Mahabharata · Chapter 3.187

mārkaṇḍeyaṃ mahātmānamūcuḥ pāṇḍusutāstadā /
māhātmyaṃ dvijamukhyānāṃ śrotumicchāma kathyatām //

evamuktaḥ sa bhagavānmārkaṇḍeyo mahātapāḥ /
uvāca sumahātejāḥ sarvaśāstraviśāradaḥ //

hehayānāṃ kulakaro rājā parapurañjayaḥ /
kumāro rūpasampanano mṛgayāṃ vyacaradbalī //

caramāṇastu so'raṇye tṛṇavīrutsamāvṛte /
kṛṣṇājinottarāsaṅgaṃ dadarśa munimantike //

sa tena hiṃsito'raṇye manyamānena vai mṛgam /
vyathitaḥ karma tatkṛtvā śokopahatacetanaḥ //

jagāma hehayānāṃ vai sakāśaṃ prathitātmanām /
rājñāṃ rājīvanetrosau kumāraḥ pṛthivīpate //

teṣāṃ ca tadyathāvṛttaṃ kathayāmāsa vai tadā /
sa kumāro mahīpālo hehayānāṃ mahībhṛtām //

taṃ cāpi hiṃsitaṃ tāta muniṃ mūlaphalāśinam /
śrutvā dṛṣṭvā ca te tatra babhūvurdīnamānasāḥ //

kasyāyamiti te sarve mārgamāṇāstatastataḥ /
jagmuścāriṣṭanāmno'tha tārkṣyasyāśramamañjasā //

te'bhivādya mahātmānaṃ taṃ muniṃ saṃśitavratam /
tasthuḥ sarve sa tu munisteṣāṃ pūjāmathāharat //

te tamūcurmahātmānaṃ na vayaṃ sakriyāṃ mune /
tvatto'rhāḥ karmadoṣeṇa brāhmaṇo hiṃsito hi naḥ //

tānabravītsa viprarṣiḥ kathaṃ vo brāhmaṇo hataḥ /
kva cāsau brūta sahitāḥ paśyadhvaṃ me ratapobalam //

te tu tatsarvamakhilamākhyāyāsmai yathātatham /
nāpaśyaṃstamṛṣiṃ tatra gatāsuṃ te samāgatāḥ //

anveṣamāṇāḥ savrīḍāḥ suptavadgatamānasāḥ /
tānabravīttatramunistārkṣyaḥ parapurañjayaḥ //

syādayaṃ brāhmaṇaḥ so'thayuṣmābhiryo vināśitaḥ /
putro hyayaṃ mama nṛpāstapobalasamanvitaḥ //

te ca dṛṣṭvaiva tamṛṣiṃ vismayaṃ paramaṃ gatāḥ /
mahadāścaryamiti vai te bruvāṇā mahīpate //

mṛto hyayamito dṛṣṭaḥ kathaṃ jīvitamāptavān / kimetattapaso vīryaṃ yenāyaṃ jīvitaḥ punaḥ /
śrotumicchāmahe vipra yadi śrotavyamityuta //

sa tānuvāca nāsmākaṃ mṛtyuḥ prabhavate nṛpāḥ / kāraṇaṃ ca pravakṣyāmi hetuyogaṃ samāsataḥ /
mṛtyuḥ prabhavate yena nāsmākaṃ nṛpasattamāḥ //

śuddhācārādanalasāḥ sādhyopāsanatatparāḥ /
śuddhānnāḥ śuddhasadanā brahmacaryavratānvitāḥ //

satyamevābhijānīmo nānṛte kurmahe manaḥ /
svadharmamanutiṣṭhāmastasmānmṛtyubhayaṃ na naḥ //

yadbrāhmaṇānāṃ kuśalaṃ tadeṣāṃ kathayāmahe /
teṣāṃ hi caritaṃ brūmastasmānmṛtyubhayaṃ na naḥ //

atithīnannapānena bhṛtyānatyaśanena ca /
sambhojya śeṣamaśnīmastasmānmṛtyubhayaṃ na naḥ //

kṣāntā dāntāḥ kṣamāśīlāstīrthadānaparāyaṇāḥ / puṇyadeśanivāsācca tasmānmṛtyubhayaṃ na naḥ /
tejasvideśavāsācca tasmānmṛtyubhayaṃ na naḥ //

etadvai leśamātraṃ vaḥ samākhyātaṃ vimatsarāḥ /
gacchadhvaṃ sahitāḥ sarve na pāpādbhayamasti vaḥ //

evamastviti te sarve pratipūjya mahāmunim / svadeśamagamanhṛṣṭā rājāno bharatarṣabha //