaṃśayamokṣārthaṃ nibodha vacanaṃ mama //

na te'nyathā'tra vijñeyo dharmo dharmabhṛtāṃvara /
dharmātmā hi sukhaṃ rājanpretya ceha ca nandati //

na brāhmaṇe paribhavaḥ kartavyaste kadācana /
brāhmaṇaḥ kupito'hanyādapi lokānpratijñayā //
vaiśampāyana uvāca /

mārkaṇḍeyavacaḥ śrutvā kurūṇāṃ pravaro nṛpaḥ /
uvāca vacanaṃ dhīmānparamaṃ paramadyutiḥ //

etacchrutvā mayā kiṃ syātkartavyaṃ munisattama /
kathaṃ cāyaṃ jitoloko rakṣitavyo bhaviṣyati //

kasmindharme mayā stheyaṃ prajāḥ saṃrakṣatā mune /
kathañca vartamāno vai na cyaveyaṃ svadharmataḥ //
mārkaṇḍeya uvāca /

dayāvānsarvabūteṣu hito rakto'nasūyakaḥ /
upatyānāmiva snehātprajānāṃ rakṣaṇe rataḥ //

cara dharmaṃ tyajādharmaṃ pitṝnpūrvānanusmara /
pramādādyatkṛtaṃ te'bhūtsamyagjñānena tajjaya //

alaṃ te mānamāśritya satataṃ priyavāgbhava /
vijitya pṛthivīṃ sarvāṃ modamānaḥ sukhī bhava //

eṣa bhūto bhaviṣyaśca dharmaste samudīritaḥ /
na te'styaviditaṃ kiñcidatītānāgataṃ bhuvi //

tasmādimaṃ parikleśaṃ tvaṃ tāta hṛdi mā kṛthāḥ /
prājñāstāta na muhyanti kālenāpi prapīḍitāḥ //

eṣa kālo mahābāho api sarvadibaukasām /
muhyanti hi prajāstāta kālenāpi pracoditāḥ //

mā ca te'tra viśaṅkā bhūdyanmayoktaṃ tavānagha /
atiśaṅkya vaco hyetaddharmalopo bhavettava //

jātosi prathite vaṃśe kurūṇāṃ bharatarṣabha /
karmaṇā manasā vācā sarvametatsamācara //
yudhiṣṭhira uvāca /

yattvayoktaṃ dvijaśreṣṭha vākyaṃ śrutimanoharam /
tathā kariṣye yatnena bhavataḥ śāsanaṃ vibho //

na me lobhosti viprendrana bhayaṃ na ca matsaraḥ /
kariṣyāmi hi tatsarvamuktaṃ yatte mayi prabho //
vaiśampāyana uvāca /

śrutvā tu vacanaṃ tasya pāṇḍavasya yaśasvinaḥ /
saṃhṛṣṭaḥ pāṇḍavā rājansahitā śārṅgadhanvanā //

viprraṣabhāśca te sarve ye tatrāsansamāgatāḥ / tathā kathāṃ śubhāṃ śrutvā ramārkaṇḍeyasya dhamataḥ /
vismitā samapadyanta purāṇas nivedanāt //