Mahabharata · Chapter 3.184

nidāghāntakaraḥ kālaḥ sarvabhūtasukhāvahaḥ /
tatraiva vasatāṃ teṣāṃ prāvṛṭ samabhipadyata //

chādayanto mahāghoṣāḥ svaṃ diśaśca balāhakāḥ /
pravavarṣurdivārātramasitāḥ satataṃ tadā //

tapātyayaniketāśca śataśo'tha sahasraśaḥ /
apetārkaprabhājālāḥ savidyunmaṇḍaprabhāḥ //

virūḍhaśaṣpā dharaṇī mattadaṃśasarīsṛpā /
babhūva payasā siktā śāntadhūmarajogaṇā //

na sma prajñāyate kiñcidambhasā samavastṛte /
samaṃ vā viṣamaṃ vā'pi nadyo vā stāvarāṇi vā //

kṣubdhatoyā mahāvegāḥ śvasamānā ivāśugāḥ /
sindhavaḥ śobhayāñcakruḥ kānanāni tapātyaye //

nadatāṃ kānanānteṣu śrūyante vividhāḥ svanāḥ /
vṛṣṭibhistāḍyamānānāṃ varāhamṛgapakṣiṇām //

stokakāḥ śikhinaścaiva puṃskokilagaṇaiḥ saha /
mattāḥ paripatanti sma darduraścaiva darpitāḥ //

tadā bahuvidhākārā prāvṛṇmeghānunāditā /
abhyatītā śivā teṣāṃ caratāṃ marudhanvasu //

krauñcahaṃsasamākīrṇā śaratpramudītā'bhavat /
rūḍhakakṣavanaprasthā prasannajalanimnagā //

vimalākāśanakṣatrā śaratteṣāṃ śivā'bhaṣat /
mṛgadvijasamākīrṇā pāṇḍavānāṃ mahātmanām //

dṛśyante śāntarajasaḥ kṣapājaladaśītalāḥ /
grahanakṣatrasaṅghaiśca somena ca virājitāḥ //

kumudaiḥ puṇḍarīkaiśca śītavāridharāḥ śivāḥ /
nadīḥ puṣkariṇīścaiva dadṛśuḥ samalankṛtāḥ //

te vai mumudire vīrāḥ prasannasalilāṃ śivām /
paśyanto dṛḍhadhanvānaḥ paripūrṇāṃ sarasvatīm //

teṣāṃ puṇyatamā rātriḥ parvasandhau sma śāradī /
tatraiva vasatāmāsītkārtikī janamejaya //

puṇyakṛdbhirmahāsatvaistāpasaiḥ saha pāṇḍavāḥ /
tatsarvaṃ bharataśreṣṭha samūhuryogamuttamam //

tamisrābhyudaye tasmindhaumyena saha pāṇḍavāḥ / sūtaiḥ paurogavaiḥ sākaṃ kāmyakaṃ prayayurvanam //