મહાભારત · અધ્યાય 3.184

નિદાઘાન્તકરઃ કાલઃ સર્વભૂતસુખાવહઃ ।
તત્રૈવ વસતાં તેષાં પ્રાવૃટ્ સમભિપદ્યત ॥

છાદયન્તો મહાઘોષાઃ સ્વં દિશશ્ચ બલાહકાઃ ।
પ્રવવર્ષુર્દિવારાત્રમસિતાઃ સતતં તદા ॥

તપાત્યયનિકેતાશ્ચ શતશોઽથ સહસ્રશઃ ।
અપેતાર્કપ્રભાજાલાઃ સવિદ્યુન્મણ્ડપ્રભાઃ ॥

વિરૂઢશષ્પા ધરણી મત્તદંશસરીસૃપા ।
બભૂવ પયસા સિક્તા શાન્તધૂમરજોગણા ॥

ન સ્મ પ્રજ્ઞાયતે કિઞ્ચિદમ્ભસા સમવસ્તૃતે ।
સમં વા વિષમં વાઽપિ નદ્યો વા સ્તાવરાણિ વા ॥

ક્ષુબ્ધતોયા મહાવેગાઃ શ્વસમાના ઇવાશુગાઃ ।
સિન્ધવઃ શોભયાઞ્ચક્રુઃ કાનનાનિ તપાત્યયે ॥

નદતાં કાનનાન્તેષુ શ્રૂયન્તે વિવિધાઃ સ્વનાઃ ।
વૃષ્ટિભિસ્તાડ્યમાનાનાં વરાહમૃગપક્ષિણામ્ ॥

સ્તોકકાઃ શિખિનશ્ચૈવ પુંસ્કોકિલગણૈઃ સહ ।
મત્તાઃ પરિપતન્તિ સ્મ દર્દુરશ્ચૈવ દર્પિતાઃ ॥

તદા બહુવિધાકારા પ્રાવૃણ્મેઘાનુનાદિતા ।
અભ્યતીતા શિવા તેષાં ચરતાં મરુધન્વસુ ॥

ક્રૌઞ્ચહંસસમાકીર્ણા શરત્પ્રમુદીતાઽભવત્ ।
રૂઢકક્ષવનપ્રસ્થા પ્રસન્નજલનિમ્નગા ॥

વિમલાકાશનક્ષત્રા શરત્તેષાં શિવાઽભષત્ ।
મૃગદ્વિજસમાકીર્ણા પાણ્ડવાનાં મહાત્મનામ્ ॥

દૃશ્યન્તે શાન્તરજસઃ ક્ષપાજલદશીતલાઃ ।
ગ્રહનક્ષત્રસઙ્ઘૈશ્ચ સોમેન ચ વિરાજિતાઃ ॥

કુમુદૈઃ પુણ્ડરીકૈશ્ચ શીતવારિધરાઃ શિવાઃ ।
નદીઃ પુષ્કરિણીશ્ચૈવ દદૃશુઃ સમલન્કૃતાઃ ॥

તે વૈ મુમુદિરે વીરાઃ પ્રસન્નસલિલાં શિવામ્ ।
પશ્યન્તો દૃઢધન્વાનઃ પરિપૂર્ણાં સરસ્વતીમ્ ॥

તેષાં પુણ્યતમા રાત્રિઃ પર્વસન્ધૌ સ્મ શારદી ।
તત્રૈવ વસતામાસીત્કાર્તિકી જનમેજય ॥

પુણ્યકૃદ્ભિર્મહાસત્વૈસ્તાપસૈઃ સહ પાણ્ડવાઃ ।
તત્સર્વં ભરતશ્રેષ્ઠ સમૂહુર્યોગમુત્તમમ્ ॥

તમિસ્રાભ્યુદયે તસ્મિન્ધૌમ્યેન સહ પાણ્ડવાઃ । સૂતૈઃ પૌરોગવૈઃ સાકં કામ્યકં પ્રયયુર્વનમ્ ॥